ᐃᑲᔪᖅᓱᖅᑕᐅᓂᖓ ᐳᓚᕋᖅᑐᓕᕆᓂᐅᑉ ᐱᕙᓪᓕᐊᑎᑕᐅᓂᖓ ᐃᒃᐱᐊᕐᔪᖕᒥ
ᓄᑖᖑᔪᖅ ᓄᓇᓕᖕᒧᑦ ᐱᒋᔭᐅᔪᖅ Arctic Bay Adventures ᐊᑐᐃᓐᓇᐅᑎᑦᑎᓂᐊᖅᑐᑦ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒧᑦ ᐊᑑᑎᒃᓴᓂᒃ ᐱᔨᑦᑎᕋᐅᑎᓂᒡᓗ
ᐄᐳᓪ 28, 2016 – ᐃᖃᓗᐃᑦ, ᓄᓇᕗᑦ – ᑲᓇᑕᒥ ᐅᑭᐅᖅᑕᖅᑐᒧᑦ ᐱᕙᓪᓕᐊᓂᕐᒧᑦ ᑐᑦᑕᕐᕕᐅᔪᖅ
ᐅᓪᓗᒥ, ᓂᕈᐊᖅᑕᐅᓯᒪᔪᖅ ᓇᕝᑏᑉ ᐸᐃᓐᔅ, ᒥᓂᔅᑕᒋᔭᐅᔪᖅ ᐃᓱᒪᓕᐊᕆᔭᐅᕋᑖᖅᑐᓄᑦ, ᖃᐅᔨᓴᕐᓂᕐᒧᑦ ᐊᒻᒪᓗ ᐱᕙᓪᓕᐊᓂᕐᒧᑦ ᐊᒻᒪᓗ ᒥᓂᔅᑕᐅᔪᖅ ᑲᒪᒋᓪᓗᓂᐅᒃ ᑲᓇᑕᒥ ᐅᑭᐅᖅᑕᖅᑐᒧᑦ ᐱᕙᓪᓕᐊᓂᕐᒧᑦ ᑐᑦᑕᕐᕕᐅᔪᖅ ᐅᖃᖅᖃᐅᔪᖅ ᑮᓇᐅᔭᖃᖅᑎᑦᑎᔪᖃᕐᓂᖓᓂᒃ $500,000ᓂᒃ ᐃᑲᔪᖅᓱᖅᑕᐅᓂᖓᓄᑦ ᐱᑕᖃᓕᖅᑎᑕᐅᓂᖓ Arctic Bay Adventures Inc., ᓄᓇᓕᖕᒧᑦ ᓇᖕᒥᓂᕆᔭᐅᓪᓗᓂ ᐱᕙᓪᓕᐊᓂᕐᒧᑦ ᑯᐊᐸᕇᓴᐅᔪᖅ ᐱᑕᖃᖅᑎᑦᑎᓂᐊᖅᑐᒥᒃ ᓇᐅᒃᑯᑐᐃᓐᓇᖅ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ.
ᑖᓐᓇ ᑯᐊᐸᕇᓴᓐ ᐃᓱᒪᓕᐊᕆᔭᐅᕋᑖᕐᓂᒃᑯᑦ ᐱᔅᓇᓯᓄᑦ ᐃᔾᔪᖅᑕᐅᔪᒥᓇᖅᑐᖅ ᓄᓇᕗᒻᒧᑦ. ᑕᒪᑐᒪᓂ ᐅᑭᐅᖅᑕᖅᑐᕐᒥ ᐃᔾᔪᐊᖅᑕᐅᔪᒥᓇᖅᑐᒥ, ᓄᓇᓕᖕᒥᐅᑕᐃᑦ ᓯᕗᓕᖅᑎᒋᔭᐅᔪᑦ ᐊᓯᐊᒎᕈᓐᓇᖅᑎᑦᑎᓂᕐᒥᒃ ᓄᓇᓕᖕᒥ ᑮᓇᐅᔭᑎᒍᑦ ᒪᑭᑉᐹᓪᓕᐅᑎᒃᓴᒥᒃ ᓴᓇᓪᓗᓂᓗ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒧᑦ ᐃᖅᑲᓇᐃᔮᓂᒃ ᐊᕕᒃᓯᒪᔪᒥ.
Arctic Bay Adventures Inc. ᑲᒪᒋᔭᖃᓛᖅᑐᑦ ᑕᒪᐃᓐᓂᒃ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒧᑦ ᖃᓄᐃᓕᐅᕈᑕᐅᔪᓂᒃ ᓄᓇᓕᖕᒥ, ᐱᔭᐅᑎᑦᑎᕙᒃᐳᖅ ᓴᓇᔭᐅᔪᓂᒃ ᐱᔨᑦᑎᕋᐅᑎᓂᒡᓗ ᓂᐅᕐᕈᑎᒃᓴᖃᕈᒥᒍᓱᒃᑐᓕᖅᖢᓂ ᐊᒻᒪᓗ ᐱᓕᒻᒪᒃᓴᐃᖃᑦᑕᕐᓗᑎᒃ, ᑲᒪᒋᕙᒡᓗᓂᒋᑦ ᐊᑐᖅᑐᐊᖅᑕᐅᕙᒃᑐᑦ, ᐊᒻᒪᓗ ᐋᖅᑭᒃᓱᐃᕙᒡᓗᑎᒃ ᐊᒃᑐᐊᔪᓂᒃ ᐊᐅᓪᓛᖅᓯᒪᓂᕐᒧᑦ ᖃᓄᐃᓕᐅᕈᑕᐅᔭᕆᐊᖃᖅᑐᓂᒡᓗ ᐱᔨᑦᑎᕋᕐᓂᕐᒥᒃ. ᓴᓇᔭᐅᓂᖓ ᑖᓐᓇ ᓄᑖᖑᔪᖅ ᑯᐊᐸᕇᓴᓐ ᓴᖅᑭᑦᑎᓛᖅᑐᖅ ᓄᑖᕐᓂᒃ ᐃᖅᑲᓇᐃᔮᒃᓴᕐᓂᒃ ᐱᔅᓇᓯᑕᖃᖅᑎᑦᑎᓗᓂᓗ ᓄᓇᓕᖕᒥ.
ᓇᐃᑦᑐᑦ ᓱᓕᔪᓄᑦ
- ᑲᓇᑕᒥ ᐅᑭᐅᖅᑕᖅᑐᒧᑦ ᐱᕙᓪᓕᐊᓂᕐᒧᑦ ᑐᑦᑕᕐᕕᐅᔪᖅ ᑮᓇᐅᔭᖅᑖᖅᑎᑦᑎᔪᑦ $500,000ᓂᒃ ᓴᓇᔭᐅᓂᖓᓄᑦ Arctic Bay Adventures Inc. ᑮᓇᐅᔭᖅᑖᖅᑎᑕᐅᒃᑲᓐᓂᕆᓪᓗᓂ $650,000ᓂᒃ ᑲᑭᕙᒃ ᑲᑐᔾᔨᖃᑎᒌᖏᓐᓂᑦ, $250,000ᓂᒃ ᓄᓇᕗᑦ ᒐᕙᒪᒃᑯᓐᓂᑦ ᐱᕙᓪᓕᐊᔪᓕᕆᔨᒃᑯᓐᓂᑦ ᐃᖏᕐᕋᔪᓕᕆᔨᒃᑯᓐᓂᓪᓗ, ᐊᒻᒪᓗ $208,900ᓂᒃ ᐃᒃᐱᐊᕐᔫᑉ ᕿᒪᐃᕝᕕᐅᓂᖏᓐᓄᑦ ᑮᓇᐅᔭᕐᓂᑦ. ᑕᒪᒃᑭᖅᖢᒋᑦ ᑮᓇᐅᔭᑦ $1,608,900ᖑᔪᖅ ᐊᕐᕌᒍᓂ ᑎᓴᒪᓂ ᑐᓂᐅᖅᑲᖅᑕᖃᑦᑕᓛᖅᖢᑎᒃ.
- Arctic Bay Adventures Inc. ᐃᖅᑲᓇᐃᔮᒃᓴᖅᑕᖃᖅᑎᑦᑎᓂᐊᖅᐳᖅ ᐅᓪᓗᓕᒫᖅᑕᕈᑕᐅᔪᒥ ᐊᒻᒪ ᐊᕐᕌᒎᑉ ᐃᓗᐊᓂ ᓈᒻᒪᓈᖅᓯᒪᓕᕌᖓᑦ ᐊᐅᓚᑦᑎᔨᐅᔪᒃᓴᒥᒃ, ᐊᐅᓪᓚᕈᔾᔨᔨᐅᕙᒃᑐᒃᓴᓂᒃ, ᐊᖁᑎᓂᒃ, ᐊᐅᓪᓚᐅᒪᕝᕕᖕᒥ ᐃᒐᔨᓂᒃ, ᐊᐅᓪᓚᕈᓐᓇᐅᑎᖃᖅᑎᑦᑎᔨᓂᒡᓗ ᓄᓇᓖᑦ ᐳᓚᕋᕐᓂᕐᒧᑦ ᑮᓇᐅᔾᔭᒃᓴᐅᑎᒃᓴᕆᔭᖓᓂᒃ.
- ᐃᒃᐱᐊᕐᔪᒃ ᖃᓂᒋᔭᖓᓃᑦᑐᖅ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖓᓄᑦ ᐊᒻᒪᓗ ᑕᓪᓗᕈᑎᐅᑉ ᐃᒪᖓᓂ ᐱᕝᕕᐅᑦᑕᐅᓕᒪᖁᔭᐅᔪᒧᑦ. ᑕᒪᒃᑭᒃ ᑕᑯᔭᐅᔪᒥᓇᖅᑑᒃ ᐳᓚᕋᖅᑐᓂᒃ ᑎᑭᑦᑐᖃᕐᓂᖅᓴᐅᓛᕋᓱᒋᔭᐅᔫᒃ ᐃᒃᐱᐊᕐᔫᑉ ᖃᓂᒋᔮᓄᑦ ᐊᕐᕌᒍᓂ ᐊᒡᒋᖅᑐᓂ ᐃᖏᕐᕋᕝᕕᐅᕙᒃᑐᓄᑦ ᑕᒪᐃᓐᓄᑦ ᐅᒥᐊᕐᔪᐊᕐᓄᑦ ᐳᓚᕋᖅᑎᓄᑦ ᐊᒻᒪᓗ ᓇᖕᒥᓂᖅ ᐅᒥᐊᕐᔪᐊᑦᑎᐊᕙᒋᔭᐅᔪᓄᑦ.
ᐅᖃᖅᑕᐅᔪᑦ
"ᐃᒃᐱᐊᕐᔫᑉ ᐊᔾᔨᐅᓇᓂ ᐃᓕᖅᑯᓯᕆᔭᖓ ᓇᓃᓐᓂᕆᔭᖓᓗ ᐳᓚᕋᖅᑎᓄᑦ ᐅᐸᒍᒥᓐᓇᑦᑎᐊᖅᐳᖅ. ᑮᓇᐅᔭᖃᖅᑎᑦᑎᓂᒃᑯ Arctic Bay Adventuresᒧᑦ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᐊᑐᖅᑕᐅᓚᐅᖅᓯᒪᙱᑦᑐᒥᒃ ᐅᑭᐅᖅᑕᖅᑐᕐᒧᑦ ᐊᑐᖅᑕᐅᔪᒃᓴᒥᒃ ᓄᓇᓕᖕᓂᙶᓪᓚᕆᒃᑐᒥᒃ ᑮᓇᐅᔾᔭᒃᓴᐅᑕᐅᔪᒥᒃ ᐃᑲᔪᖅᓲᑕᐅᓇᔭᖅᑐᒥᒃ ᐱᕈᖅᐸᓪᓕᐊᓂᖃᖅᑎᑦᑎᐊᕋᔭᖅᑐᒥᒃ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒧᑦ ᐃᖅᑲᓇᐃᔮᖅᑖᕈᑕᐅᓇᔭᖅᑐᒥᒃ ᑮᓇᐅᔭᑎᒍᑦ ᒪᑭᑉᐹᓪᓕᐅᑎᒃᓴᓕᐅᕈᑕᐅᔪᒥ."
"ᑲᓇᑕᐅᑉ ᒐᕙᒪᒃᑯᖏᒃ ᐱᓕᕆᖃᑎᖃᖅᐳᑦ ᓄᓇᕘᑉ ᒐᕙᒪᒃᑯᖏᓐᓂᒃ, ᑲᑭᕙᒃ ᑲᑐᔾᔨᖃᑎᒌᖏᑦ, ᐊᒻᒪᓗ ᐃᒃᐱᐊᕐᔫᑉ ᕼᐋᒪᓚᖓ ᐊᑐᖅᓯᓂᖃᖅᑎᑦᑎᓇᓱᒃᖢᑎᒃ ᐳᓚᕋᕐᓂᒃᑯᑦ ᑲᔾᔮᕆᔭᐅᔾᔫᓯᒪᓂᕆᔭᖅ ᓄᓇᓕᖕᒥ. ᑕᒪᓐᓇ ᐊᑐᖅᑕᐅᓚᐅᖅᓯᒪᙱᑦᑐᖅ ᐱᒋᐊᖅᑎᑕᖃᕐᓂᖅ ᓱᕋᐃᑦᑕᐃᓕᓂᒃᑯᑦ ᐳᓚᕋᖅᑐᓕᕆᓂᕐᒥᒃ ᐊᒻᒪ ᐃᑲᔪᖅᓱᐃᓂᖅ ᓄᓇᓕᖕᓂ ᑮᓇᐅᔭᑎᒍᑦ ᒪᑭᑉᐹᓪᓕᐅᑎᒃᓴᐅᔪᒥᒃ ᐃᔾᔪᐊᒐᒃᓴᐅᓂᐊᖅᐳᖅ ᐊᓯᖏᓐᓄᑦ ᓄᓇᓕᖕᓄᑦ ᓄᓇᕗᒻᒥ ᐃᓚᒋᔭᐅᖃᓯᐅᔾᔭᐅᓪᓗᓂ ᓄᓇᓕᖕᓂᒃ ᓴᙱᒃᑎᑦᑎᕚᓪᓕᕐᓂᔭᕐᒧᑦ."
"ᐅᐱᒍᓱᑦᑎᐊᖅᑐᒍᑦ ᖃᓄᐃᓕᐅᕐᓂᕆᓯᒪᔭᑦᑎᓐᓂᒃ ᐋᖅᑭᒃᑕᐅᓂᖓᓂ Arctic Bay Adventures. ᑖᓐᓇ ᐱᓕᕆᐊᒃᓴᖅ ᓄᓇᓕᖕᒧᑦ ᑲᔪᓯᑦᑎᐊᕐᓂᕆᑐᐃᓐᓇᐅᙱᖦᖢᓂ, ᐆᒃᑑᑎᑦᑎᐊᕙᐅᕗᖅ ᐱᓕᕆᖃᑎᒌᑦᑎᐊᕐᓂᕐᒧᑦ, ᐱᖓᓲᓪᓗᑎᒃ ᒐᕙᒪᐃᑦ, ᑲᑭᕙᒃ ᑲᑐᔾᔨᖃᑎᒌᖏᑦ ᐊᒻᒪᓗ ᐃᒃᐱᐊᕐᔪᖕᒥᐅᑦ ᐱᓕᕆᖃᑎᒌᒃᖢᑎᒃ ᐃᓱᒪᓕᐊᕆᔭᐅᓂᖓ ᐃᓄᖕᓄᑦ ᓄᓇᓕᖕᒧᑦ ᓇᖕᒥᓂᕆᔭᐅᓗᓂ ᐳᓚᕋᖅᑐᓕᕆᓂᕐᒧᑦ ᑲᒻᐸᓂᐅᔪᖅ ᐱᓪᓚᑦᑖᙳᖅᑎᑕᐅᓂᖓᓄᑦ."
"ᐃᒃᐱᐊᕐᔪᒃ ᐳᓚᕋᖅᑎᓄᑦ ᐅᐸᒃᑕᐅᖃᑦᑕᕈᓐᓇᕋᔭᑦᑎᐊᖅᑐᖅ. ᓄᓇᕗᑦ ᒐᕙᒪᖓ ᐊᔪᐃᓐᓈᕇᓐᓇᐅᔭᕐᓂᐊᖅᑕᖏᑦ ᓄᓇᓕᖕᓂ ᐱᒋᐊᖅᑎᑕᐅᔪᑦ ᑮᓇᐅᔭᑎᒍᑦ ᒪᑭᑉᐹᓪᓕᐅᑎᒃᓴᓄᑦ ᐱᕙᓪᓕᖅᑎᑦᑎᔨᓂᑦ ᓄᓇᕗᓕᒫᒥ. ᐅᐱᒍᓱᒃᑐᒍᑦ ᐃᑲᔪᖅᓱᕋᑦᑎᒍᑦ Arctic Bay Adventures ᐱᕙᓪᓕᐊᑎᑕᐅᓂᖏᓐᓂ ᐳᓚᕋᖅᑐᓅᖓᔪᑦ ᓴᓇᔭᐅᔪᑦ ᐱᔨᑦᑎᕈᑏᓪᓗ, ᐊᒻᒪ ᓂᕆᐅᖕᓂᖃᑦᑎᐊᖅᐳᑦ ᐳᓚᕋᕐᓂᒃᑯᑦ ᑮᓇᐅᔾᔭᒃᓴᐅᑕᐅᔪᓐᓇᕐᓂᖓᓂᒃ ᓄᓇᓕᖕᓂ."
"ᐃᒃᐱᐊᕐᔪᒃ ᓄᓇᕐᔪᐊᕐᒥ ᑲᔾᔮᕐᓇᓛᖑᖃᑕᐅᔪᖅ. ᖁᕕᐊᓱᑦᑎᐊᖅᑐᒍᑦ, ᐃᑲᔪᖅᑕᐅᓯᒪᓪᓗᑕ ᒐᕙᒪᑐᖃᒃᑯᓐᓄᑦ ᑲᓇᑕᒥ, ᑲᑭᕙᒃ ᑲᑐᔾᔨᖃᑎᒌᖏᓐᓄᑦ, ᕿᖏᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᓄᓇᕗᑦ ᒐᕙᒪᖓᓄᑦ, ᓄᓇᓕᒃᐳᑦ ᖃᐅᔨᒪᔭᐅᓕᕐᓂᖅᓴᐅᑎᑦᑐᓐᓇᓛᖅᑕᕗᑦ ᓄᓇᕐᔪᐊᕐᒧᑦ. ᐊᑐᖅᑕᐅᖏᓐᓇᖅᐸᙱᑦᑐᒥᒃ ᐊᑐᖅᓯᓇᓱᒃᐳᒍᑦ ᐊᒃᓱᕈᕈᑕᐅᕙᒃᑐᑦ ᐊᓂᒍᖅᑎᑦᑐᓐᓇᕈᒪᒧᑦ ᐳᓚᕋᕐᓂᓕᕆᓪᓗᓂ ᖁᑦᑎᒃᑐᒥ, ᐅᒃᐱᕈᓱᒃᖢᑕᓗ ᑖᒃᑯᓂᖓ ᐃᑲᔪᖅᑕᐅᔾᔪᑎᒋᔭᑦᑎᓐᓂᑦ, ᐳᓚᕋᖅᑐᓕᕆᓂᖅ ᐃᑲᔪᓛᖅᑐᖅ ᐃᒃᐱᐊᕐᔫᑉ ᑮᓇᐅᔭᑎᒍᑦ ᒪᑭᑉᐹᓪᓕᐅᑎᒃᓴᖓᓄᑦ."
ᖃᐅᔨᒋᐊᕐᕕᒃᓴᑦ
ᖃᐅᔨᒋᐊᒃᑲᓐᓂᕈᒪᒍᕕᑦ, ᑐᓴᖅᑎᓪᓗᒍ:
ᐊᓪᓚᒡᕕᖓᑕ ᓂᕈᐊᖅᑕᐅᓯᒪᔫᑉ ᓇᑦᑏᑉ ᐸᐃᓐᔅ
343-291-2500
ᑲᓇᑕᒥ ᐅᑭᐅᖅᑕᖅᑐᒧᑦ ᐱᕙᓪᓕᐊᓂᕐᒧᑦ ᑐᑦᑕᕐᕕᐅᔪᖅ
ᑯᕋᐃᒡ ᐅᐊᓪᔅ
ᑐᓴᐅᒪᑎᑦᑎᓕᕆᓂᕐᒧᑦ ᐅᖃᐅᔾᔨᒋᐊᖅᑎ, ᓄᓇᕗᒻᒧᑦ
867-975-3722
ᑲᑭᕙᒃ ᑲᑐᔾᔨᖃᑎᒌᖏᑦ
ᒡᓕᓐ ᑲᓯᓐᔅ s
ᐊᖓᔪᖅᑳᖅ, ᐱᔅᓇᓯᓄᑦ ᐱᔨᑦᑎᕋᐅᑏᑦ
867-979-8951
ᓄᓇᕗᑦ ᒐᕙᒪᖓ
ᒫᑎᐅᑦ ᐃᓛᓯᐅᐃᑦᔅ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
ᐊᖓᔪᖅᑳᖅ, ᑐᓴᐅᒪᑎᑦᑎᓕᕆᔨᑦ
867-975-7818
Arctic Bay Adventures
ᔩᓐ ᐅᑖᓄᓪᑦ
ᐊᖓᔪᖅᑳᖅ
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: