ᐅᖃᐅᓯᐅᔪᖅ ᐅᒃᐱᕐᓇᖅᑐᖅ ᕆᐱᑲ ᓴᑐᕋᓐᒥᑦ, ᒥᓂᔅᑕ ᐅᐊᖕᓇᒥᐅᓄᑦ ᐅᑭᐅᖅᑕᖅᑐᒥᐅᓄᓪᓗ ᐱᓕᕆᓂᕐᓄᑦ ᐱᓕᕆᔭᓕᖕᒧᑦ ᑲᓇᑕᒥ ᐅᐊᖕᓇᒥ ᑮᓇᐅᔭᓕᕆᓂᕐᓄᑦ ᑎᒥᖓᓄᑦ

ᒪᐃ 9, 2026ᒥ, ᐱᓕᒻᒪᒃᓴᐃᕕᒃ, ᒐᕙᒪᑐᖃᒃᑯᑦ ᐱᓕᕆᕝᕕᖓᑦ ᐱᓕᕆᑦᑎᐊᕐᓂᕐᓄᑦ ᐃᓄᖕᓂᒃ ᐃᖅᑲᓇᐃᔭᖅᑎᖃᕐᓂᕐᓄᑦ ᐃᖅᑲᓇᐃᔭᖅᑎᑦᑎᓂᕐᓄᑦ ᓄᓇᕘᒥ, ᖁᕕᐊᓲᑎᖃᖅᐳᑦ 10ᓂᒃ ᐊᕐᕌᒍᑖᕐᓂᕐᒥᓂᒃ.

ᓴᓇᔭᐅᓂᕐᒥᓂᑦ 2016ᒥ, ᐱᓕᒻᒪᒃᓴᐃᕕᒃ ᐱᓕᕆᖃᑎᒥᓂᒃ ᐱᓕᕆᖃᑎᖃᖅᓯᒪᕗᑦ ᐃᑲᔪᖅᖢᒋᑦ ᐃᓗᐃᑦᑐᒃᑯᑦ ᒐᕙᓚᒪᓂᑦ ᐊᑐᓕᖅᑎᑕᐅᓂᖓᓄᑦ ᓇᓗᓇᐃᕈᑎᐅᑉ 23 ᓄᓇᕘᒧᑦ ᐊᖏᕈᑎᐅᑉ ᐅᓄᖅᓯᒋᐊᕐᓗᒋᑦ ᐃᓄᐃᑦ ᑭᒡᒐᖅᑐᖅᑕᐅᓂᖏᑦᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᖏᓐᓂ ᓄᓇᕘᒥ.

ᐊᑐᖅᖢᒋᑦ ᐱᓕᒻᒪᒃᓴᐃᕕᐅᑉ ᓯᕗᓕᖅᑎᐅᓂᖓ ᐱᓕᕆᐊᒃᓴᓕᕆᔭᖏᓪᓗ, ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᓄᓇᕘᒥ ᐲᔭᐃᕗᑦ ᐊᒡᕕᐊᕈᑎᓂᒃ ᐱᐅᓯᒋᐊᖅᖢᒋᓪᓗ ᐃᖅᑲᓇᐃᔭᖅᑎᑖᕐᓃᑦ, ᐃᖅᑲᓇᐃᔭᐃᓐᓇᖅᑎᑦᑎᓃᑦ ᓯᕗᒧᐊᖅᑎᑦᑎᓃᑦ ᑐᓴᐅᒪᔭᐅᑎᑦᑎᓃᓪᓗ ᓄᓇᕘᒥ ᐃᓄᖕᓂᒃ. ᒐᕙᒪᖓ ᑲᓇᑕᐅᑉ ᐱᓕᕆᔪᑦ ᓴᓇᓇᓱᒃᖢᑎᒃ ᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᕐᓂᒃ ᓄᓇᕘᒥ ᐃᓄᐃᑦ ᐱᓕᕆᑦᑎᐊᕈᓐᓇᕐᓗᑎᒃ ᐃᓚᐅᓗᑎᒡᓗ ᐳᖅᑐᓛᓂ ᐃᓂᓂ.

ᐅᓄᖅᓯᒋᐊᕐᓗᒋᑦ ᑭᒡᒐᖅᑐᖅᑕᐅᓂᖏᑦᓄᓇᕘᒥ ᐃᓄᐃᑦ ᒐᕙᒪᖓᓂ ᑲᓇᑕᐅᑉ, ᐱᓕᒻᒪᒃᓴᐃᕕᒃ ᐱᓕᕆᖃᑎᖏᓪᓗ ᐃᑲᔪᕈᓐᓇᖅᐳᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᑑᑎᓕᒃᑯᑦ ᓵᓪᓗᒋᑦ ᐱᖃᕆᐊᓕᖏᑦ ᐊᕕᒃᓯᒪᔫᑉ, ᐃᓄᐃᓪᓗ ᐱᔨᑦᑎᕋᖅᑕᐅᓗᑎᒃ ᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᕐᓂ ᑐᑭᓯᑦᑎᐊᖅᑐᒧᑦ ᐅᒃᐱᕆᔭᖏᓐᓂᒃ, ᐊᑐᕆᐊᓕᖏᓐᓂᒃ ᐊᑐᖅᓯᒪᔭᖏᓐᓂᒡᓗ.

2017ᒥᓂᒥᑦ, ᐃᓄᖕᓂᒃ ᐃᖅᑲᓇᐃᔭᖅᑎᖃᕐᓃᑦ ᐅᓄᖅᓯᓯᒪᕗᑦ 37 ᐳᓴᓐᑦᒥᑦ 50 ᐳᓴᓐᑦᒧᑦ ᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᕐᓂ ᓄᓇᕘᒧᑦ ᓄᓇᑖᕐᕕᖓᓂ. ᑖᓐᓇ ᐱᕐᔪᐊᖑᔪᖅ ᓯᕗᒧᐊᕐᓂᖅ, ᑭᓯᐊᓂ ᐃᓄᐃᑦ ᐊᒡᕕᐊᕈᑎᖃᖅᐳᑦ ᓱᓕ. ᐱᓕᒻᒪᒃᓴᐃᕕᒃᑯᑦ ᐱᓕᕇᓐᓇᖅᐳᑦ ᑭᒡᒐᖅᑐᐃᔪᓄᑦ ᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᕐᓂᒃ ᐱᓕᕆᐊᒃᓴᓕᐅᕐᓂᒃᑯᑦ ᐱᕈᖅᓴᐃᔪᒥᒃ ᐃᓕᖅᑯᓯᑐᖃᓂᒃ ᐅᔾᔨᕈᓯᖕᓂᕐᓂᒃ ᑐᑭᓯᓂᕐᓂᒡᓗ ᐃᖅᑲᓇᐃᔭᕐᕕᖕᒥ. ᐱᓕᕆᕝᕕᒃ ᐃᓄᖕᓂᒃ ᐱᕕᖃᖅᑎᑦᑎᔪᖅ ᐃᓕᖅᑯᓯᑐᖃᓄᑦ ᐊᑐᖅᑐᓂᒃ ᐊᔪᕈᓐᓃᖅᓴᓂᕐᓂᒃ ᐃᓕᓐᓂᐊᕐᓂᕐᓄᓪᓗ ᐱᕕᒃᓴᓂᒃ ᐃᑲᔫᑕᐅᓗᑎᒃ ᐃᓚᐅᓂᕐᓄᑦ, ᓯᕗᒧᐊᕐᓗᓂ ᐱᓕᕆᑦᑎᐊᓪᓚᒡᓗᓂᓗ ᒐᕙᒪᑐᖃᒃᑯᑦ ᐃᓄᓕᒫᓄᑦ ᐱᔨᑦᑎᕋᕐᓂᕐᓂ. ᑖᒃᑯᐊ ᐱᓕᕆᔭᐅᔪᑦ ᐃᑲᔪᖅᐳᑦ ᐊᑯᓂᒧᑦ ᐃᖅᑲᓇᐃᔭᖅᑎᓂᒃ ᐊᔪᕈᓐᓃᖅᓴᓂᕐᓄᑦ ᓄᓇᕘᒥ ᐃᑲᔪᖅᖢᑎᒡᓗ ᐊᖏᓂᖅᓴᒃᑯᑦ ᐱᓇᓱᒃᑐᓄᑦ ᐃᓄᐃᑦ ᑮᓇᐅᔭᑎᒍᑦ ᐃᓚᐅᓂᖏᓐᓄᑦ ᐱᑦᑎᐊᓕᒃᑲᓐᓂᕐᓄᓪᓗ.

ᐅᐱᑦᑐᖓ ᒥᓂᔅᑕᐅᒐᒪ ᐱᓕᕆᐊᒃᓴᖃᖅᖢᖓ ᑲᓇᑕᒥ ᐅᑭᐅᖅᑕᖅᑐᓂ ᑮᓇᐅᔭᓕᕆᓂᕐᓄᑦ ᑎᒥᒪᓂᒃ ᐃᓕᓴᕆᓗᒋᓪᓗ ᐱᓕᒻᒪᒃᓴᐃᕕᒃᑯᑦ ᐱᓕᕆᑦᑎᐊᖏᓐᓇᕐᓂᖏᑦ ᐱᓕᕆᓯᒪᔭᖏᓪᓗ. ᖁᕕᐊᓲᑎᒋᑎᓪᓗᑎᒍᑦ 10ᓄᑦ ᐊᕐᕌᒍᑖᕐᓂᖓᑦ, ᐃᓕᓴᕆᔪᒪᔭᒃᑲ ᐊᒃᓱᕉᑕᐅᓯᒪᔪᑦ ᕿᒪᒃᑕᑦᑎᓐᓂᑦ ᐅᓪᓗᒥᓗ ᐱᓕᒻᒪᒃᓴᐃᕕᐅᑉ ᐃᖅᑲᓇᐃᔭᖅᑎᖏᓐᓂᑦ. ᐱᓕᒻᒪᒃᓴᐃᕕᐅᑉ ᐱᓕᕆᔭᖏᑦ ᐊᐅᓚᑕᐅᕗᑦ ᓄᓇᕘᑉ ᐃᓄᖏᓐᓂᑦ ᐃᓄᖏᓐᓅᓪᓗᑎᒡᓗ, ᐃᑲᔪᕐᓂᖏᑦ ᐊᑑᑎᖃᑦᑎᐊᖅᑐᑦ ᓯᕗᓂᒃᓴᑦᑎᐊᕙᐅᓂᖅᓴᐅᑎᓕᐅᕐᓗᓂ ᓄᓇᕘᒧᑦ.