ᑲᔪᓯᑦᑎᐊᖅᑐᓂᒃ ᐅᓂᒃᑳᑦ

ᑲᒥᓕ ᐃᖅᑲᓇᐃᔭᓕᖅᑐᖅ ᒐᕙᒪᑐᖃᒃᑯᓂ ᕿᓂᖅᖢᓂ ᐱᕕᖃᖅᑎᑕᐅᔪᓐᓇᕐᓂᒥᒍᑦ ᐱᕈᖅᑎᓪᓗᓂ ᐃᒻᒥᓂᒃ ᐊᒻᒪᓗ ᖃᐅᔨᒪᔨᒻᒪᕆᐅᓕᕐᓗᓂ. ᑕᐃᒪᖓᓂᑦ ᐃᓚᐅᓕᓚᐅᕋᒥ ᐅᑭᐅᖅᑕᖅᑐᒥᒃ ᖃᐅᔨᒪᔭᐅᔪᓕᕆᓂᖅ ᑲᓇᑕ ᓯᑎᐱᕆ 2020-ᒥ, ᑲᒥᓕ ᐃᖅᑲᓇᐃᔮᖃᖅᑐᖅ ᐃᒡᓗᓂᒃ ᐱᔭᒃᓴᓄᑦ ᓴᓇᔨᐅᔪᖅ ᐅᔾᔨᖅᑐᖅᑎᐅᔪᖅ ᐃᖃᓗᒃᑑᑦᑎᐊᖅ ᐃᒡᓗᓕᕆᔨᖏᑦ ᓄᓇᖁᑎᖏᓐᓄᓪᓗ ᐱᓕᕆᖃᑎᒌᑦ. ᐅᑯᐊ ᐱᓕᕆᖃᑎᒌᑦ ᐱᔭᒃᓴᖃᖅᑐᑦ ᐊᐅᓚᑦᑎᓗᑎᒃ ᒐᕙᒪᑐᖃᒃᑯᑦ ᐃᒡᓗᖁᑎᖏᓐᓂᒃ, ᐊᑐᖅᑐᐊᖅᑕᐅᔪᓂᒃ, ᒐᕙᒪᒃᑯᑦ ᐅᒥᐊᖏᓐᓂᒃ ᐊᒻᒪᓗ ᐊᓯᖏᓐᓂᒃ ᑐᔪᕐᒥᕕᐅᓲᑦ ᐃᖃᓗᒃᑑᑦᑎᐊᕐᒥ, ᓄᓇᕗᒻᒥ.

ᑕᐃᒪᖓᓂᑦ ᐊᓂᒍᖅᑐᑦ ᐱᖓᓱᑦ ᐊᕐᕌᒍᑦ, ᑲᒥᓕ ᐃᑲᔪᑦᑎᐊᖏᓐᓇᖅᑐᖅ ᐱᓕᕆᖃᑎᒋᔭᒥᓂᒃ ᐊᒻᒪᓗ ᐊᐅᓚᑦᑎᓪᓗᓂ ᐃᖅᑲᓇᐃᔮᒥᓄᑦ ᑐᑭᓕᐅᕈᑕᐅᕙᓪᓕᐊᔪᓂᒃ ᐃᒻᒥᒍᑦ ᓇᖕᒥᓂᖅ ᐱᓇᓱᐊᖅᑐᖅ ᐱᐅᓯᕚᓪᓕᕈᒪᒐᒥ ᓯᕗᓕᐅᖅᑎᐅᔪᓐᓇᕐᓂᓂ ᐊᒻᒪᓗ ᖃᐅᔨᒪᔨᒻᒪᕆᐅᔪᓐᓇᕐᓂᓂ. ᑲᒥᓕ ᐃᓕᓐᓂᐊᖅᓯᒪᔪᖅ ᐊᒥᓱᓂᒃ ᑕᒪᐃᓐᓂ ᑲᓇᑕ ᐃᓕᓐᓂᐊᕐᕕᖏᓐᓂ ᐃᓕᓐᓂᐊᕐᕕᑐᐃᓐᓇᕐᓂ ᐊᒻᒪᓗ ᐃᓱᓕᑦᑎᓚᐅᖅᑐᖅ ᐱᓕᒻᒪᒃᓴᐃᕕᒃ ᓯᕗᓕᐅᖅᑎᐅᓂᕐᒧᑦ ᐃᓕᓐᓂᐊᕐᓂᖅ ᓄᓇᕗᒃ ᐃᓄᖏᓐᓂ. ᐅᓇ 10 -ᒪ ᑕᕿᓄᑦ ᐃᓕᓐᓂᐊᖅᑕᐅᓲᖅ ᐃᑲᔪᖅᑐᖅ ᑲᒥᓕᒥᒃ ᐱᕈᖅᐹᓪᓕᕈᑎᒋᓪᓗᒍ ᐊᔪᕈᓐᓃᖅᖢᒋᑦ ᓴᓇᓕᕆᔾᔪᑎᒃᓴᓂ, ᓇᖕᒥᓂ ᐱᓕᕆᔪᓐᓇᕐᓂᓂ ᕿᒡᓴᓱᒍᓐᓃᖅᖢᓂ ᐊᒻᒪᓗ ᐃᓕᑦᑎᓪᓗᓂ ᐊᒥᓱᓂᒃ ᖃᓄᖅ ᐱᐅᓂᖅᓴᒥᒃ ᓯᕗᓕᐅᖅᑎᐅᔪᓐᓇᕐᓂᕐᒥᒃ.

ᓖᒪᓕ ᐃᓚᐅᓕᓚᐅᖅᑐᖅ ᒐᕙᒪᑐᖃᒃᑯᓂ 2012 ᐱᓕᕆᐊᕆᓪᓗᒍ ᒪᓕᒐᓕᕆᓂᖅ ᐃᖃᖅᑐᐃᔪᓕᕆᔨᒃᑯᓂ ᑲᓇᑕ. ᐱᒋᐊᓚᐅᖅᑐᖅ ᐃᖅᑲᓇᐃᔮᖓ ᒪᓕᒐᓕᕆᓂᕐᒥ ᐃᑲᔪᖅᑎᐅᓪᓗᓂ ᐃᑲᕐᕋᓕᐅᖃᑦᑕᖅᖢᓂ ᑳᓐᑐᕌᒃᑯᑦ ᔭᓗᓇᐃᕝᒥ, ᓄᓇᑦᓯᐊᖅ ᐊᒻᒪᓗ ᐃᖅᑲᓇᐃᔭᖅᑖᓚᐅᖅᑐᖅ ᐊᑕᐃᓐᓇᓕᖅᖢᓂ ᐃᖅᑲᖅᑐᐃᔪᓕᕆᔨᒃᑯᓂ ᑲᒪᔨᐅᓪᓗᓂ ᐊᓂᒍᖅᑎᓪᓗᒋᑦ 11 ᑕᕿᑦ. ᓖᒪᓕ ᓅᓚᐅᖅᑐᖅ ᐃᖃᓗᖕᓄᑦ, ᓄᓇᕗᑦ ᓄᑖᒧᑦ ᐃᖅᑲᓇᐃᔭᖅᑖᒥᓄᑦ, 2,200 ᑭᓚᒦᑕᔅ ᐅᖓᓯᖕᓂᓕᖕᒥᑦ, ᐊᒻᒪᓗ ᐃᖅᑲᓇᐃᔭᖅᖢᓂ ᐃᓕᓐᓂᐊᓚᐅᖅᑐᖅ ᑕᐃᑯᖓᑐᐊᕋᒥ.

ᑕᐃᔅᓱᒪᓂ ᓄᓇᕗᑦ ᒐᕙᒪᒃᑯᑦ ᑐᓴᕐᑎᑦᑎᓚᐅᕐᒪᑕ ᐱᒋᐊᖅᑎᑦᑎᓪᓗᑎᒃ ᓄᓇᕗᒻᒥ ᒪᓕᒐᓕᕆᓂᕐᒧᑦ ᐃᓕᓐᓂᐊᕈᑎᑦ 2016-ᒥ, ᓖᒪᓕ ᐱᓇᔪᒍᒪᓚᐅᖅᑐᖅ. ᐊᖏᖅᑕᐅᓪᓗᓂ ᐃᓕᓐᓂᐊᕐᓂᐊᖅᑐᓄᑦ ᐊᒻᒪᓗ ᐱᒋᐊᓕᓚᐅᖅᑐᖅ ᓯᑎᐱᕆ 2017 ᑮᓇᐅᔭᒃᓴᖃᖅᑎᑕᐅᔪᖅ ᐃᓕᓐᓂᐊᕈᑎᖓ ᐊᐅᓪᓚᖅᓯᒪᓪᓗᓂ ᑖᒃᑯᑎᒍᑦ ᐃᓕᑉᐸᓪᓕᐊᓂᖅ ᐃᓕᓐᓂᐊᕈᑎᓄᑦ ᐃᑲᔫᑎᑦ ᑮᓇᐅᔭᒃᓴᐃᑦ. ᐅᑎᓚᐅᖅᑐᖅ ᐃᖃᖅᑐᐃᔪᓕᕆᔨᒃᑯᓄᑦ ᑲᓇᑕ ᐱᓕᕆᓕᖅᖢᒋᑦ ᒪᓕᒐᓕᕆᔪᑦ ᐃᓱᓕᑦᑎᒐᒥ 2021. ᑕᐃᒪᖓᓂᑦ ᐱᖓᓱᑦ ᐊᕐᕌᒍᓂ ᐊᓂᒍᖅᑐᑦ, ᓖᒪᓕ ᐱᔭᕇᑦᑎᐊᖅᓯᒪᓕᖅᑕᖏᑦ ᒪᓕᒐᓕᕆᓂᓂ ᐸᕿᓪᓗᒋᓪᓗ ᒪᕐᕉᓂ ᓄᑕᕋᓛᖃᖅᑐᖅ, ᐊᒻᒪᓗ ᒫᓐᓇ ᐃᖃᖅᑐᖅᑕᐅᔪᓂ ᒪᓕᒐᓕᕆᔨᖓᑦ ᒐᕙᒪᑐᖃᒃᑯᑦ ᑖᒃᑯᑎᒍᑦ ᐃᖃᖅᑐᐃᔪᓕᕆᔨᒃᑯᑦ ᑲᓇᑕ. ᑕᐃᑲᓂ ᓄᕕᐱᕆ 2024, ᓖᒪᓕ ᐱᓕᕆᓚᐅᖅᑕᖓ ᐃᖃᖅᑐᐃᕕᐅᑉ ᐃᓗᐊᓂ ᐱᔭᒃᓴᓂ ᐱᔭᕇᖅᖢᒋᑦ, ᑕᐃᒪᓗ ᑭᒃᑯᓕᒫᓄᑦ ᖁᕕᐊᓱᒍᑕᐅᔪᒫᖅᑐᖅ ᔮᓄᐊᕆ 2025.

ᑖᓴᓐ ᐃᓚᐅᓕᓚᐅᖅᑐᖅ ᒐᕙᒪᑐᖃᒃᑯᓂ ᒫᑦᓯ 2022 ᑕᒪᐅᓐᓇ ᐱᓕᒻᒪᒃᓴᐃᕕᒃ ᐃᓄᖕᓂᒃ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᐱᕙᓪᓕᐊᑎᑦᑎᓂᖅ ᐱᓕᕆᑎᑦᑎᔾᔪᑕᐅᔪᖅ. ᑕᐃᑲᓂ ᑖᓴᓐ ᐱᓇᔪᓚᐅᖅᑐᖅ ᖃᐅᔨᓴᖅᑎᒻᒪᕆᐅᓂᕐᒧᑦ-ᐃᓂᖃᖅᑐᑦ ᐃᖅᑲᓇᐃᔮᒃᓴᐃᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕ, ᐃᓄᓕᕆᔨᑐᖃᒃᑯᑦ ᑲᓇᑕ ᐊᒻᒪᓗ ᐊᕙᑎᓕᕆᔨᒃᑯᑦ ᑲᓇᑕ. ᐱᓕᕆᓚᐅᖅᑕᖏᑦ ᐱᐅᒋᔭᓂ, ᐃᖅᑲᓇᐃᔭᖅᖢᓂ ᑕᒪᐃᓐᓂ ᐃᓄᓕᕆᔨᑐᖃᒃᑯᑦ ᑲᓇᑕ ᐊᒻᒪᓗ ᐊᕙᑎᓕᕆᔨᒃᑯᑦ ᑲᓇᑕ, ᑭᓯᐊᓂ ᐊᓯᐊᓄᐊᓚᐅᖅᑐᖅ ᐊᐅᓚᑦᓯᕕᖕᓄᑦ ᐃᖃᖅᑐᐃᔪᓕᕆᔨᒃᑯᑦ ᑲᓇᑕ.

ᑕᐃᑲᓂ ᐃᖃᖅᑐᐃᕕᓕᕆᔨᒃᑯᑦ ᑲᓇᑕ, ᑖᓴᓐ ᓇᓂᓯᓚᐅᖅᐳᖅ ᓄᑖᒥᒃ ᐱᐅᒋᔭᒥᓂᒃ ᑲᓇᑕᒥ ᐃᖃᖅᑐᐃᔪᓕᕆᓂᕐᒥ ᒪᓕᒐᓕᕆᓂᕐᒧᑦ ᐃᑲᔪᖅᑎᐅᓪᓗᓂ, ᑕᐃᑲᓂ ᒪᑐᓯᖃᑦᑕᓚᐅᖅᑐᖅ ᐱᓕᕆᔭᐅᔪᓂᒃ ᐃᖃᖅᑐᐃᕕᒃᑯᑦ ᐱᔭᕇᖅᑕᐅᓪᓗᑎᒃ, ᐱᓕᕆᔾᔪᓯᖓᑦ ᐃᖃᖅᑐᖅᑕᐅᔭᖅᑐᖁᔨᓂᖅ ᐊᒻᒪᓗ ᐃᑲᔪᕐᓗᒋᑦ ᒪᓕᒐᓕᕆᔨᑦ ᐸᕐᓇᒃᑎᓪᓗᒋᑦ ᐃᖃᖅᑐᖅᑕᐅᓂᐊᖅᑐᓂᒃ ᐊᒻᒪᓗ ᐃᖅᑲᖅᑐᐃᕖᑦ ᓄᓇᓕᖕᓄᑦ ᑎᑭᖃᑦᑕᖅᑐᑦ. ᑖᓴᓐ ᕿᓚᒥ ᐊᔪᕈᓐᓃᓚᐅᖅᑕᖓ ᐃᖅᑲᓇᐃᔮᓂ ᐊᒻᒪᓗ ᐱᔭᕇᑦᑎᐊᖅᖢᒋᑦ ᑲᔪᓯᔪᓐᓇᕐᒪᖔᑦ ᐊᐅᓚᑦᓯᕕᖓᑦᑕ ᐃᓗᐊᓂ ᐱᓕᕆᐊᖑᔪᖅ ᓄᓇᕗᒻᒥ ᐊᕕᒃᑐᖅᓯᒪᔪᓄᑦ ᑎᑎᕋᕐᕕᖓᓂ - ᐅᓇ ᐱᓕᕆᐊᖑᔪᖅ ᒫᓐᓇ ᐊᖏᒡᓕᒋᐊᖅᓯᒪᓕᖅᑐᖅ ᐱᓕᕆᐊᖑᓪᓗᓂ ᐊᓯᖏᓐᓂ ᑎᑎᕋᕐᕕᖕᓂ. ᐱᔭᕇᖅᓯᒐᒥ ᐃᓄᖕᓂᒃ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᐱᕙᓪᓕᐊᑎᑦᑎᓂᖅ ᐱᓕᕆᑎᑦᑎᔾᔪᑕᐅᔪᖅ, ᑖᓴᓐ ᐃᖅᑲᓇᐃᔭᖅᑖᑦᑎᐊᓚᐅᖅᑐᖅ ᐊᒻᒪᓗ ᐳᖅᑐᓂᖅᓴᒧᑦ ᐃᖅᑲᓇᐃᔭᖅᑖᖅᖢᓂ ᒪᓕᒐᓕᕆᓂᕐᒥ ᐃᑲᔪᖅᑎᐅᓪᓗᓂ ᐅᔾᔨᖅᑐᑎ ᑕᐃᑲᓂ ᐊᐅᓚᑦᑎᔪᖅ ᐱᓕᕆᖃᑎᒌᑦ 8-ᖑᔪᑦ ᒪᓕᒐᓕᕆᓂᕐᒧᑦ ᐃᑲᔪᖅᑎᑦ ᐊᒻᒪᓗ ᑲᔪᓯᓂᐊᖅᑐᖅ ᐃᑲᔪᕐᓗᒋᑦ ᐱᓕᕆᑦᑎᐊᖅᓯᒪᔪᓂᒃ ᓴᓇᖃᑦᑕᕐᓂᐊᕋᒥ ᐊᐅᓚᑦᓯᕕᖕᒥᓂ.

ᔪᐃ ᐃᓚᐅᓕᓚᐅᖅᑐᖅ ᒐᕙᒪᑐᖃᒃᑯᓂ 2017-ᒥ ᐃᑲᔪᖅᑎᐅᓪᓗᓂ ᑎᑎᕋᖅᑎᓂ ᐃᖃᖅᑐᐃᔪᓕᕆᔨᒃᑯᑦ ᑲᓇᑕ. ᑕᒪᑐᒪᓂ ᐊᕐᕌᒍᒥ, ᐃᓚᐅᓚᐅᖅᑐᖅ ᓯᕗᓪᓕᖅᐹᒥᒃ ᑐᑭᓯᓕᖅᖢᒍ ᐱᓕᒻᒪᒃᓴᐃᕕᒃ ᓯᕗᓕᐅᖅᑎᐅᓂᕐᒧᑦ ᐃᓕᓐᓂᐊᕐᓂᖅ ᓄᓇᕗᒻᒧᑦ ᐃᓄᖏᓐᓄᑦ. ᐅᓇ ᐱᓕᕆᑎᑦᑎᔾᔪᑕᐅᔪᖅ ᑐᓂᓯᓯᒪᔪᖅ ᔪᐃ ᐱᔭᕆᐅᖅᓴᓪᓗᓂ ᐊᒻᒪᓗ ᐱᓕᕆᓯᒪᓕᖅᖢᓂ ᐱᕚᓪᓕᕈᑎᒃᓴᒥᓂᒃ ᐃᓗᐊᓂᓂ ᒐᕙᒪᑐᖃᒃᑯᑦ. ᐊᓂᒍᖅᑎᓪᓗᒋᑦ ᐊᒥᓲᓐᖏᑦᑐᓂᒃ ᐳᖅᑐᓂᖅᓴᒧᑦ ᐃᖅᑲᓇᐃᔮᖅᑕᓚᐅᖅᖢᓂ, ᔪᐃ ᐱᓇᓱᐊᕐᕕᖃᓕᓚᐅᖅᑐᖅ ᐱᓕᕆᕕᖓᓐᓄᑦ ᑲᒪᔨᒋᔭᐅᓪᓗᓂ ᐃᖃᖅᑐᐃᔪᓕᕆᔨᒃᑯᑦ ᑲᓇᑕ ᓄᓇᕗᒻᒥ ᐊᕕᒃᑐᖅᓯᒪᔪᓂ ᑎᑎᕋᕐᕕᖓᓂ ᐊᒻᒪᓗ ᑭᖑᓂᐊᒍᑦ ᐃᖅᑲᓇᐃᔭᖅᑖᓚᐅᖅᑐᖅ ᐊᐅᓚᑦᓯᕕᖓᓄᑦ ᑲᒪᔨᐅᓪᓗᓂ ᑲᓇᑕ ᐅᑭᐅᖅᑕᖅᑐᒥ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᖅ ᑎᒥᖓ (ᑳᓄᐊᒃᑯᑦ), ᐅᓂᒃᑳᕆᐊᖃᖃᑦᑕᖅᑐᖅ ᐊᖓᔪᖅᑳᖅ ᑐᖏᓕᖓᓄᑦ ᑕᒪᐃᓐᓄᑦ ᑎᐅᓕᑐᐊᓕᔅ ᐊᐅᓚᑦᑎᕕᖓᓂ. ᑕᐃᑲᓂ ᑳᓄᐊ, ᔪᐃ ᐃᑲᔪᖅᑕᐅᓚᐅᖅᑐᖅ ᐊᐅᓚᑦᓯᔨᖓᓂᑦ ᐱᔭᕇᖅᖢᒍ ᐳᖅᑐᓛᖅ ᐃᓕᓐᓂᐊᕈᑎ ᐱᓕᕆᐊᒃᓴᓄᑦ ᐊᐅᓚᑦᑎᓂᕐᒧᑦ, ᑕᐃᒪᓗ ᐊᔪᕈᓐᓃᖅᖢᓂ ᒫᓐᓇ ᐃᖅᑲᓇᐃᔮᕆᔭᒥᓂᒃ ᐱᓕᕆᐊᒃᓴᓄᑦ ᐊᐅᓚᑦᓯᔨ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕ ᑕᓪᓗᕈᑎᐅᑉ ᐃᒪᖓ ᑲᓇᑕᐅᑉ ᑕᕆᐅᖓ ᓴᐳᓐᓂᐊᖅᑕᐅᔪᖅ.

ᐊᓕᒃᓯᐊ ᐃᓚᐅᓕᓚᐅᖅᑐᖅ ᒐᕙᒪᑐᖃᒃᑯᓂ 2020 ᐃᖅᑲᓇᐃᔭᖅᑐᓕᕆᔨᒃᑯᓂ ᐱᓕᕆᑎᑦᑎᔾᔪᑕᐅᔪᓄᑦ ᑲᒪᔨᐅᓪᓗᓂ ᑳᓄᐊᒃᑯᑎᒍᑦ. ᐅᓇ ᐃᖅᑲᓇᐃᔭᖅᑐᓕᕆᔨᒃᑯᓂ ᐱᓕᕆᑎᑦᑎᔾᔪᑕᐅᔪᓄᑦ ᑲᒪᔨ, ᐊᓕᒃᓯᐊ ᐱᔭᒃᓴᖃᖅᑐᖅ ᐅᓂᒃᑳᕆᖃᑦᑕᕐᓗᒋᑦ ᐊᒻᒪᓗ ᐃᓄᐃᑦ ᐃᖅᑲᓇᐃᔭᖅᑎᑦ ᖃᑦᓯᐅᓂᖏᓐᓂᒃ ᖃᐅᔨᓴᖅᓯᒪᔪᓪᓗ ᐱᓕᕆᐊᕆᓗᒋᑦ ᐊᒻᒪᓗ ᑳᓄᐊᒃᑯᑦ ᐃᓕᓐᓂᐊᖅᑎᑕᐅᔪᖅ ᐊᒻᒪᓗ ᒪᒃᑯᒃᑐᖅ ᒐᕙᒪᒃᑯᓂ ᐃᖅᑲᓇᐃᔭᕈᓯᕐᒥᒃ ᖃᐅᔨᒪᓂᖅᐸᐅᔪᖅ ᑭᒡᒐᖅᑐᖅᑎᐅᖃᑦᑕᖅᑐᖅ, ᐃᖏᕐᕋᑎᑦᑎᔪᖅ ᐊᐅᔭᒃᑯᒃ ᐃᓕᓐᓂᐊᖅᑐᓄᑦ ᐃᓕᓐᓂᐊᕈᑎᒥᒃ. ᑕᒪᐅᓐᓇ ᐊᔪᖏᑦᑎᐊᖅᑐᖅ ᑳᓄᐊᒃᑯᑦ ᐃᓄᖕᓂ ᐊᔪᕈᓐᓃᑦᑎᐊᖅᑐᓄᑦ ᐊᐅᓚᑦᑎᔾᔪᑕᐅᔪᖅ ᐱᓕᕆᑎᑦᑎᔾᔪᑕᐅᔪᒧᑦ ᐃᓚᓕᐅᑎᔭᐅᔪᓐᓇᓚᐅᖅᑐᖅ; ᑕᐃᑲᓂ ᒫᑦᓯ 2022, ᐊᖏᓚᐅᖅᑐᖅ ᑐᓂᔭᐅᔪᒪᒐᒥ ᕿᓚᒥ ᐱᓕᕆᐊᕆᓂᐊᖅᑕᖓᓂᒃ ᐃᖅᑲᓇᐃᔮᕐᒥᒍᑦ.

ᐱᓇᔪᒍᒪᑦᑎᐊᖅᑐᖅ ᑕᐃᒪᓗ ᑭᖑᓂᕐᒥᓂ ᐱᓕᕆᓯᒪᔭᓂ ᐱᕙᓪᓕᐊᑎᑦᑎᓪᓗᓂ ᐃᓕᓐᓂᐊᕈᑎᒃᓴᓂᑦ ᓄᓇᕗᑦ ᒐᕙᒪᒃᑯᓄᑦ, ᐊᓕᒃᓯᐊ ᐃᓚᐅᓯᒪᔪᖅ, ᐊᑐᖅᖢᒋᑦ ᑐᓴᐅᑎᓕᕆᔾᔪᐅᑎᓂ ᐃᑲᔪᖃᑦᑕᖅᑐᖅ ᓲᕐᓗ ᒥᓂᔅᑕᐃ ᑐᓴᖅᑎᑦᑎᓕᕌᖓᑕ ᐊᒻᒪᓗ ᐃᒡᓯᕋᕐᔪᐊᕌᐱᒃ ᒪᒥᐊᑎᓪᓗᒍ ᐳᓚᕋᓪᖢᓂ. ᒫᑦᓯ 2023, ᐊᓕᒃᓯᐊ ᐃᖅᑲᓇᐃᔭᖅᑖᓚᐅᖅᑐᖅ ᑐᓴᐅᑎᓕᕆᔨᒃᑯᓄᑦ ᓴᓇᔨᐅᓪᓗᓂ ᐃᑲᔪᖅᖢᒋᑦ ᐱᓕᒻᒪᒃᓴᐃᕕᒃ ᐃᓕᓐᓂᐊᕐᑎᑦᑎᔾᔪᑎᖏᓐᓄᑦ ᐊᒻᒪᓗ ᓄᓇᓕᖕᓂ ᐱᓕᕆᐊᖑᖃᑦᑕᖅᑐᓄᑦ. ᒫᓐᓇ ᐃᖅᑲᓇᐃᔭᖃᑎᖃᖅᑐᖅ ᑎᒍᒥᐊᖅᑎᐅᔪᓂᒃ ᐊᒻᒪᓗ ᐊᓯᖏᓐᓂᒃ ᑳᓄᐊᒃᑯᓂ ᐃᖅᑲᓇᐃᔭᖅᑎᖏᓐᓂᒃ ᐊᑐᖅᑕᐅᓂᐊᕐᒪᑕ ᖃᐅᔨᒪᔭᐅᓕᑦᑎᐊᕐᓗᑎᒃ ᐱᓕᒻᒪᒃᓴᐃᕕᒃ ᒫᓐᓇᐅᔪᖅ ᐊᒻᒪᓗ ᐱᕙᓪᓕᐊᑦᑎᐊᕈᓐᓇᕐᓂᐊᕐᒪᑕ ᐃᓄᐃᑦ ᐃᖅᑲᓇᐃᔭᖅᑎᑦ ᒐᕙᒪᑐᖃᒃᑯᓂ ᓄᓇᕗᒻᒥ.