ARCHIVED – ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᔪᑦ ᐳᓚᕋᑦᑐᓕᕆᓂᕐᒥᒃ ᕿᑭᖅᑕᕐᔪᐊᕐᓂ

ᒥᓂᔅᑕ ᐊᒡᓘᒃᑲᖅ ᑐᓴᒐᖅᑎᑦᑎᔪᖅ ᑮᓇᐅᔭᒃᓴᓂᒃᑕᐅᓯᒪᓂᐊᓕᖅᑐᓂᒃ ᓄᑖᓂᒃ ᐃᓕᖅᑯᓯᑐᖃᕆᔭᐅᔪᓂᒃ ᑕᑯᓂᐊᖅᑕᐅᕕᒃᓴᒥᒃ ᑲᑎᕝᕕᐅᕙᖕᓂᐊᓕᖅᑐᒥᒃ ᐃᒡᓗᒃᓴᒥᒃ

ᕕᐳᐊᕆ 2, 2015 – ᐃᖃᓗᐃᑦ, ᓄᓇᕗᑦ – ᐱᓕᕆᕕᖓ ᒥᓂᔅᑕᐅᑉ ᐊᕙᑎᓕᕆᓂᕐᒧᑦ, ᒥᓂᔅᑕᐅᑉ ᑲᓇᑕᒥᐅᑕᐃᑦ ᐅᑭᐅᖅᑕᖅᑑᓂᖏᓐᓂ ᑮᓇᐅᔭᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᕕᖕᒧᑦ (ᑳᓐᓄᐊᒃᑯᑦ) ᐊᒻᒪᓗ ᒥᓂᔅᑕᖓᑦ ᐅᑭᐅᖅᑕᖅᑐᒥᐅᑕᓕᕆᓂᕐᒧᑦ ᑲᑎᒪᔨᓄᑦ

ᐅᓪᓗᒥ ᒥᓂᔅᑕ ᐊᒡᓘᒃᑲᖅ ᑐᓴᖅᑎᑦᑎᖃᐅᔪᖅ ᓄᑖᒥᒃ ᑮᓇᐅᔭᒃᓴᓂᒃᑕᐅᓯᒪᓂᖏᓐᓂᒃ ᐱᕙᓪᓕᐊᔾᔪᑎᒃᓴᖓᓄᑦ ᕿᑭᖅᑕᕐᔪᐊᕐᒥ ᐳᓚᕋᑦᑐᓕᕆᓂᕐᒥᒃ ᓴᓈᕆᔭᐅᓂᐊᖅᑐᓂᒃ, ᐱᒻᒪᕆᐅᔪᓂᒃ ᐃᓚᒋᔭᐅᓪᑎᓗᒃ ᓄᓇᖓᓐᓂ ᑮᓇᐅᔭᓕᐅᕈᑕᐅᓂᕐᒧᑦ ᐊᒻᒪᓗ ᐱᕈᖅᐸᓪᓕᐊᔪᓐᓇᕐᓂᖓᓄᑦ.

ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᒃᓴᓂᒃᓯᒪᑎᑦᑎᓂᐊᓕᖅᑐᑦ ᐃᑲᔫᑕᐅᔪᓂᒃ ᓴᓇᔭᐅᓂᖓᓄᑦ ᑐᑭᓯᓂᐊᕐᕕᐅᕙᖕᓂᐊᖅᑐᖅ ᐊᒻᒪᓗ ᐃᓕᖅᑯᓯᑐᖃᖏᓐᓂᒃ ᑕᑯᔭᒐᖃᕐᕕᐅᓂᐊᖅᑐᓂᒃ ᕿᑭᖅᑕᕐᔪᐊᕐᒥ ᑲᑎᕝᕕᐅᕙᖕᓂᐊᖅᑐᒥᒃ ᐃᒡᓗᖁᑎᒃᓴᖓᓂᒃ. ᑕᐃᓐᓇ ᐃᒡᓗᖁᑎᒃᓴᖓᑦ ᐊᑑᑎᖃᒻᒪᕆᖕᓂᐊᖅᑐᖅ ᓄᓇᖓᓐᓂ ᑕᒪᐃᓐᓄᑦ ᐃᓄᖁᑎᖏᓐᓄᑦ ᑎᑭᓯᒪᕙᒃᑐᓄᓪᓗ ᐳᓚᕋᑦᑎᓄᑦ. ᑕᐃᓇ ᓄᑖᖅ ᑕᑯᔭᒐᖃᕐᕕᒃᓴᖅ ᐱᒻᒪᕆᐊᓗᖕᓂᒃ ᖃᐅᔨᒪᑎᑦᑎᖃᑦᑕᕐᓂᐊᖅᑐᑦ ᐳᓛᕆᐊᖅᓯᒪᔪᓄᑦ ᑎᑭᓯᒪᔪᓄᑦ ᐊᕕᒃᑐᖅᓯᒪᓂᖓᓂ, ᐱᔾᔪᑎᖃᖅᑐᓂᒃ ᓄᓇᖓᓂᒃ ᐊᕙᓗᐊᓂᒡᓗ, ᐃᓚᖃᖅᑐᓂᒡᓗ ᐊᐅᔪᐃᑦᑐᕐᒥᒃ ᑲᓇᑕᓕᒫᒧᑦ ᒥᖑᐃᖅᓯᕕᖕᒥᒃ.

ᓈᐃᓈᖅᑕᐅᓯᒪᔪᑦ ᓱᓕᔪᑦ

• ᐃᑲᔪᖅᑕᐅᓂᖏᓐᓄᑦ ᑖᒃᑯᐊ ᐱᓕᕆᐊᒃᓴᐃᑦ ᑳᓐᓄᐊᒃᑯᑦ ᑮᓇᐅᔭᒃᓴᓂᒃᓯᒪᓂᐊᓕᖅᑐᑦ $65,000-ᓂ, ᐃᓚᒋᔭᐅᖃᑕᐅᔪᓂᒃ ᑮᓇᐅᔭᒃᓴᓂᒃᑕᐅᓯᒪᒃᑲᓐᓂᖅᑐᓂᒃ ᒪᑯᓂᖓ $143,350 ᓄᓇᕗᑦ ᒐᕙᒪᒃᑯᖏᓐᓂᒃ, $50,000 ᑲᑭᕙᒃᑯᑦ ᑲᑐᔾᔨᖃᑎᒌᖏᓐᓂᒃ, ᐊᒻᒪᓗ $50,037-ᓂᒃ ᕼᐊᒻᒪᓚᖓᓐᓂᒃ ᕿᑭᖅᑕᕐᔪᐊᑉ. ᑲᑎᔅᓱᒋᑦ ᑕᐃᒃᑯᐊ ᑕᒪᕐᒥᒃ ᑮᓇᐅᔭᒃᓴᓂᒃᑕᐅᓯᒪᓂᐊᓕᖅᐳᑦ $308,387-ᓂ.
• ᕿᑭᖅᑕᕐᔪᐊᖅ ᐅᑭᐅᖅᑕᖅᑑᓂᕐᒥ ᑎᑭᓴᕐᕕᐅᕙᖕᒪᑐᖅ ᓄᓇᕐᔪᐊᕐᒥᐅᑕᓄᑦ ᖃᐅᔨᒪᔭᐅᑦᑎᐊᖅᑐᒧᑦ ᐊᐅᔪᐃᑦᑑᑉ ᑲᓇᑕᓕᒫᒥ ᒥᖑᐃᖅᓯᕕᖓᓐᓄᑦ, ᑕᒫᓂᓗ ᐳᓚᕋᑦᑐᓕᕆᓂᖅ ᐱᒻᒪᕆᐅᔪᓂᒃ ᑮᓇᐅᔭᓕᐅᕈᑕᐅᓕᕈᓐᓇᕐᓂᖓ ᓇᓗᓇᐃᖅᑕᐅᓯᒪᓕᖅᑐᖅ ᕼᐊᒻᒪᓚᑦᑯᑦ ᓄᓇᖓᓐᓂ ᑮᓇᐅᔭᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᖏᓂ.
• ᑐᑭᓯᓂᐊᕐᕕᐅᓂᖓ ᐃᓕᖅᑯᓯᑐᖃᖏᓐᓂᒡᓗ ᑕᑯᓂᐊᖅᑕᐅᕕᒃᓴᖅ ᓴᓇᔭᐅᓕᖅᑐᖅ ᐱᔭᕇᖅᑕᐅᓂᐊᕋᓱᒋᔭᐅᓕᖅᑐᖅ ᓄᑖᒥ ᐊᕐᕋᒍᓂᐊᖅᑐᖅ ᐱᒋᐊᓕᓵᕐᓂᖓᓂ.

ᐅᖃᐅᓯᐅᓯᒪᔪᑦ

"ᓄᓇᕗᑦ ᐊᔾᔨᐅᖏᑦᑑᑎᓂᒃ ᐃᓕᖅᑯᓯᖃᕐᕕᐅᓂᖓ, ᓄᓇᖁᑎᖃᕐᓂᖓ, ᐅᖃᐅᓯᖏᓪᓗ ᑕᐃᒪᖓᓂᒃ ᐱᐅᒋᔭᐅᔾᔪᑕᐅᕙᒃᑐᑦ ᐳᓚᕋᑦᑎᓄᑦ ᑎᑭᓯᒪᕕᐅᖃᑦᑕᕈᒪᓂᕐᒧᑦ. ᑮᓇᐅᔭᒃᓴᓂᒃᓯᒪᔭᕗᑦ ᑕᒡᕗᖓ ᑲᑎᕝᕕᒃᓴᐅᑉ ᐃᒡᓗᖁᑎᖓᓄᑦ ᓴᕿᐅᒪᑎᑦᑎᔾᔪᑕᐅᕗᖅ ᒐᕙᒪᒋᔭᑦᑎᓐᓂᒃ ᐱᓂᐊᕐᓂᕆᔭᐅᔪᓂᒃ ᐃᑲᔪᖅᓱᐃᓂᕐᒧᑦ ᐱᕙᓪᓕᐊᔾᔪᑎᒃᓴᖏᓐᓂᑦ ᓄᓇᕗᑦ ᐊᕕᒃᑐᖅᓯᒪᓂᖓᓄᑦ ᐳᓚᕋᑦᑐᓕᕆᓂᕐᒥᒃ ᐱᓕᕆᐊᖑᔪᓐᓇᖅᑐᓂᒃ ᐊᒻᒪᓗ ᐱᓗᐊᖅᑐᒥᒃ ᐃᑲᔪᕐᓂᖃᕐᓂᐊᖅᑐᓂᒃ ᕿᑭᖅᑕᕐᔪᐊᕐᒥᐅᓂᒃ ᐱᒻᒪᕆᐅᓕᕈᓐᓇᕐᓂᖅ ᐳᓚᕋᑦᑎᓄᑦ ᑎᑭᑕᕐᕝᕕᐅᖃᑦᑕᕈᒪᓂᕐᒧᑦᑦ ᐅᑭᐅᖅᑕᖅᑐᒥ."

"ᕼᐊᒻᒪᓚᑦᑯᑦ ᕿᑭᖅᑕᕐᔪᐊᓂ ᐃᓱᒪᖃᐃᓐᓇᑦᑎᐊᕐᓂᑰᖕᒪᑕ ᐳᓚᕋᑦᑎᓄᑦ ᑎᑭᑕᕐᕕᐅᖃᑦᑕᕈᒪᓂᖅ ᓄᓇᖓᓐᓂ. ᑕᒪᑐᒪᓂ ᐊᕐᕋᒎᒥ, ᑕᒪᓐᓇ ᐃᓱᒪᒋᔭᐅᖏᓐᓇᖅᑐᖅ ᐱᑕᖃᓕᖁᔭᐅᓪᓗᓂ ᐱᖑᖅᐸᓪᓕᐊᓂᐊᓕᖅᐳᖅ ᐱᔭᕇᖅᑕᐅᓗᓂ ᑲᑎᕝᕕᒃ ᐃᒡᓗᖁᑎᒃᓴᖅ ᐊᒻᒪᓗ ᑕᑯᒃᓴᐅᑎᑦᑎᕕᒃᓴᖅ ᐱᐅᓯᑐᖃᑦᑎᓐᓂᒃ ᐱᖁᑎᒌᓐᓇᖅᑕᑐᖃᕗᑦ ᐃᓕᖅᑯᓯᑐᖃᖅᐳᑦ ᑕᑯᔭᒃᓴᐅᒍᓐᓇᖅᓯᓗᑎᒃ. ᖁᔭᓕᔪᒍᑦ ᑳᓐᓄᐊᒃᑯᓐᓄᑦ ᑮᓇᐅᔭᒃᓴᓂᒃᑕᐅᓯᒪᓂᖏᓐᓄᑦ ᑕᒪᑯᐊ ᐱᓕᕆᐊᒃᓴᐃᑦ. ᓯᕗᒻᒧᑦ ᑕᑯᓐᓇᖕᓂᐊᖅᑐᒍᑦ ᐱᓕᕆᐊᖑᒋᐊᖃᕐᓂᐊᕐᒥᔪᓂᒃ ᑐᖓᓱᒃᑎᑦᑎᔪᓐᓇᖅᓯᓗᑕ ᐊᒥᓲᓂᖅᓴᒻᒪᕆᖕᓂᒃ ᐳᓚᕋᑦᑎᓂᒃ ᑎᑭᓯᒪᖃᑦᑕᕐᓂᐊᖅᑐᓂᒃ ᓄᓇᑦᑎᐊᕚᓪᓗᒃᑎᓐᓄᑦ, ᐊᑐᕆᐅᖅᑎᑕᐅᕐᓂᐊᕐᒪᑕ ᐱᐅᓂᖅᐹᖑᔪᓐᓇᖅᑐᓂᒃ ᐊᒻᒪᓗ ᑲᔾᔭᕐᓇᖅᑐᓂᒃ ᐳᓛᕆᐊᖅᓯᒪᔪᑦ."

ᐊᓯᒃᑲᓐᓂᖏᑦ ᑖᒃᑯᓄᖓ ᐃᓚᒋᔭᐅᖕᒥᔪᑦ

• ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᒃᓴᓂᒃᓯᒪᔪᑦ ᓄᓇᓕᖕᓂ ᐱᕙᓪᓕᐊᔾᔪᑎᒃᓴᓂᒃ ᖁᕐᓗᖅᑐᖅᒥ
• ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᔪᑦ ᐳᓚᕋᑦᑐᓕᕆᓂᕐᒥᒃ ᐱᕙᓪᓕᐊᑎᑦᑎᓂᕐᒥᒃ ᐊᕐᕕᐊᓂ
• ᑳᓐᓄᐊᒃᑯᑦ ᑮᓇᐅᔭᒃᓴᓂᒃᓯᒪᔪᓕᖅᑐᑦ ᓄᓇᕗᒻᒥ ᐳᓚᕋᑦᑐᓕᕆᓂᕐᒥᑦ ᓴᓈᖃᕐᓂᕐᒧᑦ

ᐅᖃᕐᕕᒃᓴᐃᑦ

ᐱᓕᕆᕕᖓᓂ ᓂᕈᐊᖅᑕᐅᓯᒪᔪᑉ ᓕᐅᓇ ᐊᒡᓗᑲᖅ
ᑎᐊᑦ ᓚᐃᑭᖕ
819-997-1441

ᑲᓇᑕᐅᑉ ᐅᑭᐅᖅᑕᖅᑑᓂᖓᓂ ᑮᓇᔭᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᕕᖓ
ᒍᕇᐊᒡ ᐅᐋᓪᔅ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐅᖃᐅᔾᔨᒋᐊᖅᑎᑦ, ᓄᓇᕗᑦ ᐊᕕᒃᑐᖅᓯᒪᓂᖓᓄᑦ
867-975-3722

ᕼᐊᒻᒪᓚᖓᑦ ᕿᑭᖅᑕᕐᔪᐊᑦ
ᒥᐊᓕ ᕿᓕᖅᑎ
ᒪᐃᔭᖓᑦ
867-927-8832

ᑳᓐᓄᐊᒃᑯᑦ ᐱᓕᕆᐊᖃᖅᐳᑦ ᐃᑲᔪᖅᑎᐅᓂᖅ ᓴᕿᐅᒪᑎᑦᑎᕙᓪᓕᐊᔪᒪᓂᖅ ᐊᒥᓱᓂᒃ ᐊᔾᔨᒌᖏᑦᑑᑎᐅᔪᓂᒃ, ᑲᔪᓰᓐᓇᕈᓐᓇᕋᔭᖅᑐᓂᒃ ᐊᒻᒪᓗ ᐱᐅᔫᑎᓂᒃ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᓇᓂᑐᐃᓐᓇᖅ ᑲᓇᑕᐅᑉ ᐅᑭᐅᖅᑕᖅᑑᓂᖏᓐᓂ ᐱᖓᓱᓂᒃ ᐊᕕᒃᑐᖅᓯᒪᓂᖏᓐᓂᒃ, ᐊᒻᒪᓗ ᐊᑐᐃᓐᓇᐅᑎᑦᑎᖃᑦᑕᖅᓱᑎᒃ ᐅᑭᐅᖅᑕᖅᑐᒥᐅᑕᓄᑦ ᑎᓕᔭᐅᓯᒪᓂᕐᒥᓂᒃ ᒪᓕᒃᓱᑎᒃ ᑮᓇᐅᔭᒃᓴᖃᖅᑎᑦᑎᖃᑦᑕᕆᐊᖃᕐᓂᕐᒧᑦ ᐊᑐᒐᒃᓴᐅᓕᕐᓂᐊᖅᑐᓄᑦ, ᐅᑭᐅᖅᑕᖅᑐᒥ ᐱᓕᕆᐊᒃᓴᓂᒃ ᐊᐅᓚᑦᑎᕕᐅᓂᕐᒧᑦ ᐱᓕᕆᕕᖓᓐᓂᒃ ᐊᒻᒪᓗ ᐱᓕᕆᐊᖃᖃᑦᑕᕐᓂᕐᒧᑦ ᐊᑐᐊᒐᒃᓴᓕᕆᓂᕐᒥᒃ ᐊᒻᒪᓗ ᖃᐅᔨᓴᖃᑦᑕᕐᓂᕐᒥᒃ.