ᒐᕙᒪᒃᑯᖏᑦ ᑲᓇᑕᐅᑉ ᓄᓇᕗᒻᒥ ᐱᒋᐊᖅᑎᒃᓯᔪᑦ ᑎᓴᒪᖓᓐᓂ ᐃᓕᓐᓂᐊᖅᑎᒃᓯᓂᕐᒥᒃ ᐃᓄᐃᑦ ᐃᓕᓐᓂᐊᕐᓂᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᕐᒥᒃ
ᐱᓕᒻᒪᒃᓴᐃᕕᒃ (ᒐᕙᒪᑐᖃᒃᑯᑦ ᐱᓕᕆᕕᖓ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᓄᓇᕗᒻᒥ) ᐋᖅᑭᒃᓱᐃᕙᒃᑐᖅ ᑕᒪᑐᒥᖓ ᐃᖅᑲᓇᐃᔭᕆᐅᖅᓴᖅᑎᒃᓯᓂᕐᒥᒃ ᓴᖅᑮᕙᒃᑐᓂ ᐃᖅᑲᓇᐃᔮᕐᓄᑦ ᑐᕌᖓᓂᖃᖅᑐᓂᒃ ᐱᓕᒻᒪᒃᓴᐃᓂᕐᒥ ᐃᓕᖅᑯᓯᑐᖃᕐᒥᓪᓗ-ᖃᐅᔨᒪᒃᓯᐊᖅᑐᓂᒃ ᐃᓕᓐᓂᐊᕆᐊᕐᓂᕐᒧᑦ ᐱᕕᒃᓴᖃᖅᑎᒃᓯᕙᒃᑐᑦ 10ᓂᑦ ᐃᓄᓐᓄᑦ.
June 27, 2022 — ᐃᖃᓗᐃᑦ, ᓄᓇᕗᑦ — ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᔨᒃᑯᑦ ᐱᓕᕆᕝᕕᖓ
ᒐᕙᒪᒃᑯᖏᑦ ᑲᓇᑕᐅᑉ ᓄᓇᕗᒻᒥ ᐊᓪᓗᕆᐊᕈᑎᖃᓚᐅᖅᑐᑦ ᐱᒻᒪᕆᐅᔪᒥᒃ ᑐᕌᒐᕆᔭᖓᓐᓄᑦ ᐃᖅᑲᓇᐃᔭᕐᕕᐅᓕᕐᓗᑎᑦ ᑭᒡᒐᖅᑐᐃᓗᑎᑦ ᖃᓄᐃᑦᑐᓂᒃ ᐃᓄᖃᕐᓂᖏᓐᓄᑦ ᐱᒋᐊᖅᑎᑕᐅᓂᖓᒍᑦ ᑎᓴᒪᖓᓐᓂ ᐃᓕᓐᓂᐊᖅᑎᒃᓯᓂᕐᒥ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᑎᒍᑦ. ᓯᕗᓕᖅᑕᐅᓪᓗᓂ ᐱᓕᒻᒪᒃᓴᐃᕕᖕᒧᑦ (ᒐᕙᒪᑐᖃᒃᑯᑦ ᐱᓕᕆᕕᖓ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᓄᓇᕗᒻᒥ), ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᖅ ᐃᖅᑲᓇᐃᔭᕆᐅᖅᓴᓂᕐᒧᑦ ᐱᒋᐊᖅᑎᑕᐅᓯᒪᔪᖅ ᓄᓇᕗᑦ ᐃᓄᖏᑦ ᐱᕕᒃᓴᖃᖁᓪᓗᒋᑦ ᐊᔪᕈᓐᓃᖅᓴᕐᓂᕐᒧᑦ, ᐊᔪᕈᓐᓃᖅᓴᕐᓂᐊᖅᑐᑦ, ᖃᐅᔨᒪᓕᖅᐸᓪᓕᐊᓂᐊᖅᑐᑦ ᐅᑉᐱᒋᔭᖃᓕᕐᓗᑎᓪᓗ ᐱᒍᓐᓇᕐᓂᒥᓐᓂ ᒐᕙᒪᒃᑯᓐᓂᒃ ᐃᖅᑲᓇᐃᔭᖅᑎᑕᐅᓪᓗᑎᑦ.
ᑖᖕᓇ 16ᓄᑦ ᑕᖅᑭᓄᑦ ᐱᓕᕆᐊᒃᓴᖅ, ᐃᓗᓕᖃᖅᑐᖅ ᑎᓴᒪᓂᒃ ᐃᖅᑲᓇᐃᔭᖅᑎᑕᐅᕕᖃᕐᓗᑎᑦ ᐊᑯᓂᐅᑎᒋᔪᓂᒃ ᑎᓴᒪᓂᒃ ᐊᑐᓂ, ᐃᖅᑲᓇᐃᔭᕆᐅᖅᓴᓂᕐᒧᑦ ᐱᓕᒻᒪᒃᓴᐃᕙᑦᑐᖅ ᐃᑲᔪᖅᑐᐃᒍᑎᒋᓪᓗᒍ ᒐᕙᒪᒃᑯᖏᑦ ᑲᓇᑕᐅᑉ ᒪᓕᒋᐊᓕᖏᓐᓂᒃ ᐊᑖᓂ ᑎᑎᕋᖅᓯᒪᓂᖓᑕ 23 ᓄᓇᕗᑦ ᐊᖏᕈᑎᖓᓂ ("ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖓᑦ"). ᑎᑎᕋᖅᓯᒪᓂᖓ 23 ᐱᔭᕆᐊᖃᖅᑎᒃᓯᔪᖅ ᑕᒪᒃᑮᖕᓂᒃ ᒐᕙᒪᒃᑯᖏᓐᓂᒃ ᑲᓇᑕᐅᑉ ᐊᒻᒪᓗ ᒐᕙᒪᒃᑯᖏᓐᓂᒃ ᓄᓇᕗᑦ ᑐᕌᒐᖃᕆᐊᖃᖅᑐᑎᑦ ᐃᓄᐃᑦ ᐊᒥᓱᙳᕆᐊᖅᑕᐅᓗᑎᑦ ᐃᖅᑲᓇᐃᔭᖅᑎᑕᐅᓂᕐᒧᑦ ᓄᓇᕗᒻᒥ ᑭᒃᑯᓕᒫᕐᓄᑦ ᐱᔨᑦᑎᕋᖅᑎᐅᔪᓂ ᑭᒡᒐᖅᑐᐃᓕᕐᓗᑎᑦ ᖃᐃᓄᐃᑦᑐᓂᒃ ᐃᓄᖃᕐᓂᖏᓐᓄᑦ ᖁᒃᓯᓕᕇᒃᑐᓕᒫᕐᓂᒃ. ᐃᓄᐃᑦ ᐃᖅᑲᓇᔭᖅᑎᑕᐅᓂᖓᑦ ᓄᓇᕗᒻᒥ ᑭᒃᑯᓕᒫᕐᓂᒃ ᐱᔨᑦᑎᕋᖅᑎᓂ ᐱᕈᖅᐸᓪᓕᐊᒍᑎᐅᔪᖅ ᒪᑭᑎᒃᓯᒋᐊᕐᓂᒃᑯᑦ ᐃᓄᖕᓂᒃ ᐊᒻᒪᓗ ᐃᓚᒋᔭᐅᔪᖅ ᐱᒻᒪᕆᖕᒥᒃ ᑲᓇᑕᐅᑉ ᒪᓕᒋᐊᓕᖏᓐᓂ ᐊᑖᓂ ᓄᓇᕗᑦ ᐊᖏᕈᑎᖓᑕ ᐊᒻᒪᓗ ᐊᑐᕈᒪᓪᓕᕆᒃᓯᒪᔭᖏᑕ ᒪᒥᓴᕐᓂᕐᒧᑦ.
ᐃᓕᓐᓂᐊᖅᑎᑕᐅᔪᑦ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᕐᒥ ᐃᓚᐅᓪᓗᑎᑦ 10 ᐃᓚᐅᑎᑕᐅᔪᑦ ᐱᓯᒪᓪᓗᑎᑦ ᑕᓪᓕᒪᓂᒃ ᓄᓇᓕᓐᓂ ᓄᓇᕗᒻᒥ. ᐱᖃᑕᐅᒍᒪᔪᓄᑦ ᕿᓄᖓᓲᑏᑦ ᐱᔭᐅᓚᐅᖅᑐᑦ ᐅᑭᐊᒃᓵᖓᓂ 2021 ᐃᖅᑲᓇᐃᔭᕐᕕᒃᓴᖏᓐᓄᓪᓗ ᐃᓕᐅᖅᑲᖅᑕᐅᓯᓚᐅᖅᑐᑦ ᐱᓇᓱᐊᕈᓯᖓᓂ ᒫᔾᔨ 28 ᐱᓇᓱᐊᕈᓯᕐᒥᒃ ᐊᑕᐅᓯᕐᒥᒃ ᐃᓱᓕᒃᓯᓚᐅᖅᑎᓪᓗᒋᑦ ᐃᑎᖅᑎᑕᐅᕙᓪᓕᐊᓂᕐᒨᖓᔪᓂᒃ. ᑖᓐᓇ ᐱᓕᕆᐊᒃᓴᖅ ᐊᑐᕆᐊᖅᑎᒃᓯᔪᖅ ᐱᐅᓂᖅᐹᒃᑯᑦ ᐊᑐᖅᑕᐅᒋᐊᕈᓐᓇᖅᑐᓂᒃ ᐱᖁᓯᕗᒑᖅᑕᐅᓯᒪᔪᓂᒃ ᓄᓇᕗᒻᒥ ᐃᓄᐃᑦ ᐃᖅᑲᓇᐃᔭᕆᐊᖅᑎᑕᐅᓂᖏᓐᓄᑦ ᖃᐅᔨᓴᖅᑕᐅᒍᑎᖓᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐊᐱᖅᓱᖅᑕᐅᒍᑎᒋᓯᒪᔭᖏᑦ, ᐱᖃᓯᐅᓪᓗᒋᑦ ᑐᑭᖃᒃᓯᐊᖅᑐᒥᒃ ᐃᓚᐅᑎᑕᐅᓗᑎᑦ ᐃᓄᐃᑦ ᐃᓕᖅᑯᓯᖏᑦ ᐅᖃᐅᓯᖏᓪᓗ. ᑲᑎᓕᒫᖅᑐᒋᑦ 10 ᒐᕙᒪᑐᖃᒃᑯᓐᓂ ᐱᓕᕆᕖᑦ ᑎᒥᐅᔪᐃᓪᓗ ᓄᓇᕗᒻᒥ ᐃᖅᑲᓇᐃᔭᑲᐃᓐᓇᕐᕕᐅᑎᒃᑐᑦ ᑕᒪᒃᑯᓄᖓ ᐃᓕᓐᓂᐊᖅᑎᑕᐅᔪᓄᑦ.
ᑖᓐᓇ ᐱᒋᐊᖅᑎᑕᐅᓂᖓ ᑭᒡᒐᖅᑐᐃᔪᖅ ᒐᕙᒪᒃᑯᖏᑕ ᑲᓇᑕᐅᑉ ᐊᑐᕆᐊᕈᒪᓂᖓᓐᓂ ᓄᑖᙳᕆᐊᕐᓗᒍ, ᑲᓇᑕᓕᒫᕐᒥ, ᒐᕙᒪᐅᖃᑎᒌᒃᑐᓄᑦ, ᐊᒻᒪᓗ ᐃᓄᐃᑦ-ᒐᕙᒪᑐᖃᒃᑯᑦ ᐱᓇᓱᐊᖃᑎᒌᓐᓂᖓᓐᓂ ᐃᓕᑕᖅᓯᓂᒃᑯᑦ ᐱᔪᓐᓇᐅᑎᖃᕐᓂᕐᒥᒃ, ᐱᒃᓯᐊᕈᒪᓂᕐᒥᒃ, ᐱᓕᕆᖃᑎᖃᕈᒪᓂᕐᒥᒃ, ᐊᒻᒪᓗ ᐱᓇᓱᐊᖃᑎᖃᕈᒪᓂᕐᒥᒃ ᑐᙵᕕᐅᓕᕐᓗᑎᑦ ᐊᓯᔾᔨᕐᓂᐅᔪᒧᑦ.
ᐅᖃᐅᓯᐅᔪᑦ
"ᒐᕙᒪᒃᑯᖏᑦ ᑲᓇᑕᐅᑉ ᐱᓕᕆᐊᖃᓪᓚᕆᒃᑐᑦ ᑲᔪᓯᒃᓯᐊᖅᓯᒪᔪᑦ ᐱᕈᖅᐸᓪᓕᐊᑎᑕᐅᓗᑎᑦ ᓲᕐᓗ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᖅ ᐱᓕᕆᐊᖃᖏᓐᓇᕐᓂᐊᖅᑐᑕᓪᓗ ᐃᖅᑲᓇᐃᔭᕐᕕᐅᒍᒪᓂᕐᒧᑦ ᑭᒡᒐᖅᑐᐃᓗᑎᑦ ᖃᓄᐃᑦᑐᓂᒃ ᐃᓄᖃᕐᓂᖏᓐᓄᑦ ᑭᒃᑯᓕᒫᕐᓄᑦ ᐱᔨᑦᑎᕋᕐᕕᐅᔪᓂ ᓄᓇᕗᒻᒥ ᐱᓇᓱᐊᖃᑎᖃᒃᓯᐊᕐᓂᒃᑯᑦ. ᖁᕕᐊᒃᑯᔾᔨᕙᒃᑲ ᐊᑐᓂ ᐃᓚᐅᖃᑕᐅᔪᑦ ᑕᒪᑐᒥᖓ ᐃᓕᓐᓂᐊᖅᑎᒃᓯᒍᑕᐅᓕᕐᒥᔪᕐᒥᒃ ᐱᓕᒻᒪᒃᓴᕐᓂᐊᕐᓕᒪᑕ ᐃᖅᑲᓇᐃᔮᕐᓄᑦ ᑐᕌᖓᓂᖃᖅᑐᓂᒃ ᐊᔪᕈᓐᓃᖅᓴᕐᓗᑎᑦ ᐊᑐᕆᐅᖅᓴᕐᓗᑎᓪᓗ, ᓂᕆᐅᒋᔭᖃᒃᓯᐊᖅᑯᖓᓪᓗ ᑕᑯᓂᐊᕆᐊᖅ ᓄᓇᕗᑦ ᐱᕈᖅᐸᓪᓕᐊᑎᓪᓗᒍᑦ ᓴᙱᓕᕙᓪᓕᐊᓗᓂ ᑭᒃᑯᓕᒫᕐᓄᑦ ᐱᔨᑦᑎᕋᖅᑏᑦ ᑭᒡᒐᖅᑐᐃᕙᓪᓕᐊᑎᓪᓗᒋᑦ ᖃᓄᐃᑦᑐᓂᒃ ᐃᓄᖃᕐᓂᖏᓐᓄ ᐱᔨᑦᑎᕋᕐᕕᒥᓐᓂ. ᐅᐱᒋᕙᒃᑲ ᐃᓚᐅᓚᐅᖅᑐᑦ ᑎᓴᒪᒋᓕᖅᑕᖓᓂᑦ ᐱᕈᖅᐸᓪᓕᐊᑎᓪᓗᒋᑦ ᐃᖅᑲᓇᐃᔮᒧᑦ−ᑐᕌᖓᔪᓂᑦ ᐊᔪᙱᓐᓂᖕᓂᑦ ᐱᓕᕆᓂᖕᓂᓪᓗ, ᓂᕆᐅᒃᐳᖓᓗ ᓄᓇᕘᑉ ᑭᒃᑯᓕᒫᓄᑦ ᐃᖅᑲᓇᐃᔭᖅᑎᖏᑦ ᐱᕈᖅᐸᓪᓕᐊᓂᖏᓐᓂᑦ ᓴᖅᑭᔮᖅᑎᑦᑎᓂᕐᓴᐅᓕᕐᓗᑎᒃ ᐃᓄᖕᓂᑦ ᐱᔨᑦᑎᕋᖅᑕᖏᓐᓂᑦ."
ᓱᓕᔪᑦ ᓇᐃᓈᕐᓗᒋᑦ ᐅᓂᒃᑳᕆᓵᖅᑐᑦ
- ᑲᓇᑕ ᐱᒋᐊᖅᑎᒃᓯᓚᐅᖅᓯᒪᔪᖅ ᐱᓕᒻᒪᒃᓴᐃᕕᖕᒥ (ᒐᕙᒪᑐᖃᒃᑯᑦ ᐱᓕᕆᕕᖓ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᓄᓇᕗᒻᒥ) 2016ᒥ ᐱᒋᐊᖅᑎᒃᓯᒍᑎᖃᖅᑐᓂ ᒐᕙᒪᒃᑯᓕᒫᑦ ᐊᑐᕆᐊᓕᕐᓗᑎᑦ ᐃᓄᖕᓂᒃ ᐃᖅᑲᓇᐃᔭᖅᑎᒃᓯᓂᕐᒥ. ᐊᒡᓚᒡᕕᖃᖃᑕᐅᓪᓗᑎᑦ ᑳᓐᓄᐊᒃᑯᓐᓄ, ᐱᓕᒻᒪᒃᓴᐃᕕᒃ ᑐᒃᑕᕐᕕᐅᓪᓗᓂ ᐱᓕᕆᕕᐅᔪᖅ ᐱᓕᕆᐊᒃᓴᖃᖅᑎᑕᐅᓪᓗᓂ ᐊᑐᓕᖅᑎᒃᓯᓂᕐᒥᒃ ᑎᑎᕋᖅᑕᐅᓯᒪᔪᖅ 23ᒥ.
- ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᖅ ᐱᒋᐊᖅᑎᑕᐅᓚᐅᖅᓯᒪᔪᖅ 2013ᒥ ᐃᖅᑲᓇᐃᔭᕆᐅᖅᓴᒍᑎᐅᓪᓗᓂ. ᑕᐃᒪᙵᓂᒃ ᐱᒋᐊᓚᐅᖅᓯᒪᖕᒪᑦ, ᐱᖓᓱᓂᒃ ᐃᓕᓐᓂᐊᑎᒃᓯᒍᑎᖃᖅᓯᒪᓕᖅᑐᑦ ᐃᓚᐅᖃᑕᐅᔪᓄᑦ ᐱᔭᕇᖅᑕᐅᓯᒪᔪᓂ.
- ᑎᓴᒪᐅᔪᖅᑐᑦ ᓄᓇᕗᒻᒥᐅᑦ ᐃᓄᐃᑦ ᑎᒍᓯᓚᐅᖅᑐᑦ ᐊᑕᐃᓐᓇᖅᑐᒥᒃ ᐃᖅᑲᓇᐃᔮᖃᓕᖅᑐᑎᑦ ᒐᕙᒪᑐᖃᒃᑯᓐᓂ ᓄᓇᕗᒻᒥ ᐃᓚᐅᖃᑕᐅᓚᐅᖅᑎᓪᓗᒋᑦ 2021 ᐃᓕᓐᓂᐊᖅᑎᑕᐅᔪᓄᑦ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᒃᓴᕐᒥ.
- ᒪᑯᐊ ᒪᓕᒃᑐᑦ ᐱᓕᕆᕖᑦ ᑎᒥᐅᔪᓪᓗ ᐃᓕᓐᓂᐊᑎᒃᓯᒍᑎᖃᖅᑐᑦ ᐱᕙᓪᓕᐊᑎᒃᓯᒍᑎᖃᖅᑐᑎᓪᓗ 2022ᒥ ᐃᓕᓐᓂᐊᖅᑎᑕᐅᔪᓄᑦ: ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᑎᒍᑦ ᐱᕙᓪᓕᐊᓂᕐᒧᑦ ᐱᓕᕆᕕᒃ, ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᐃᑦ ᐱᓕᕆᖃᑎᒌᓐᓂᖏᑦ ᐊᒻᒪᓗ ᐃᓄᓕᕆᔨᑐᖃᒃᑯᑦ, ᑕᕆᐅᕐᒥᐅᑕᓕᕆᔨᕐᔪᐊᒃᑯᑦ, ᐊᕙᑎᓕᕆᔨᕐᔪᐊᒃᑯᑦ ᓯᓚᐅᓪᓗ ᐊᓯᔾᔨᐸᓪᓕᐊᓂᖓᓄᑦ ᑲᓇᑕᒥ, ᓄᓇᒦᖔᖅᑐᑦ ᐊᑐᖅᑕᐅᒍᓐᓇᖅᑐᑦ ᑲᓇᑕ, ᒥᕐᖑᐃᓯᕐᕖᑦ ᑲᓇᑕᒥ ᐱᓕᕆᕕᖓ, ᑭᒃᑯᓕᒫᕐᓂᒃ ᐱᔨᑦᑎᕋᕐᓂᕐᒧᑦ ᑮᓇᐅᔭᖅᑑᑎᓕᕆᓂᕐᒧᓪᓗ ᑲᓇᑕᒥ, ᐱᔨᑦᑎᕋᖅᑏᑦ ᑲᓇᑕᒥ, ᑭᒃᑯᓕᒫᕐᓄᑦ ᐃᖅᑲᖅᑐᐃᕕᓕᕆᕕᑦ ᑲᓇᑕᒥ ᐊᒻᒪᓗ ᐅᑭᐅᖅᑕᖅᑐᒥ ᖃᐅᔨᒪᔨᑕᐃᑦ ᑲᓇᑕᒥ.
ᐊᒃᑐᐊᖃᓯᐅᑎᔪᑦ
ᐃᓚᒋᔭᐅᔪᑦ ᑕᐃᑯᙵᕈᑏᑦ
ᑐᑭᓯᒋᐊᕐᕕᐅᔪᓐᓇᖅᑐᑦ
ᑲᐃᔪᓪ ᐋᓚᓐ
ᐊᓪᓚᑦᑎᖓ ᐱᕙᓪᓕᐊᔪᓕᕆᔨᒃᑯᑦ
ᐊᓪᓚᒡᕕᖓ ᒥᓂᔅᑕᖓᑕ ᐅᑭᐅᖅᑕᖅᑐᒥ ᐱᓕᕆᐊᖑᔪᓄᑦ, ᒥᓂᔅᑕ ᒪᓂᕋᕐᒥᐅᑦ ᑮᓇᐅᔭᑎᒍᑦ ᐱᕙᓪᓕᐊᓂᕐᒧᑦ ᑲᓇᑕᒥ, ᐊᒻᒪᓗ ᒥᓂᔅᑕ ᑲᓇᑕᐅᑉ
ᐅᑭᐅᖅᑕᖅᑐᖓᓂ ᑮᓇᐅᔭᑎᒍᑦ ᐱᕙᓪᓕᐊᓂᕐᒧᑦ ᐱᓕᕆᕕᒃ
819-953-1153
ᓗᐊᕋ ᓰᓕ
ᑐᓴᒐᒃᓴᓕᕆᔨᓄᑦ ᐅᖃᐅᔾᔪᐃᔨ
ᑳᓐᓄᐊ
Alexia.Cousins@canada.ca
ᑲᓲᒪᐃᓐᓇᕆᑦ
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: