ᓂᕈᐊᕐᓗᑎᑦ ᐃᖅᑲᓇᐃᔮᕆᔪᒪᔭᕐᓂᒃ ᐅᑯᓇᓂ ᑲᓇᑕᒥ ᒐᕙᒪᒃᑯᓐᓂᒃ ᓄᓇᕗᒥᑦ

ᐃᓄᒃᓱᒐᐃᑦ ᐃᖅᑲᓇᐃᔮᖅᑖᕋᓲᑎᓂᒃ ᓄᐊᑦᑎᕕᖓᑦ

ᑕᐃᑲᓂ ᐃᓄᒃᓱᒐᐃᑦ ᐃᖅᑲᓇᐃᔮᖅᑖᕋᓲᑎᓂᒃ ᖃᐅᔨᓴᕐᓂᐊᖅᑐᑦ ᓄᐊᑦᑎᓗᑎᒃ ᐊᑐᖅᑕᐅᓂᐊᖅᑐᓂᒃ ᓄᓇᕗᑦ ᐃᓄᖏᓐᓂᒃ ᐱᓕᕆᔪᒪᔪᓂᒃ ᐊᒻᒪᓗ ᐃᖅᑲᓇᐃᔭᖅᑖᕋᓱᒍᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᕗᒻᒥ. ᐃᓄᒃᓱᒐᐃᑦ ᑕᒡᕙᓂ ᐊᒥᓱᑦ ᓴᓇᔭᐅᓯᒪᕗᑦ ᑭᓱᓄᑦ ᐃᓂᖃᕐᕕᒋᔭᖏᓐᓄᑦ ᐃᑲᔪᖅᑐᑦ ᑐᒃᑐᓕᐊᖅᓯᒪᔪᓂᒃ. ᖃᓄᐃᓕᖓᖕᒪᖔᑕ ᐃᓗᓕᖏᑦ ᐃᖅᑲᓇᐃᔭᖅᑖᕋᓱᖃᑦᑕᖅᓯᒪᔪᑦ ᓄᐊᑦᑎᕕᒃ, ᐅᓇ ᑕᐃᒪᓐᓇ ᑕᐃᔭᐅᔪᖅ ᓄᐊᑦᑎᓂᐊᕋᑦᑕ ᐃᓄᖕᓂᒃ ᐃᖅᑲᓇᐃᔭᕈᒪᔪᓂᒃ ᒐᕙᒪᑐᖃᒃᑯᓂ.

ᑕᒪᕐᒥᒃ ᒐᕙᒪᑐᖃᒃᑯᑦ ᐊᐅᓚᑦᓯᕕᖏᑦ ᐊᒻᒪᓗ ᑎᒥᖁᑎᖏᑦ ᓄᓇᕗᒻᒥ, ᐊᔾᔨᐅᓐᖏᑦᑑᔪᒥᒃ, ᐃᓄᖕᓅᖓᔪᒥᒃ-ᐊᔪᖏᑦᑎᐊᖅᑐᓂᒃ ᐃᖅᑲᓇᐃᔭᖅᑎᑦᑎᕙᓪᓕᐊᓂᐊᖅᑐᑦ ᐅᓇ ᓴᓇᕐᕈᑎᒋᓂᐊᖅᑕᕗᑦ ᐃᖅᑲᓇᐃᔭᕐᓂᐊᖅᑐᓄᑦ ᓄᓇᕗᑦ ᐃᓄᖏᑦ ᓇᓂᑐᐃᓐᓇᖅ ᐊᒻᒪᓗ ᑭᓱᓕᕆᔨᑐᐃᓐᓇᑦᓯᐊᓂᒃ.

ᑕᒪᑐᒥᖓ ᖃᐅᔨᑦᑎᐊᑲᓐᓂᕈᒪᒍᕕᑦ ᐅᒡᕙᓘᓐᓃᑦ ᐃᖅᑲᓇᐃᔭᖅᑖᕋᓱᒍᒪᒍᕕᑦ:

• ᐃᓄᒃᓱᒐᐃᑦ ᐃᖅᑲᓇᐃᔭᖅᑖᕋᓲᑎᓂᒃ ᓄᐊᑦᑎᕕᖓᑦ

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔮᖃᖅᑎᑦᑎᓂᖅ

ᐃᓕᓐᓂᐊᕐᕕᐊᓗᒃᒥᑦ ᐊᒻᒪ ᐃᓕᓐᓂᐊᕆᐊᒃᑲᓐᓂᖅᓯᒪᔪᑦ ᐃᓕᓐᓂᐊᖅᑎᐅᔪᑦ ᐱᓇᓱᒍᓐᓇᖅᑐᑦ ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔮᖃᖅᑎᑦᑎᓂᖅᒧᑦ ᐃᖅᑲᓇᐃᔭᖃᑕᐅᔪᓐᓇᕐᓂᐊᖅᒪᑕ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐅᕝᕙᓘᓐᓃᑦ ᐱᓕᕆᕝᕕᒋᔭᐅᔪᓂᒃ ᓄᓇᕗᒥᑦ ᐊᐅᔭᒃᑯᑦ ᐃᓕᓐᓂᐊᕐᓇᐅᙱᓐᓂᖓᓂᒃ.

ᐃᓕᓂᐊᖅᑏ ᐃᖅᑲᓇᐃᔭᖅᑎᑦᑕᐅᓕᖃᑦᑕᖅᑐᑦ ᐱᓕᕆᑎᑦᑎᓂᒃᑯᑦ ᐊᒻᒪᓗ ᐊᔪᕈᓐᓃᖅᓴᖅᑎᑕᐅᔪᓐᓇᖅᖢᑎᒃ, ᐃᓕᓐᓂᐊᖅᑎᑕᐅᔪᓐᓇᖅᖢᑎᒃ ᐊᒻᒪᓗ ᐃᓕᖅᑯᓯᒃᑯᑦ ᖃᓄᐃᓕᐅᕈᑎᓂᒃ ᐃᖅᑲᓇᐃᔮᖃᕐᓂᖏᓐᓂᒃ.

ᐃᓐᓇᑐᖃᓄᑦ ᓄᓇᖃᖅᑐᓄᑦ ᐱᓕᕆᐊᒃᓴᖅ

ᐅᓇ ᐊᔪᕈᓐᓃᖅᓴᕐᓂᖅᒧᑦ ᖃᓄᐃᓕᐅᒐᒃᓴᖅ ᐱᕕᖃᕈᑎᐅᔪᖅ ᑲᓇᑕᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐊᔪᕈᓐᓃᖅᓴᕈᓐᓇᕐᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᖃᐅᔨᒪᔭᖏᓐᓂᒃ ᐃᓐᓇᑐᖃᕐᓂᒃ. ᐅᑯᐊ ᑲᑎᖃᑎᒌᖕᓂᒃᑯᑦ ᐊᔪᕈᓐᓃᖅᓴᐅᑏᑦ ᐱᓕᕆᐊᖃᓗᐊᖅᐸᒃᑐᑦ ᒪᑯᓂᖓ ᕿᓯᖕᓂ ᓴᓇᓂᖅᒥᒃ/ᒥᕐᓱᖅᓂᕐᒧᑦ ᐊᒻᒪ ᑐᒃᑐᐃᑦ ᐊᒥᖏᓐᓂᒃ, ᐃᓄᐃᑦ ᐅᓂᒃᑲᐅᓯᖏᓐᓂᒃ ᐊᒻᒪ ᐅᓂᒃᑳᖅᑐᐊᖏᓐᓂᒃ, ᓄᑕᖃᓂᒃ ᐱᕈᖅᓴᐃᓂᖅᒥᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᐱᒻᒪᕆᒋᔭᖏᓐᓂᒃ, ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐊᒻᒪᓗ ᐊᖑᓇᓱᖃᑦᑕᕐᓂᖅᒥᒃ ᐊᐅᔭᒃᑯ, ᐅᑭᐊᒃᑯᑦ, ᐅᑭᐅᒃᑯᑦ ᐊᒻᒪ ᐅᐱᕐᖔᒃᑯᑦ.

ᒐᕙᒪᓕᒫᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᖃᑎᒌᖕᓂᒃᑯᑦ ᐃᓕᓐᓂᐊᕐᓃᑦ ᐊᒻᒪ ᓄᓇᐃᓐᓇᕐᒥᒃ ᐊᔪᕈᓐᓃᖅᓴᕐᓂᖅ

ᓄᓇᐃᓐᓇᕐᒥᒃ ᖃᓄᐃᓕᐅᖅᑎᑦᑎᕙᒃᑐᑦ ᒐᕙᒪᑐᖃᒃᑯᓐᓄᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᓂᒃ ᓄᓇᕗᒥᑦ. ᐅᑯᐊ ᖃᓄᐃᓕᐅᕈᑎᐅᔪᑦ ᐃᖅᑲᓇᐃᔭᖅᑎᓂᒃ ᐊᔪᕈᓐᓃᖅᓴᕈᑎᖃᖅᑎᑦᑎᒍᑎᐅᔪᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐃᓚᐅᓕᖅᑎᑦᑎᕚᓪᓕᕐᓂᖅᒥᒃ ᐃᓄᐃᑦ ᐃᓅᖃᑎᒌᖕᓂᕐᒧᑦ ᐱᒻᒪᕆᒋᔭᖏᓐᓂᒃ ᐃᖅᑲᓇᐃᔭᖅᕕᒃᒥᑦ.

ᕿᑦᑐᐊᖅ ᐱᓕᕆᖃᑎᒌᒍᑎ

ᐅᓇ ᕿᑦᑐᐊᖅ ᐱᓕᕆᖃᑎᒌᒍᑎ ᒐᕙᒪᓕᒫᒥᒃ ᐃᖅᑲᓇᐃᔭᖃᑎᒌᓂᒃ ᐃᑲᔪᖅᑐᐃᖃᑦᑕᐅᑎᓂᕐᒧᑦ ᐱᓕᕆᖃᑎᒌᖑᔪᑦ ᐊᑐᐃᓐᓇᐅᓪᓗᑎᒃ ᑕᒪᐃᓐᓄᑦ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᑲᓇᑕᒥ ᒐᕙᒪᒃᑯᓐᓄᑦ ᓄᓇᕗᒥᑦ. ᐅᑯᐊ ᐱᓕᕆᖃᑎᒌᑦ ᑲᑎᖃᑦᑕᖅᑐᑦ ᐊᒻᒪᓗ ᐅᓂᒃᑳᕈᓘᔭᖅᐸᒃᖢᑎᒃ, ᖃᓄᐃᓕᐅᕈᓯᖏᓐᓂᒃ ᐊᒻᒪᓗ ᐃᓱᒪᓕᐅᕆᕙᒃᖢᑎᒃ ᐃᑲᔪᕈᑎᐅᔪᓐᓇᖅᑐᓂᒃ ᑲᓇᑕᒥ ᒐᕙᒪᒃᑯᑦ ᐃᖅᑲᓇᐃᔭᖅᕕᖏᓐᓂᒃ ᒪᓕᒃᑲᓐᓂᕈᓐᓇᖁᓪᓗᒍ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐊᑐᖅᐸᒃᑕᖏᓐᓂᒃ. ᐅᑯᐊ ᑲᑎᒪᓂᐅᔪᑦ ᖃᐅᔨᒪᔪᓂᒃ ᖃᐃᖁᔨᕙᒃᖢᑎᒃ, ᐅᖃᓪᓚᒃᑎᐅᓂᐊᖅᑐᓂᒃ, ᐃᓄᐃᑦ ᐃᓕᖅᑯᓯᖓᒍᑦ ᖃᓄᐃᓕᐅᕈᑎᓂᒃ ᐊᒻᒪᓗ ᐃᓄᒃᓯᐅᑎᓂᒃ ᓂᕆᕙᒃᖢᑎᒃ.

ᖃᕋᓴᐅᔭᒃᑯᑦ ᖃᓄᐃᓕᐅᕈᑎᓄᑦ ᐊᔪᕐᓇᙱᒻᒥᔪᑦ ᓄᓇᕗᒥᑦ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᐅᐸᒍᓐᓇᙱᑦᑐᓄᑦ, ᐃᓚᖃᖅᖢᓂ ᒪᑯᓄᖓ ᐃᖃᓗᐃᑦ ᓯᓚᑖᓃᑦᑐᓄᑦ.

ᐅᓇ ᐅᖃᐅᓯᖅ ᐅᕙᙶᖅᑐᖅ ᖁᓪᓕᖅᒧᑦ ᕿᑦᑐᐊᓂᒃ ᐱᖓᓱᓂᒃ. ᓯᕗᓂᐊᒍᑦ ᖃᐅᔨᒪᔭᐅᓂᑯ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᐱᓕᕆᖃᑎᒌᒍᑎᒥᒃ, ᐅᓇ ᓄᑖᙳᕆᐊᖅᑕᐅᓯᒪᔪᖅ ᐃᓄᒃᑎᑐᑦ ᐊᑎᖓ ᓂᕈᐊᕆᔭᐅᓚᐅᖅᓯᒪᔪᖅ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᓇᓗᓇᐃᖅᓯᒪᒍᑎᐅᓪᓗᓂ ᐱᒻᒪᕆᐅᓂᖓᓂᒃ ᐃᖅᑲᓇᐃᔭᖃᑎᒌᑦ ᐃᑲᔪᖃᑦᑕᐅᑎᔭᕆᐊᖃᕐᓂᖏᓐᓂᒃ.

ᐃᓅᓯᓕᕆᓂᕐᒧᑦ ᐱᔨᑦᑎᕋᐅᑎ

ᓄᓇᕗᒥᑦ ᐃᓄᐃᑦ ᐃᖅᑲᓇᐃᔭᖅᑐᑦ ᑲᓇᑕᒥ ᒐᕙᒪᒃᑯᓐᓄᑦ ᓄᓇᕗᒥᑦ ᐃᓂᒃᓴᓕᐅᕈᓐᓇᖅᑐᑦ ᐃᓅᓯᓕᕆᔨᒧᑦ ᑕᖅᑭᖅ ᐊᑕᐅᓰᖅᐸᒡᓗᓂᐅᒃ. ᐃᓂᒃᓴᓕᐅᖃᑦᑕᖅᑐᑦ ᓯᕗᓪᓕᖅ ᓯᕗᓪᓕᐅᑎᑕᐅᓗᓂ ᐊᒻᒪᓗ ᐅᐸᖃᑎᖃᕐᓂᒃᑯᑦ ᐊᒻᒪᓗ ᐅᖄᓚᐅᑎᑎᒍᑦ.

ᐊᔪᕈᓐᓃᖅᓴᕐᓂᖅ ᑐᕌᖓᔪᖅ ᐃᓱᒪᒧᑦ, ᐅᔾᔨᕈᓱᓕᕐᓂᕐᒥᒃ ᐃᒻᒥᓂᒃ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐋᓐᓂᐊᖅᑐᓕᕆᓂᖅᒥᒃ

ᐱᓕᒻᒪᒃᓴᐃᕕᒃ ᑐᑭᒧᐊᖅᑎᑦᑎᔨᐅᕙᒃᑐᖅ ᒐᕙᒪᓕᒫᒃᑯᑦ ᖃᓄᐃᓕᐅᕈᑎᒃᓴᓂᒃ ᐊᒻᒪ ᐱᓕᕆᐊᒃᓴᓂᒃ ᐃᖅᑲᓇᐃᔮᒥᒃ ᖃᓄᐃᑦᑕᐃᓕᓂᕐᒨᖓᔪᓂᒃ ᐊᒻᒪᓗ ᐱᒋᐊᖅᑎᑕᐅᓯᒪᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.

ᓄᓇᕗᒻᒦᓐᓂᕐᒧᑦ, ᕿᑲᕈᓐᓇᐅᑎᒥᒃ ᐊᐅᓪᓚᕈᑎᒃᓴᓄᑦ ᐃᑲᔪᕈᑎ ᐊᒻᒪᓗ ᓄᒃᑎᖅᑎᑕᐅᔾᔪᑎᓂᒃ

ᓄᓇᕗᒻᒦᓐᓂᕐᒧᑦ ᐃᑲᔫᑎᒃᓴᖅ ᐋᖅᑭᒃᓯᒪᔪᖅ ᐃᓅᓇᓱᖕᓂᕐᒧᑦ ᐊᒻᒪ ᐃᖅᑲᓇᐃᔭᕐᓂᖅᒧᑦ ᐃᓄᐃᓪᓚᓂ ᐊᑭᑐᓂᖅᓴᐅᓂᖏᓐᓄᑦ ᐃᓚᖃᖅᖢᓂ ᑕᒪᐃᓐᓂᓕᒫᖅ ᓄᓇᕗᒥᑦ ᓄᓇᓕᖕᓂᒃ. ᐊᕐᕌᒍᒥ ᑲᑎᖢᑎᒃ ᐋᖅᑭᒃᑕᐅᕙᒃᑐᖅ ᐊᔾᔨᒌᙱᑦᑑᑎᓄᑦ ᐱᔾᔪᑎᓄᑦ ᐃᓚᖃᖅᖢᓂ ᐃᓄᒋᐊᖕᓂᖓᓄᑦ, ᓯᓚ ᖃᓄᐃᓐᓂᖓᓄᑦ ᐊᒻᒪ ᐊᐅᓪᓚᕈᑎᒃᓴᑦ ᐊᑐᐃᓐᓇᐅᕙᖕᓂᖏᓐᓄᑦ ᐅᕝᕙᓘᓐᓃᑦ ᖃᖓᑐᐃᓐᓇᒃᑯᑦ ᐊᖅᑯᑎᖃᕈᓐᓇᕐᓂᕐᒧᑦ. ᐊᒻᒪᑦᑕᐅᖅ ᐃᓚᖃᕈᑎᖃᓗᐊᕐᒥᔪᖅ ᑖᓐᓇ ᐃᖅᑲᓇᐃᔭᖅᑎ ᖃᔅᓯᓂ ᐸᖅᑭᔭᖃᕐᒪᖔᑦ ᐃᒡᓗᖓᓂᒃ.

ᕿᑲᕈᓐᓇᐅᑎᒥᒃ ᐊᐅᓪᓚᕈᑎᒃᓴᓄᑦ ᐃᑲᔪᕈᑎ (VTA) ᐋᖅᑭᒃᓯᒪᔪᖅ ᐃᓄᒃ ᐊᑕᐅᓯᖅᒨᖓᓪᓗᓂ ᐊᒻᒪᓗ ᐅᑯᓄᖓ ᑐᕌᖓᓪᓗᓂ ᐃᖅᑲᓇᐃᔭᖅᑎᒧᑦ ᐸᖅᑭᔭᖏᓐᓄᓪᓗ ᐊᕐᕌᒍᓕᖕᓂ 2 ᐅᖓᑖᓂᒃ. ᐃᑲᔪᕈᑎᒃᓴᖃᖅᑎᑦᑎᔪᓪᓕ ᐊᑭᓕᐅᑎᒃᓴᓄᑦ ᐃᑲᔪᕋᓱᒃᖢᑎᒃ ᐊᐅᓪᓚᖁᑎᓄᑦ ᖃᖓᑦᑕᐅᑎᓄᑦ, ᑐᔪᕐᒥᕕᒃᓄᑦ, ᓄᓇᓯᐅᑎᒥ ᐊᑐᖅᑐᐊᕐᓂᖅᒧᑦ ᐊᒻᒪ ᐅᖅᓱᐊᓗᖕᒧᑦ ᐅᒥᐊᓄᑦ ᐊᒻᒪ ᐊᖑᓇᓱᒍᑎᓄᑦ. ᓄᓇᕗᒥᑦ ᕿᑲᕈᓐᓇᐅᑎᒥᒃ ᐊᐅᓪᓚᕈᑎᒃᓴᓄᑦ ᐃᑲᔪᕈᑎ (VTA) ᐊᑭᓕᐅᑎᐅᕙᒃᑐᖅ ᐊᕐᕌᒍ ᒪᕐᕈᐃᖅᖢᒍ ᐃᖅᑲᓇᐃᔭᖅᑎᒧᑦ. ᐊᑭᓕᐅᑎᐅᕙᒃᑐᑦ ᐊᓯᙳᑐᐃᓐᓇᕆᐊᓖᑦ.

ᐃᖅᑲᓇᐃᔭᖅᑎᐅᔪᑦ ᐊᓯᐊᓄᑦ ᓅᑦᑕᕆᐊᖃᖅᑐᑦ ᐃᖅᑲᓇᐃᔮᒧᑦ (ᐃᓚᒋᓪᓗᒍ ᐊᓯᐊᓄᑦ ᓄᓇᓕᖕᒧᑦ) ᐱᑎᑕᐅᔪᓐᓇᖅᑐᑦ ᓅᓐᓂᖅᒧᑦ ᐃᑲᔪᕈᑎᒃᓴᒥᒃ, ᑖᓐᓇᓗ ᐃᑲᔪᕈᑎ ᑮᓇᐅᔭᑎᒍᑦ ᐊᒻᒪ ᐃᓂᒋᓂᐊᖅᑕᒨᖓᓪᓗᓂ ᓄᒃᑎᖅᓂᕐᒧᑦ.

ᖃᐅᔨᒋᐊᒃᑲᓐᓂᕈᒪᒍᕕᑦ ᓄᓇᕗᒻᒦᓐᓂᕐᒧᑦ ᐃᑲᔫᑎᒃᓴᒥᒃ, ᒐᕙᒪᑐᖃᒃᑯᑦ ᐃᒡᓗᖓᓂᒃ ᐊᒻᒪᓗ ᕿᑲᕈᓐᓇᐅᑎᓂᒃ:

• ᓄᓇᕗᒥᑦ ᐃᖅᑲᓇᐃᔮᖃᕐᓂᖅ ᐊᒻᒪ ᒐᕙᒪᒃᑯᑦ ᐃᒡᓗᖃᕐᓂᖅᒧᑦ ᑐᑭᒧᐊᕈᑎᖏᑦ

ᐊᑭᓕᖅᑕᐅᔾᔪᑏᑦ

ᑲᓇᑕᒥ ᒐᕙᒪᒃᑯᑦ ᐊᑭᓕᐅᑎᒃᓴᓂᒃ ᐋᖅᑭᒃᓱᐃᕙᒃᑐᑦ ᐃᖅᑲᓇᐃᔭᖅᑎᓄᑦ ᑭᒃᑯᓕᒫᓄᑦ ᐊᐅᓚᑦᑎᓂᒃᑯᑦ ᐃᓚᒋᔭᐅᓪᓗᓂ ᐊᑐᕆᐊᓕᖕᓂᒃ ᐊᒻᒪ ᒪᓕᒋᐊᓕᖕᓂᒃ ᐃᖅᑲᓇᐃᔭᕐᓂᖅᒧᑦ. ᐅᑯᐊ ᐊᑭᓕᖅᓱᖅᑕᐅᒍᑎᑦ ᒪᓕᒃᓯᒪᔪᑦ ᐊᔾᒡᒌᙱᑦᑑᑎᓄᑦ ᐃᓂᒋᔭᐅᕙᒃᑐᑦ ᓇᓗᓇᐃᒃᑯᑎᖏᑦᑎᒍᑦ, ᐊᒻᒪᓗ ᐅᓄᕐᓯᕚᓪᓕᖅᑕᐅᔪᓐᓇᖅᖢᓂ ᐊᕐᕌᒍᑕᒫᓐ ᒪᓕᒡᓗᑎᒃ ᐱᓕᕆᑦᑎᐊᑎᒋᓂᖅᒧᑦ.

ᑐᓴᕆᐊᒃᑲᓐᓂᕈᒪᒍᕕᑦ:

• ᐊᑭᓕᐅᑎᑦᓴᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᐃᖅᑲᓇᐃᔭᖅᑎᓄᑦ

ᒐᕙᑐᖃᒃᑯᑦ ᐃᒡᓗᖏᑦ

ᐅᓄᕐᓂᖅᓴᐃᑦ ᑲᓇᑕᒥ ᒐᕙᒪᒃᑯᓐᓄᑦ ᐃᖅᑲᓇᐃᔮᒃᓴᑦ ᓄᓇᕗᒥᑦ ᒐᕙᒪᑐᖃᒃᑯᑦ ᐃᒡᓗᖏᓐᓂᒃ ᐊᑐᖅᑐᐊᖅᑎᑦᑎᔪᓐᓇᖅᑐᑦ ᐊᑭᓕᖅᓱᐃᓗᑎᒃ. ᐃᖅᑲᓇᐃᔭᖅᑎᐅᔪᑦ ᐊᑐᖅᑐᐊᖅᑐᑦ ᒐᕙᒪᑐᖃᒃᑯᑦ ᐃᒡᓗᖁᑎᖓᓂᒃ ᐊᑐᕈᓐᓴᖅᑎᑕᐅᔪᑦ ᒐᕙᒪᑐᖃᒃᑯᑦ ᐃᒡᓘᑉ ᐱᖁᑎᖏᓐᓂᒃ ᐊᑐᕈᒪᒍᑎᒃ, ᐊᒻᒪᓗ ᐱᔨᑦᑎᕋᑎᑕᖃᖅᖢᓂ ᖃᖓᓕᒫᖅ 24/7 ᐃᒡᓗᒋᔭᖓᓄᑦ ᓈᒻᒪᙱᓕᐅᕈᑎᖃᕈᑎᒃ. ᐃᖅᑲᓇᐃᔭᖅᑎᐅᔪᑦ ᓇᖕᒥᓂᖅ ᐃᓂᖃᖅᑎᑦᑐᑦ ᐊᒻᒪ ᐊᑐᖅᑐᐊᖅᓂᕐᒧᑦ ᐃᑲᔫᖅᑕᐅᔪᓐᓇᖅᑐᑦ.

ᐋᓐᓂᐊᖃᖅᑕᐃᓕᓂᖅᒧᑦ ᐊᒻᒪ ᑭᒍᑎᓕᕆᔭᐅᓂᖅ

ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᐋᓐᓂᐊᖃᖅᑕᐃᓕᓂᖅᒧᑦ ᐸᕐᓇᐅᑎ ᐊᑐᖅᑕᐅᔪᓐᓇᖅᑐᖅ ᐋᓐᓂᐊᖃᖅᑕᐃᓕᓂᖅᒧᑦ ᒐᕙᒪᑐᖃᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐸᖅᑭᔭᖏᓐᓄᑦ. ᐅᓇ ᐋᖅᑭᒃᓯᒪᔪᖅ ᐃᑲᔪᕈᑎᐅᓇᓱᒃᖢᓂ ᐳᕌᕕᓐᓯᑎᒍᑦ ᐋᓐᓂᐊᖃᖅᑕᐃᓕᓂᕐᒧᑦ ᓇᐅᑦᑎᒃᑯᒫᓂᒃ.

ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᑭᒍᑎᓕᕆᓂᖅᒧᑦ ᐸᕐᓇᐅᑎ ᐊᑐᖅᑕᐅᕙᒃᑐᖅ ᐃᓚᒋᔭᐅᔪᓄᑦ ᐸᖅᑭᔭᖏᓐᓄᓪᓗ ᐱᓕᕆᐊᖑᔪᓐᓴᕐᓗᑎᒃ ᑎᑭᓯᒪᓂᖓ ᐃᓱᖃᖅᖢᓂ, ᒪᑯᓄᖓ ᑭᒍᑎᓕᕆᔭᐅᓂᕐᒧᑦ ᐱᔨᑦᑎᕋᖅᑎᐅᓂᖅᒧᑦ ᐊᒻᒪᓗ ᐳᕌᕕᓐᓯᓄᑦ ᓇᐅᑦᑎᐅᒃᑯᒫᓄᑦ ᐃᓚᒋᔭᐅᙱᑦᑐᓂᒃ.

ᑐᓴᕆᐊᒃᑲᓐᓂᕈᒪᒍᕕᑦ:

• ᑭᒃᑯᓕᒫᓄᑦ ᐱᔨᑦᑎᕋᕐᓂᖅᒧᑦ ᐃᓄᒋᐊᓄᑦ ᓇᐅᑦᑎᐅᒃᑯᒫᒃᓴᓄᑦ ᐸᕐᓇᐅᑎᑦ

ᐃᓱᒪᖅᓱᕐᓇᖅᑐᖅ ᓄᖅᑲᖓᔪᒪᓗᓂ, ᕿᑲᕈᒪᓗᓂ ᐊᒻᒪᓗ ᑲᓇᑕᒥ ᑭᑲᕐᓇᐅᔪᓂᒃ

ᒐᕙᒪᑐᖃᒃᑯᑦ ᐃᖅᑲᓇᐃᔭᖅᑎᖏᑦ ᐱᔪᓐᓇᖅᑎᑕᐅᔪᑦ ᒥᑭᓛᒃᑯᑦ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᕿᑲᕈᓐᓇᖅᖢᑎᒃ ᐊᕐᕌᒍᒥ ᐃᖅᑲᓇᐃᔮᓪᓚᓚᐅᖅᑎᓪᓗᒍ ᐊᕐᕌᒍᓕᒫᖅ ᐊᑕᐅᓯᑦᑕᐃᓐᓇᖅᒥᒃ ᐃᖅᑲᓇᐃᔮᒥᒃ. ᐊᕐᕌᒍ ᑕᓪᓕᒪᑦ ᑐᒡᓕᕇᓂᒃ ᐃᖅᑲᓇᐃᔭᖅᓯᒪᓕᕈᓂ ᑕᕝᕙᓂᑦᑕᐃᓐᓇᖅ ᐃᖅᑲᓇᐃᔭᖅᕕᒃᒥᑦ, ᑕᒪᓐᓇ ᐊᖏᒡᓕᕚᓪᓕᕋᔭᖅᑐᖅ ᐱᓇᓱᐊᕈᓯᕐᓄᑦ ᐱᖓᓱᓄᑦ ᕿᑲᕈᓐᓇᕐᓯᓂᕐᒧᑦ.

ᐊᔾᔨᒌᙱᑦᑑᑎᐅᖕᒪᑕ ᓄᖅᑲᖓᔪᒪᒍᑎᒃᓴᑦ ᐊᑐᕈᓐᓇᖅᑕᑎᑦ ᐃᖅᑲᓇᐃᔭᖅᑎᐅᓗᑎᒃ ᒐᕙᒪᑐᖃᒃᑯᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓂᒃ, ᐃᓚᖃᖅᖢᓂ ᐊᖓᔪᖅᑳᖑᓵᕐᓂᖅᒧᑦ ᓄᖅᑲᖓᓚᐅᑲᖕᓂᖅ, ᐃᓚᒋᔭᒥ ᐋᓐᓂᖅᓱᖅᑕᐅᔪᖃᓗᐊᕐᓂᖅᐸᑦ, ᐋᓐᓂᐊᕐᓂᖅᒧᑦ, ᓄᓇᖃᖅᑳᖅᑑᓂᖅᒧᑦ ᐊᑐᖅᑕᐅᔭᕆᐊᓕᖕᓄᑦ ᐊᒻᒪ ᐊᓯᖏᓐᓄᑦ.

ᑐᓴᕆᐊᒃᑲᓐᓂᕈᒪᒍᕕᑦ:

• ᕿᑲᕐᓂᖅ ᐊᒻᒪ ᑲᓇᑕᒥ ᕿᑲᕐᓇᐃᑦ
• ᖃᓄᐃᑦᑑᓂᖏᑦ ᐃᖅᑲᓇᐃᔭᙱᓚᐅᑲᒍᑎᐅᔪᑦ

ᑭᒃᑯᓕᒫᓂᒃ ᐱᔨᑦᑎᕋᐅᑎᓄᑦ ᐃᑦᑐᖅᓯᐅᑎᑖᕈᑎᒃᓴᓄᑦ ᐸᕐᓇᐅᑎ

ᑲᓇᑕᒥ ᒐᕙᒪᒃᑯᑦ ᒪᓂᒻᒪᐃᓯᒪᖕᒪᑕ ᐲᖅᑕᐅᔪᒃᓴᓂᒃ ᓇᓗᓇᐃᖅᓯᒪᔪᓂᒃ ᐃᑦᑐᖅᓯᐅᑎᑖᕈᑎᒃᓴᓄᑦ ᐃᖅᑲᓇᐃᔭᖅᑎᓄᑦ. ᐃᑲᔫᑎᒃᓴᓄᑦ ᐸᕐᓇᐅᑎ ᐋᖅᑭᒃᓯᒪᔪᖅ ᐃᑦᑐᖅᓯᐅᑎᑖᕈᑎᒃᓴᐅᓗᓂ. ᓇᓗᓇᐃᖅᓯᒪᓪᓚᕆᒃᑐᖅ ᐃᑦᑐᖅᓯᐅᑎᒃᓴᐅᓂᖓᓄᑦ ᐸᕐᓇᐅᑎ, ᐃᑲᔫᑎᒃᓴᑦ ᒪᓕᒃᓯᒪᓪᓗᑎᒃ ᐃᓚᒋᔭᐅᔫᑉ ᑮᓇᐅᔭᓕᐊᕆᕙᒃᑕᖓᓂᒃ ᐊᒻᒪᓗ ᐊᕐᕌᒍᓂᒃ ᐲᔭᐃᕝᕕᐅᖃᑦᑕᖅᓯᒪᓂᕐᒧᑦ. ᐱᖓᓲᖕᒪᑕ ᐱᓪᓗᐊᑕᕆᔭᐅᔪᑦ ᒐᕙᒪᑐᖃᒃᑯᓐᓂᒃ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᓂᕐᒧᑦ ᐃᑦᑐᖅᓯᐅᑎᑖᕈᑎᑦ:

• ᑭᒃᑯᓕᒫᓂᒃ ᐱᔨᑦᑎᕋᐅᑎᓄᑦ ᐃᑦᑐᖅᓯᐅᑎᑖᕈᑎᒃᓴᓄᑦ ᐸᕐᓇᐅᑎ
• ᑲᓇᑕᒥ ᐅᓇᑕᖅᑐᒃᓴᓄᑦ-ᐅᓇᑕᖅᑐᒃᓴᓄᑦ ᐃᑦᑐᖅᓯᐅᑎᑖᕆᔭᐅᕙᒃᑐᖅ
• ᕈᐃᐅᓪ ᑲᓃᑎᐊᓐ ᒪᐅᓐᑕᑦ ᐸᓖᓯᒃᑯᑦ ᐃᑦᑐᖅᓯᐅᑎᑖᕆᔭᐅᕙᒃᑐᖅ

ᑐᓴᕆᐊᒃᑲᓐᓂᕈᒪᒍᕕᑦ:

• ᑲᓇᑕᒥ ᐃᑦᑐᖅᓯᐅᑎᑖᕈᑎᒃᓴᓄᑦ ᐸᕐᓇᐅᑎ (CPP) ᐃᑦᑐᖅᓯᐅᑎᑖᕈᑎᒃᓴᓂᒃ: ᕿᒥᕐᕈᓂᖅ

ᑲᓇᑕᒥ ᐅᑭᐅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ

ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ (ᑳᓐᓄᐊ, CanNor) ᐱᓕᕆᖃᑎᖃᖃᑦᑕᖅᑐᑦ ᐅᑭᐅᕐᑕᖅᑐᕐᒥᐅᓂᒃ ᐊᒻᒪ ᓄᓇᖃᖅᑳᖅᑐᓂᒃ, ᓄᓇᓕᖕᓂᑦ, ᓇᖕᒥᓂᖅ ᐱᓕᕆᐊᖑᔪᓂᒃ, ᑲᑐᔾᔨᖃᑎᒌᓂᒃ, ᐊᓯᖏᓐᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᒻᒪᓗ ᒐᕙᒪᐅᔪᑦ ᑭᒃᑯᓕᒫᓅᖓᔪᒥᒃ ᐊᒻᒪ ᐱᐅᓪᓚᕆᒃᑐᒥᒃ ᑮᓇᐅᔭᓕᐅᕈᑎᒃᓴᓂᒃ ᐊᑯᓂᕈᓗᒃ ᐊᑐᖅᑕᐅᔪᓐᓇᕋᔭᖅᑐᓂᒃ ᐊᒻᒪ ᐱᕙᓪᓕᐊᒍᑎᐅᔪᓐᓇᕋᔭᖅᑐᓂᒃ ᓄᓇᕗᒥᑦ, ᓄᓇᑦᓯᐊᕐᒥᒃ ᐊᒻᒪ ᔫᑳᓐᒥᒃ.

ᓄᓇᕗᒧᑦ, ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ (ᑳᓐᓄᐊ, CanNor):

• ᐋᖅᑭᒃᓱᐃᕙᓪᓕᐊᖃᑦᑕᖅᑐᑦ ᐊᒻᒪ ᐊᑐᓕᖅᑎᑦᑎᕙᒃᖢᑎᒃ ᐱᓕᕆᐊᒃᓴᓂᒃ ᐊᒻᒪ ᖃᓄᐃᓕᐅᕈᑎᒃᓴᓂᒃ ᐃᑲᔪᕈᑎᐅᔪᓐᓇᖅᑐᓂᒃ ᐱᕙᓪᓕᐊᓂᖅᒧᑦ ᐱᕈᖅᐸᓪᓕᐊᓂᖅᒧᑦ ᐊᒻᒪ ᐱᕙᓪᓕᐊᓂᖅᒥᒃ ᓄᓇᕗᒥᑦ ᓇᖕᒥᓂᕆᔭᐅᔪᓂᒃ ᐊᒻᒪ ᑲᑐᔾᔨᖃᑎᒌᓂᒃ;
• ᑐᑭᒧᐊᖅᑎᑦᑎᕙᒃᑐᑦ ᖃᓄᐃᓕᐅᕈᑎᐅᔪᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᓯᖏᓐᓂᒃ (ᓲᕐᓗ ᒐᕙᒪᑐᖃᒃᑯᓐᓄᑦ ᐱᖁᔭᓕᐅᖅᑏᑦ ᐃᓚᐅᓗᑎᒃ ᐊᖏᔪᓂᒃ ᐱᓕᕆᐊᒃᓴᓄᑦ ᐱᕙᓪᓕᐊᓂᖅᒥᒃ); ᐊᒻᒪᓗ
• ᑐᙵᓱᒃᑎᑦᑎᔨᐅᔪᑦ ᐱᓕᒻᒪᒃᓴᐃᕕᒃᒥᑦ (ᒐᕙᒪᑐᖃᒃᑯᑦ ᐃᓄᖕᓂᒃ ᐃᖅᑲᓇᐃᔮᒃᓴᓄᑦ ᐊᔪᕈᓐᓃᖅᓴᖅᑎᑦᑎᓂᖅ ᓄᓇᕗᒥᑦ).

ᑐᓴᕆᐊᒃᑲᓐᓂᕈᒪᒍᕕᑦ:

• ᑲᓇᑕᒥ ᐅᑭᐅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ

ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᓕᕆᔨᒃᑯᑦ ᑲᓇᑕᒥ

ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᓕᕆᔨᒃᑯᑦ ᑲᓇᑕᒥ (CIRNAC), ᐱᓕᕆᐊᖃᓗᐊᖅᑐᖅ ᓄᑖᙳᕆᐊᖅᑎᑦᑎᕙᖕᓂᖅᒥᒃ ᓄᓇᖃᖅᑳᖅᑐᑦ ᐱᓕᕆᖃᑎᒌᖕᓂᖏᓐᓄᑦ, ᐃᓄᐃᑦ ᒐᕙᒪᑐᖃᒃᑯᓪᓗ, ᒐᕙᒪᐅᖃᑎᒌᑦ ᐱᓕᕆᖃᑎᒌᖕᓂᖏᑦ ᑲᓇᑕᓗᑦ ᐊᒻᒪ ᓄᓇᖃᖅᑳᖅᑐᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ.

ᓄᓇᕗᒥᑦ ᐊᕕᒃᑐᖅᓯᒪᓂᒃᑯᑦ ᑎᑎᕋᖅᕕᒃ ᐱᓕᕆᐊᖃᓗᐊᖅᑐᑦ ᐆᒥᖓ:

• ᐊᕙᑎᒋᔭᒥᒃ ᓴᐳᔾᔨᓯᒪᓂᖅᒥᒃ
• ᓄᓇᒧᑦ ᐊᒻᒪ ᐃᒪᕐᒧᑦ ᐊᐅᓚᑦᑎᔾᔪᑎᓂᒃ
• ᐊᑐᒃᑲᓐᓂᕈᓐᓇᖅᑐᓕᕆᓂᖅᒥᒃ ᐊᒻᒪ ᐊᐅᓚᑕᐅᓂᖏᓐᓂᒃ
• ᓄᓇᑖᕐᓂᖅᒧᑦ ᐊᑐᓕᖅᑎᑦᑎᓂᖅᒥᒃ

ᑐᓴᕆᐊᒃᑲᓐᓂᕈᒪᒍᕕᑦ:

• ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᓕᕆᔨᒃᑯᑦ ᑲᓇᑕᒥ – ᓄᓇᕗᒧᑦ

ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᐊᒻᒪᓗ ᑲᓇᑕᐅᑉ ᓯᒡᔭᖏᓐᓂᒃ ᓴᐳᓐᓂᐊᖅᑎᒃᑯᑦ

ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ (DFO) ᐊᐅᓚᑦᑎᕙᒃᑐᑦ ᑲᓇᑕᒥ ᐃᖃᓗᓕᕆᓂᕐᒥᒃ ᐊᒻᒪᓗ ᐊᐅᓚᑦᑎᔨᐅᓪᓗᑎᒃ ᐃᒪᕐᓂᒃ ᓴᐳᔾᔨᓯᒪᓂᖅᒥᒃ.

ᐱᓕᕆᕝᕕᐅᔫᑉ ᐱᓕᕆᐊᒃᓴᓪᓗᐊᑕᖏᑦ ᕿᑎᕐᒥᐅᓂᒃ ᐊᒻᒪ ᐅᑭᐅᕐᑕᖅᑐᕐᒥ ᐃᒪᐃᑦᑐᑦ:

• ᐃᒪᕐᓂᒃ ᑕᕆᐅᖑᙱᑦᑐᓂᒃ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔨᓴᕐᓂᖅᒧᑦ ᐊᐅᓚᑦᑎᓂᖅ ᐊᒻᒪ ᑕᒫᓂᕐᒥᐅᑕᐅᙱᑦᑐᓂᒃ ᑕᕆᐅᕐᒥᐅᑕᓂᒃ ᐱᑕᖃᖅᑎᑦᑎᑦᑕᐃᓕᓂᖅᒧᑦ
• ᐊᐅᓚᑦᑎᓂᖅ ᐃᖃᓗᓕᕆᕝᕕᐅᔪᓂᒃ ᐊᓯᐅᑎᑦᑎᑦᑕᐃᓕᓂᕐᒥᒃ ᐊᒻᒪ ᓴᐳᔾᔨᓯᒪᓂᕐᒥᒃ ᐃᒪᕐᓂ ᑕᕆᐅᖑᙱᑦᑐᓂᒃ ᐊᒻᒪᓗ ᐅᑭᐅᕐᑕᖅᑐᕐᒥ ᑕᕆᐅᕐᒥᐅᑕᓂᒃ ᐃᓂᖏᓐᓂᒡᓗ
• ᐊᐅᓚᑦᑎᓂᖅ ᒐᕙᒪᑐᖃᒃᑯᑦ ᓇᖕᒥᓂᖏᓐᓂᒃ ᑐᓚᒃᑕᖅᕕᒃᓂᒃ ᒥᑭᑦᑐᓄᑦ ᐅᒥᐊᓄᑦ

ᑲᓇᑕᐅᑉ ᓯᒡᔭᖏᓐᓂᒃ ᓴᐳᓐᓂᐊᖅᑎᒃᑯᑦ (CCG) ᑲᒪᒋᔭᖃᖅᑐᑦ ᐱᔨᑦᑎᕋᐅᑎᓂᒃ ᐊᒻᒪ ᐱᓕᕆᐊᒃᓴᓂᒃ ᐃᑲᔪᕈᑎᓂᒃ ᐅᓗᕆᐊᓇᙱᑦᑐᒦᑎᑦᑎᓂᖅᒧᑦ, ᓴᐳᔾᔭᐅᓯᒪᓂᕐᒧᑦ ᐊᒻᒪ ᐊᑐᐃᓐᓇᐅᑎᑦᑎᓂᖅᒥᒃ ᑲᓇᑕᐅᑉ ᐃᒪᖏᓐᓂᒃ.

2018-ᒥᑦ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ (DFO) ᐊᒻᒪᓗ ᑲᓇᑕᐅᑉ ᓯᒡᔭᖏᓐᓂᒃ ᓴᐳᓐᓂᐊᖅᑎᒃᑯᑦ (CCG) ᓴᖅᑭᑎᑦᑎᓚᐅᖅᑐᑦ ᓄᑖᓂᒃ ᐊᕕᒃᑐᖅᓯᒪᓂᕐᒨᖓᔪᓂᒃ ᐅᑭᐅᕐᑕᖅᑐᕐᒧᑦ. ᐊᕕᒃᑐᖅᓯᒪᓂᖅ ᐅᑯᖓᖑᔪᑦ ᑎᓴᒪᑦ ᐊᖕᒃᓯᒪᔪᑦ ᐃᓄᐃᑦ ᓄᓇᖓᓂᒃ, ᐊᖓᔪᖅᑳᖃᖅᕕᖃᖅᖢᑎᒃ ᑲᖏᖅᖠᓂᖅᒥᒃ.

ᑐᓴᕆᐊᒃᑲᓐᓂᕈᒪᒍᕕᑦ:

• ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᑲᓇᑕᒥ ᕿᑎᕐᒥᐅᓂᒃ ᐊᒻᒪ ᐅᑭᐅᕐᑕᖅᑐᕐᒥᑦ

ᐊᕙᑎᓕᕆᓂᕐᒥᑦ ᐊᒻᒪ ᓯᓚᒥᒃ ᐊᓯᔾᔨᖅᐸᓪᓕᐊᓂᕐᒧᑦ ᑲᓇᑕᒥ

ᐊᕙᑎᓕᕆᓂᕐᒥᑦ ᐊᒻᒪ ᓯᓚᒥᒃ ᐊᓯᔾᔨᖅᐸᓪᓕᐊᓂᕐᒧᑦ ᑲᓇᑕᒥ (ECCC) ᑐᓴᖅᑎᑦᑎᔪᑦ ᑲᓇᑕᒥᐅᑕᓂᒃ ᓴᐳᔾᔨᓯᒪᓂᕐᒥᒃ ᐊᒻᒪ ᐊᓯᐅᑎᑦᑎᑦᑕᐃᓕᓂᖅᒥᒃ ᐃᓕᖅᑯᓯᑐᖃᑦᑎᒍᑦ ᐱᖁᑎᑦᑎᓂᒃ, ᐊᒻᒪᓗ ᓴᓗᒪᔪᒥᒃ, ᐅᓗᕆᐊᓇᙱᑦᑐᒥᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᒥᒃ ᐊᕙᑎᖃᕐᓂᖅᒥᒃ ᒫᓐᓇᒧᑦ ᐊᒻᒪ ᓯᕗᓂᒃᓴᑦᑎᓐᓄᑦ.

ᓄᓇᕗᒥᑦ ᐅᑯᐊ ᐊᕙᑎᓕᕆᓂᕐᒥᑦ ᐊᒻᒪ ᓯᓚᒥᒃ ᐊᓯᔾᔨᖅᐸᓪᓕᐊᓂᕐᒧᑦ ᑲᓇᑕᒥ (ECCC) ᑐᕌᒐᖃᖅᑐ ᐱᓇᓱᐊᒐᖏᑦᑎᒍᑦ ᐃᒪᓐᓇ:

• ᐱᐅᓯᕚᓪᓕᖅᑎᑦᑎᓗᑎᒃ ᐊᒻᒪ ᓴᐳᑎᓯᒪᓗᒐ ᓄᓇ ᐃᓕᖅᑯᓯᖓᒍᑦ
• ᐊᓯᐅᑎᑦᑎᑦᑕᐃᓕᓂᖅ ᐊᑐᒃᑲᓐᓂᕈᓐᓇᖅᑐᓂᒃ ᐊᒻᒪ ᐃᒪᒃᑯᑦ ᐊᑐᒃᑲᓐᓂᕈᓐᓇᖅᑐᓂᒃ
• ᑐᓂᓯᓯᒪᓗᑎᒃ ᓄᓇᐅᑉ ᖃᓄᐃᓕᐅᖓᓂᖓᓅᖓᔪᓂᒃ
• ᐊᑐᓕᖅᑎᑦᑎᓗᑎᒃ ᒪᓕᒐᕐᓂᒃ ᐊᒃᑐᐊᔪᓂᒃ ᐃᒪᐃᑦ ᐃᓱᖃᕐᕕᒋᔭᖏᓐᓄᑦ
• ᑐᑭᒧᐊᖅᑎᑦᑎᓗᑎᒃ ᐊᕙᑎᓕᕆᓂᖅᒧᑦ ᐊᑐᐊᒐᓂᒃ ᐊᒻᒪ ᐱᓕᕆᐊᒃᓴᓂᒃ

ᑐᓴᕆᐊᒃᑲᓐᓂᕈᒪᒍᕕᑦ:

• ᐊᕙᑎᓕᕆᓂᕐᒥᑦ ᐊᒻᒪ ᓯᓚᒥᒃ ᐊᓯᔾᔨᖅᐸᓪᓕᐊᓂᕐᒧᑦ ᑲᓇᑕᒥ

ᐱᔨᑦᑎᕋᐅᑎᓕᕆᔨᑦ ᑲᓇᑕᒥ

ᐱᔨᑦᑎᕋᐅᑎᓕᕆᔨᑦ ᑲᓇᑕᒥ ᑲᓇᑕᒥᐅᑕᓂᒃ ᐊᑐᐃᓐᓇᖃᖅᑎᑦᑎᔪᑦ ᐊᑕᐅᓯᒃᑰᖓᔪᒥᒃ ᐊᔾᔨᒌᙱᕈᓘᔭᖅᑐᓄᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓄᑦ ᐊᒻᒪ ᐃᑲᔪᕈᑎᖏᓐᓄᑦ.

ᓄᓇᕗᒥᑦ, ᐱᓕᕆᓂᖅ ᑐᕌᖓᓗᐊᖅᑐᖅ ᐊᑐᐃᓐᓇᖃᖅᑎᑦᑎᓂᖅᒥᒃ ᐊᔾᔨᒌᙱᕈᓘᔭᖅᑐᓂᒃ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᐊᒻᒪ ᐃᑲᔪᕈᑎᖏᓐᓂᒃ ᓄᓇᕗᒻᒥᐅᓄᑦ ᐱᔭᐅᔪᒪᔪᓂᒃ ᐊᒻᒪ ᐱᔭᕆᐊᖃᖅᑕᖏᓐᓂᒃ ᒐᕙᒪᑐᖃᒃᑯᓐᓂᒃ.

ᑐᓴᕆᐊᒃᑲᓐᓂᕈᒪᒍᕕᑦ:

• ᐱᔨᑦᑎᕋᐅᑎᓕᕆᔨᑦ ᑲᓇᑕᒥ – ᓄᓇᕗᑦ

ᓄᓇᒥᐅᑕᓕᕆᔨᒃᑯᑦ ᑲᓇᑕᒥ

ᓄᓇᒥᐅᑕᓕᕆᔨᒃᑯᑦ ᑲᓇᑕᒥ (NRCan) ᑮᓇᐅᔭᓕᐅᕋᓱᒃᑎᐅᔪᑦ, ᖃᐅᔨᓴᖅᑐᓕᕆᓂᒃᑯᑦ ᑐᙵᕕᖃᖅᖢᑎᒃ ᐱᓕᕆᐊᒃᓴᖃᖅᖢᑎᒃ ᐃᒪᓐᓇ:

• ᐱᒋᐊᖅᑎᑦᑎᓪᓗᑎᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐱᕙᓪᓕᐊᔪᓕᕆᓂᖅᒥᒃ ᐊᒻᒪᓗ ᑲᒪᒋᔭᖃᑦᑎᐊᖅᓂᒃᑯᑦ ᐊᑐᕈᓐᓇᖅᓂᕐᒥᒃ ᑲᓇᑕᐅᑉ ᐅᔭᕋᐅᔭᖏᓐᓂᒃ, ᐆᒻᒪᖅᑯᑎᖏᓐᓂᒃ ᐊᒻᒪᓗ ᓇᐹᖅᑐᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᖅᒥᒃ
• ᐋᖅᑭᒃᓱᐃᓗᑎᒃ ᑐᑭᓯᐅᒪᑎᑦᑎᓂᖅᒥᒃ ᑲᓇᑕᐅᑉ ᓄᓇᖓᓂᒃ
• ᑲᑎᖅᓱᐃᓗᑎᒃ ᐊᒻᒪ ᑐᓴᐅᒪᔭᐅᑎᑦᑎᓗᑎᒃ ᖃᐅᔨᒪᔭᐅᔪᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᐱᕙᓪᓕᐊᓂᖅᒥᒃ

ᓄᓇᕗᒥᑦ ᓄᓇᒥᐅᑕᓕᕆᔨᒃᑯᑦ ᑲᓇᑕᒥ (NRCan) ᐃᓚᐅᖃᑦᑕᖅᑐᑦ ᐊᐅᓚᑕᐅᔪᓂᒃ ᑲᓇᑕ-ᓄᓇᕗᑦ ᓄᓇᒥᑦ ᖃᐅᔨᓴᖅᑐᓕᕆᓂᖅᒧᑦ ᑎᑎᕋᖅᕕᒃᒥᑦ ᑲᒪᒋᔭᓕᖕᓂᒃ ᓄᓇᕗᒻᒥᐅᑦ ᓄᓇᓕᕆᓂᒃᑯᑦ ᖃᐅᔨᓴᖅᑕᐅᔾᔪᑎᓂᒃ ᑐᓴᐅᒪᑎᑦᑎᓂᖅᒥᒃ ᐊᒻᒪᓗ ᖃᐅᔨᒪᔨᑕᐅᓗᑎᒃ.

ᐅᕙᓃᖢᓂ ᖃᐅᓱᐃᑦᑐᒥᓐ, ᓄᓇᒥᐅᑕᓕᕆᔨᒃᑯᑦ ᑲᓇᑕᒥ (NRCan) ᐊᐅᓚᑦᑎᕙᒃᑭᕗᑦ ᐅᑭᐅᕐᑕᖅᑐᕐᒥ ᐊᐅᔪᐃᑦᑐᓕᕆᓂᕐᒥᒃ ᐱᓕᕆᐊᒃᓴᖅ ᑖᒃᑯᐊᓗ ᐃᓂᒃᓴᓕᐅᖅᑎᐅᕙᒃᖢᑎᒃ, ᑐᑭᒧᐊᖅᑎᑦᑎᕙᒃᖢᑎᒃ ᐊᒻᒪᓗ ᑐᓴᐅᒪᑎᑦᑎᔨᐅᓪᓗᑎᒃ ᑲᓇᑕᒥ ᒐᕙᒪᒃᑯᓐᓂᒃ, ᓯᓚᑦᑐᖅᓴᕐᕕᒡᔪᐊᓂᒃ, ᐅᑭᐅᕐᑕᖅᑐᕐᒥᑦ, ᐃᒻᒥᒃᑰᖅᑐᓂᒃ ᐊᒻᒪ ᓄᓇᕐᔪᐊᒧᑦ ᖃᐅᔨᓴᖅᑎᓂᒃ ᐱᓕᕆᔪᓂᒃ ᐱᓗᐊᖅᑐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.

ᑐᓴᕆᐊᒃᑲᓐᓂᕈᒪᒍᕕᑦ:

• ᓄᓇᒥᐅᑕᓕᕆᔨᒃᑯᑦ ᑲᓇᑕᒥ
• ᑲᓇᑕ-ᓄᓇᕗᑦ ᓄᓇᒥᑦ ᖃᐅᔨᓴᖅᑐᓕᕆᓂᖅᒧᑦ ᑎᑎᕋᖅᕕᒃ
• ᐅᑭᐅᕐᑕᖅᑐᕐᒥ ᐊᐅᔪᐃᑦᑐᓕᕆᓂᕐᒥᒃ ᐱᓕᕆᐊᒃᓴᖅ

ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ

ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᓴᐳᔾᔨᓯᒪᕙᒃᑐᑦ ᐊᒻᒪ ᓴᖅᑭᔮᖅᑎᑦᑎᓪᓗᑎᒃ ᖃᐅᔨᒪᓇᑦᑎᐊᖅᑐᓂᒃ ᑲᓇᑕᒥ ᐃᓕᖅᑯᓯᕆᔭᐅᔪᓂᒃ, ᐊᒻᒪ ᐊᑐᓕᖅᑎᑦᑎᕙᒃᖢᑎᒃ ᑭᒃᑯᓕᒫᓂᒃ ᑐᑭᓯᐅᒪᑎᑦᑎᓂᖅᒥᒃ, ᐱᒃᑯᓕᑎᑦᑎᓂᖅᒥᒃ ᐊᒻᒪ ᖁᕕᐊᒋᔭᖃᓕᕐᓂᖅᒥᒃ ᑕᒪᒃᑯᐊ ᖃᓄᐃᑉᐸᓪᓕᐊᒍᑎᐅᕙᒃᑐᑦ ᐊᒻᒪ ᐃᖅᑲᐅᒪᓇᖅᑐᑦ ᖃᓄᐃᑕᐅᑦᑕᐃᓕᒪᓪᓗᒋ ᒫᓐᓇᒧᑦ ᐊᒻᒪ ᓯᕗᓂᒃᓴᑦᑎᓐᓄᑦ.

ᓄᓇᕗᒥᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᑲᒪᒋᔭᖃᖅᑐᑦ ᐅᑯᓂᖓ ᑲᓇᑕᒥ ᒥᕐᖑᐃᖅᓯᕕᒃᓂᒃ ᐊᒻᒪ ᑕᕆᐅᖅᒥᐅᑕᓂᒃ ᓴᐳᔾᔭᐅᓯᒪᕝᕕᐅᔪᓂᒃ:

• ᐊᐅᔪᐃᑦᑐᖅ ᒥᕐᖑᐃᖅᓯᕕᒃ
• ᖁᑦᑎᓐᓂᖅᐹᖅ ᒥᕐᖑᐃᖅᓯᕕᒃ
• ᓯᕐᒥᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ
• ᐅᒃᑯᓯᒃᓴᓕᒃ ᒥᕐᖑᐃᖅᓯᕕᒃ
• ᖃᐅᓱᐃᑦᑐᖅ ᑲᓇᑕᒥᑦ ᒥᕐᖑᐃᖅᓯᕐᕕᒃ
• ᑕᓪᓗᕈᑎᐅᑉ ᐃᒪᖓ ᑲᓇᑕᓗᒃᑖᒥᑦ ᑕᕆᐅᒥᒃ ᐊᖑᓇᓱᓗᐊᖅᑕᐃᓕᕝᕕᒃ ᐃᓂ

ᑐᓴᕆᐊᒃᑲᓐᓂᕈᒪᒍᕕᑦ:

• ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐊᓪᓚᕝᕕᖓ

ᐅᑭᐅᕐᑕᖅᑐᕐᒥ ᖃᐅᔨᒪᓂᖅ ᑲᓇᑕᒥ

ᐅᑭᐅᕐᑕᖅᑐᕐᒥ ᖃᐅᔨᒪᓂᖅ ᑲᓇᑕᒥ (POLAR) ᓴᙱᒃᑎᕚᓪᓕᕈᑎᐅᔪᖅ ᑲᓇᑕ ᓯᕗᓕᐅᖅᑎᐅᓂᖓᓂᒃ ᐅᑭᐅᕐᑕᖅᑐᕐᒥᒃ ᖃᐅᔨᓴᖅᑐᓕᕆᓂᕐᒥᒃ ᐊᒻᒪ ᐱᓕᕆᔾᔪᑎᓕᕆᓂᖅᒥᒃ. ᐱᒋᐊᖅᑕᐅᓂᑰᓪᓗᓂ ᔫᓂ 2015-ᒥ, ᐱᓇᓱᐊᒐᕆᔭᐅᔪᑦ ᐅᑭᐅᕐᑕᖅᑐᕐᒥ ᖃᐅᔨᒪᓂᖅᒧᑦ ᐃᒪᓐᓇ:

• ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᖃᐅᔨᒪᓪᓗᑎᒃ ᐱᐅᓯᕚᓪᓕᖅᑎᑦᑎᒐᓱᖕᓂᕐᒥᒃ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ, ᐊᕙᑎᒋᔭᒥᒃ ᑲᒪᔨᐅᓂᕐᒧᑦ ᐊᒻᒪᓗ ᐃᓅᓯᖃᑦᑕᐊᕐᓂᕐᒧᑦ ᓄᓇᖃᖅᑐᓄᑦ ᐊᒻᒪ ᑲᓇᑕᒥᐅᑕᓄᑦ
• ᓴᖅᑭᑎᑦᑎᓗᑎᒃ ᐱᕙᓪᓕᐊᓂᐅᔪᒥᒃ ᐊᒻᒪ ᑐᓴᐅᒪᔭᐅᑎᑦᑎᓗᑎᒃ ᖃᐅᔨᔭᖏᓐᓂᒃ ᐊᓯᖏᓐᓂᒃ ᐅᑭᐅᕐᑕᖅᑐᕐᒥ ᐱᓕᕆᐊᖃᖅᑐᓂᒃ ᐃᓚᒋᓪᓗᒍ ᓄᓇᕐᔪᐊᑉ ᐊᓗᖓ
• ᓴᙱᒃᑎᕚᓪᓕᖅᑎᑦᑎᓗᑎᒃ ᑲᓇᑕᐅᑉ ᓯᕗᓕᐅᖅᑎᐅᓂᖓ ᐅᑭᐅᕐᑕᖅᑐᕐᒥᑦ ᐃᓱᒫᓘᑎᖏᓐᓂᒃ
• ᐋᖅᑭᒃᓱᐃᓗᑎᒃ ᑐᙵᕕᐅᓂᐊᖅᑐᒥᒃ ᖃᐅᔨᓴᖅᑐᓕᕆᓂᖅᒧᑦ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ

ᐅᑭᐅᕐᑕᖅᑐᕐᒥ ᖃᐅᔨᒪᓂᖅ ᐊᐅᓚᑦᑎᔨᐅᔪᖅ ᓄᑖᒥ ᑲᓇᑕᐅᑉ ᖁᑦᑎᒃᑐᖓᓂᒃ ᖃᐅᔨᓴᖅᕕᒃᒥᑦ (CHARS) ᐃᖃᓗᒃᑑᑎᐊᓂᒃ.

ᑐᓴᕆᐊᒃᑲᓐᓂᕈᒪᒍᕕᑦ:

• ᐅᑭᐅᕐᑕᖅᑐᕐᒥ ᖃᐅᔨᒪᓂᖅ ᑲᓇᑕᒥ

ᑭᒃᑯᓕᒫᓂᒃ ᓈᒻᒪᙱᓕᐅᕐᓂᖅᒧᑦ ᐱᓕᕆᐊᖃᕐᓂᖅᒧᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ

ᑭᒃᑯᓕᒫᓂᒃ ᓈᒻᒪᙱᓕᐅᕐᓂᖅᒧᑦ ᐱᓕᕆᐊᖃᕐᓂᖅᒧᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ (PPSC) ᐃᒻᒥᒃᑰᖓᔪᖅ ᐃᖃᖅᑐᐃᕕᒃᑰᑦᑎᑦᑎᔩᑦ ᐱᓕᕆᐊᖃᓪᓗᐊᑕᖅᖢᑎᒃ ᒐᕙᒪᑐᖃᒃᑯᑦ ᐱᖁᔭᖏᓐᓂᒃ ᓱᕋᐅᔪᓂᒃ ᐊᒻᒪᓗ ᒪᓕᒐᓕᕆᓂᒃᑯᑦ ᐃᑲᔪᖅᑕᐅᑎᑦᑎᕙᒃᖢᑎᒃ.

ᑭᒃᑯᓕᒫᓂᒃ ᓈᒻᒪᙱᓕᐅᕐᓂᖅᒧᑦ ᐱᓕᕆᐊᖃᕐᓂᖅᒧᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ (PPSC) ᑲᒪᒋᔭᖃᖅᑐᑦ ᐃᖃᖅᑐᐃᕕᒃᑰᖅᑎᑦᑎᓂᖅᒥᒃ ᑕᒪᐃᓐᓂᓕᒫᖅ ᓱᕋᐃᒍᑎᐅᔪᓂᒃ ᒪᓕᒐᖅᓂᒃ ᓄᓇᕗᒥᑦ ᐊᒻᒪᓗ ᐱᕋᔭᒍᑎᓂᒃ ᒐᕙᒪᑐᖃᒃᑯᑦ ᐱᖁᔭᖏᑦᑎᒍᑦ. ᓄᓇᕗᒥᑦ ᐅᑯᐊ ᑭᒃᑯᓕᒫᓂᒃ ᓈᒻᒪᙱᓕᐅᕐᓂᖅᒧᑦ ᐱᓕᕆᐊᖃᕐᓂᖅᒧᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ (PPSC) ᐃᖃᖅᑐᐃᕕᒃᑰᖅᑎᑦᑎᖃᑦᑕᕐᒥᔪᑦ ᓱᕋᐃᔪᓂᒃ ᓄᓇᕗᑦ ᒪᓕᒐᖏᓐᓂᒃ.

• ᑭᒃᑯᓕᒫᓂᒃ ᓈᒻᒪᙱᓕᐅᕐᓂᖅᒧᑦ ᐱᓕᕆᐊᖃᕐᓂᖅᒧᑦ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ

ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᑦ ᐊᒻᒪ ᐱᖁᑎᖃᖅᑎᑦᑎᔨᑦ ᑲᓇᑕᒥ

ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᑦ ᐊᒻᒪ ᐱᖁᑎᖃᖅᑎᑦᑎᔨᑦ ᑲᓇᑕᒥ (PSPC) ᐱᔨᑦᑎᕋᐅᑎᓕᕆᔨᐅᔪᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᒻᒪ ᐱᓕᕆᖃᑎᒋᔭᖏᓐᓂᒃ. ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᑦ ᐊᒻᒪ ᐱᖁᑎᖃᖅᑎᑦᑎᔨᑦ ᑲᓇᑕᒥ (PSPC) ᓂᐅᕕᕈᓐᓇᖅᑎᑦᑎᔨᐅᔪᑦ, ᐅᖃᐅᓯᓕᕆᓂᖅᒧᑦ ᐱᔪᓐᓇᐅᑎᓕᕆᔨᐅᓪᓗᑎᒃ, ᐃᒡᓗᓕᕆᓂᕐᒧᑦ ᐊᐅᓚᑦᑎᓂᖅᒥᒃ, ᑮᓇᐅᔭᓕᕆᓂᖅᒥᒃ, ᑮᓇᐅᔭᓕᕆᓂᖅᒥᒃ, ᖃᐅᔨᓇᓱᒃᑎᒥᒃ ᐊᒻᒪᓗ ᑮᓇᐅᔭᓕᐊᓂᒃ ᐊᑭᓕᖅᓱᐃᔨᒧᑦ ᐊᐅᓚᑦᑎᔨᐅᓪᓗᑎᒃ ᒐᕙᒪᑐᖃᒃᑯᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᓄᑦ.

ᕈᐃᐅᓪ ᑲᓃᑎᐊᓐ ᒪᐅᓐᑕᑦ ᐸᓖᓯᒃᑯᑦ (ᐸᓖᓯᑦ ᐊᓐᓄᕌᖏᓐᓂᒃ ᐊᑐᙱᖢᑎᒃ ᐃᖅᑲᓇᐃᔭᖅᑏᑦ)

ᕈᐃᐅᓪ ᑲᓃᑎᐊᓐ ᒪᐅᓐᑕᑦ ᐸᓖᓯᒃᑯᑦ (RCMP) ᑲᓇᑕᒥᑦ, ᒐᕙᒪᑐᖃᒃᑯᓐᓂᒃ, ᐳᕌᕕᓐᓯᑎᒍᑦ ᐊᒻᒪᓗ ᓄᓇᓕᒃᑎᒍᑦ ᐸᓖᓯᓕᕆᔨᐅᔪᑦ.

ᓄᓇᕗᒥᑦ ᐸᓖᓯᒃᑯᑦ ᐱᕋᔭᒃᑕᐃᓕᑎᑦᑎᔨᐅᔪᑦ ᐊᒻᒪ ᖃᐅᔨᓴᖅᑎᐅᕙᒃᖢᑎᒃ ᐱᕋᔭᒍᑎᓂᒃ, ᐱᑦᑎᐊᕋᓱᒃᑎᑦᑎᔩᑦ ᒪᓕᒐᕐᓂᒡᓗ ᒪᓕᒃᑎᑦᑎᔩ ᐊᒻᒪᓗ ᑲᓇᑕᒧᑦ ᓴᐳᓐᓂᐊᖅᑎᐅᖃᑕᐅᓪᓗᑎᒃ. ᐸᓖᓯᑦ ᐊᓐᓄᕌᖏᓐᓂᒃ ᐊᑐᙱᖢᑎᒃ ᐃᖅᑲᓇᐃᔭᖅᑏᑦ ᑭᒃᑯᓕᒫᓄᑦ ᐱᔨᑦᑎᕋᖅᑎᐅᕗᑦ ᐊᐅᓚᑦᑎᓂᒃᑯᑦ ᐃᑲᔪᖅᑐᐃᕙᒃᖢᑎᒃ ᐸᓖᓯᒃᑯᓐᓂᑦ ᒪᐅᓇ ᑎᑎᕋᖅᑎᒋᔭᐅᓪᓗᑎᒃ ᐊᒻᒪ ᐊᐅᓚᑦᑎᓂᖅᒧᑦ ᐃᑲᔪᖅᐸᒃᖢᑎᒃ.

• ᐸᓖᓯᒃᑯᑦ ᒥᒃᓵᓄᑦ ᓄᓇᕗᒥᑦ