ᐅᑭᐅᖅᑕᖅᑐᒥ ᓂᕿᔅᓴᓄᑦ ᐊᔭᐅᖅᑐᕈᑏᑦ ᐱᓕᕆᐊᖑᔪᑦ : ᓯᕗᓪᓕᖅᐹᖅᓯᐅᑎ - ᑐᔅᓯᕋᐅᑎᓄᑦ ᐊᑐᐊᒐᑦ

1.1 ᐱᔪᓐᓇᖅᑎᑕᐅᔪᑦ

ᑐᔅᓯᕋᖅᑐᑦ ᐊᑕᐅᓯᕐᒥᑦ ᐃᒪᐃᑦᑑᔭᕆᐊᓖᑦ:

• ᑮᓇᐅᔭᓕᐅᖅᑎᐅᒐᓱᐊᓐᖏᓪᓗᑎᑦ
• ᓄᓇᖃᖅᑳᖅᑐᒥᓃᑦ ᒐᕙᒪᒃᑯᖏᑦ/ᐊᑎᖃᖃᑕᐅᔪᓂᒃ ᑲᑐᔾᔨᖃᑎᒌᑦ, ᓄᓇᓕᓐᓂ ᓇᒻᒥᓂᖃᖅᑐᑦ ᐱᕙᓪᓕᐊᔪᓕᕆᓂᕐᒥᑦ ᐅᕝᕙᓘᓐᓃᑦ ᐊᓯᖏᑦ ᑲᑐᔾᔨᖃᑎᒌᑦ
• ᕼᐊᒻᒪᓚᒃᑯᑦ
• ᖃᐅᔨᓴᖅᑏᑦ
• ᒥᑭᔪᑦ ᐊᑯᓐᓈᕿᔪᓪᓗ ᑎᒥᐅᔪᑦ (SME)

ᐱᔪᓐᓇᖅᑐᑦ ᑐᔅᓯᕋᐅᑎᒧᑦ ᓄᓇᑦᑎᐊᕐᒥᐅᑕᐅᒋᐊᓖᑦ, ᓄᓇᕗᒻᒥ ᔫᑳᒥᓘᓐᓃᑦ, ᐅᕝᕙᓘᓐᓃᑦ ᐱᖃᑕᐅᓗᑎᑦ ᐃᓚᖓᓐᓂᒥᐅᑕᐅᓗᑎᑦ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖓᓐᓂ.

ᓯᕗᓪᓕᖅᐸᐅᔾᔭᐅᒐᔭᖅᑐᑦ ᑕᐃᒃᑯᐊ ᓇᓗᓇᐃᖅᓯᔪᑦ ᐊᑐᐃᓐᓇᐅᑎᑦᑎᒍᓐᓇᕐᓂᖏᓐᓂ ᐱᓕᕆᐊᓂᑦ ᐅᑭᐅᖅᑕᖅᑐᒥ ᐱᖃᑕᐅᔪᒪᔪᓂᒃ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖓᓐᓂ ᓂᕿᔅᓴᖃᖅᑎᑦᑎᒍᓐᓇᕐᓂᖏᓐᓄᑦ.

1.2 ᐊᖏᓂᖅᐹᖏᓐᓂ ᐊᑭᓕᕆᐊᓖᑦ

ᓯᕗᓪᓕᖅᐹᖅᓯᐅᑎᖓᓐᓂ ᐊᖏᓂᖅᐹᕐᓂᑦ ᐊᑭᓕᕆᐊᖃᓐᖏᑦᑐᑦ (ᑮᓇᐅᔭᓕᐅᖅᑎᐅᒐᓱᐊᓐᖏᑦᑐᓄᑦ, ᓄᓇᖃᖅᑳᖅᑐᒥᓂᕐᓄᑦ ᓄᓇᓕᓐᓄᑦ ᐱᕙᓪᓕᐊᔪᓕᕆᔨᓄᑦ, ᖃᐅᔨᓴᖅᑎᓄᑦ ᐅᕝᕙᓘᓐᓃᑦ ᕼᐊᒻᒪᓚᒃᑯᓐᓄᑦ ᐅᕝᕙᓘᓐᓃᑦ ᓄᓇᖃᖅᑳᖅᑐᒥᓃᑦ ᒐᕙᒪᒃᑯᖏᓐᓄ) $250,000−ᖑᔪᖅ.

ᑮᓇᐅᔭᓕᐅᖅᑎᐅᒐᓱᐊᖅᑐᓄᑦ ᑐᔅᓯᕋᖅᑐᓄᑦ ᐅᕝᕙᓘᓐᓃᑦ ᒥᑭᔪᓄᑦ ᐊᑯᓐᓈᕿᔪᓄᓪᓘᓐᓃᑦ ᑎᒥᐅᔪᓄᑦ (SME) ᑐᔅᓯᕋᖅᑐᓄᑦ ᐱᔪᓐᓇᖅᑐᓄᑦ ᑎᑭᓪᓗᒍ $100,000−ᒧᑦ ᐅᑎᖅᑎᒋᐊᑐᓐᖏᑦᑐᓄᑦ ᐅᕝᕙᓘᓐᓃᑦ ᑎᑭᓪᓗᒍ $250,000 ᐱᓗᐊᖅᑐᒥᑦ ᐊᑭᓕᕆᐊᓕᓐᓄᑦ ᑮᓇᐅᔭᓄᑦ.

2.1 ᓯᕗᓪᓕᖅᐸᐅᑎᒋᐊᓖᑦ

ᓯᕗᓪᓕᖅᐸᐅᑎᒋᐊᓖᑦ ᐱᓕᕆᐊᔅᓴᓂᒃ ᐊᔾᔨᐅᖏᑦᑐᓂᒃ ᐋᖅᑭᐅᒪᔾᔪᑎᔅᓴᖃᖅᑐᑦ ᐅᑭᐅᖅᑕᖅᑐᒧᑦ ᐅᕝᕙᓘᓐᓃᑦ ᐅᖓᓯᑦᑐᒥᐅᑕᕐᓄᑦ ᓯᓚᖓ ᐊᔾᔨᐅᖏᑦᑐᖅ, ᓴᖅᑭᖅᑕᐅᔪᓐᓇᖅᑐᑦ ᐅᑭᐅᖅᑕᖅᑐᒧᑦ ᐊᕕᑦᑐᖅᓯᒪᔪᒥ, ᑲᒪᓗᑎᑦ ᐊᑕᐅᓯᕐᒥᑦ ᐅᖓᑖᓄᓪᓘᓐᓃᑦ ᐃᒪᐃᑦᑐᓅᖓᔪᓂᒃ:

• ᓂᕿᓕᐅᖅᑎᓂᑦ\ᓂᕿᔅᓴᖅᓯᐅᕐᓂᕐᒧᑦ
• ᓂᕿᓕᕆᓂᖅ
• ᓂᕿᓂᒃ ᐊᐅᓪᓚᖅᑎᑦᑎᖃᑦᑕᖅᑐᓂᒃ/ᑐᔫᑕᐅᖃᑦᑕᖅᑐᓂᒃ

ᐱᓕᕆᐊᖑᔪᑦ ᑕᒪᒃᑯᓄᖓ ᐊᔾᔨᐅᖏᑦᑐᓄᑦ ᐃᓕᓐᓂᐊᑲᓐᓂᑎᑦᑎᓂᕐᒧᑦ ᐱᕙᓪᓕᐊᓂᕐᒧᓪᓗ ᐃᓱᒪᒋᔭᐅᒋᐊᓛᖅᑐᑦ.

2.2 ᐅᖃᐅᓰᑦ ᑐᑭᖏᑦ ᒪᑭᒪᔾᔪᑕᐅᔪᔅᓴᐃᓪᓗ ᑮᓇᐅᔭᖃᖅᑎᑕᐅᓂᖏᑦ

ᓂᕿᓕᐅᖅᑎᓂᑦ: ᐱᕈᖅᓯᐊᑦ, ᐊᒥᓱᕈᖅᑎᑕᐅᕙᓪᓕᐊᓂᖏᑦ, ᑲᒪᒋᔭᑦᑎᐊᕐᓂᖏᑦ, ᐱᕈᖅᓴᐃᓂᖏᑦ ᐅᕝᕙᓘᓐᓃᑦ ᐸᕐᓇᑕᐅᓂᖏᑦ ᓂᐅᕐᕈᑕᐅᓂᐊᖅᑐᑎᑦ ᐅᕝᕙᓘᓐᓃᑦ ᐃᓄᓐᓄᑦ ᓂᕆᔭᐅᓂᐊᖅᑐᓂᒃ: ᐊᒻᒪᓗ ᐱᓯᒪᔭᐅᓂᐊᖅᑐᓂᒃ, ᑲᒪᒋᔭᐅᓂᐊᖅᑐᓂᒃ, ᐆᒪᔪᓂᒃ ᐊᒥᓱᕈᖅᑎᑦᑎᕙᓪᓕᐊᓂᐊᖅᑐᓂᒃ ᓂᐅᕐᕈᑎᔅᓴᐅᓂᐊᖅᑐᓂᒃ ᐆᒪᔪᕐᓃᓐᖔᖅᑐᓂᒃ ᐅᕝᕙᓘᓐᓃᑦ ᐃᓄᓐᓄᑦ ᓂᕿᔅᓴᓂᒃ ᐊᔭᐅᖅᑐᕈᑕᐅᔪᓐᓇᖅᑐᓂᒃ ᑕᒪᑐᒧᖓ ᑐᕌᖓᓗᒋᑦ.

ᓂᕿᔅᓴᖅᓯᐅᕐᓂᖅ: ᐆᒪᔪᖅᓯᐅᖃᑦᑕᕐᓗᑎᑦ ᓂᕿᔅᓴᐅᓂᐊᖅᑐᓂᒃ ᓄᓇᓕᓐᓂᓪᓗ ᐱᕈᖅᓴᔭᐅᔪᓂᒃ; ᐃᓕᓐᓂᐊᑲᓐᓂᖅᑎᑕᐅᓗᑎᒃ ᐅᕝᕙᓘᓐᓃᑦ ᐊᖏᓪᓕᕙᓪᓕᐊᑎᑕᐅᓗᑎᑦ ᓂᕿᓕᐅᕐᓂᕐᒨᖓᔪᓂᒃ ᐅᕝᕙᓘᓐᓃᑦ ᓂᕿᔅᓴᖅᓯᐅᕈᑕᐅᔪᓂᒃ ᐊᔭᐅᖅᑐᕈᑕᐅᔪᓐᓇᖅᑐᓂᒃ ᑕᒪᑐᒧᖓ ᑐᕌᖓᓗᒋᑦ.

ᓂᕿᓕᕆᓂᖅ: ᐊᓯᔾᔨᖅᑕᐅᑎᓪᓗᒋᑦ ᐆᒪᔪᒥᓃᑦ ᐱᕈᖅᑐᒥᓃᓪᓗ ᓂᐅᕐᕈᑕᐅᓂᐊᕐᓗᑎᑦ ᐅᕝᕙᓘᓐᓃᑦ ᐃᓄᓐᓄᑦ ᓂᕿᔅᓴᓕᐊᖑᓗᑎᑦ; ᐃᓕᓐᓂᐊᑲᓐᓂᖅᑎᑕᐅᓗᑎᑦ ᐅᕝᕙᓘᓐᓃᑦ ᐃᓪᓗᕐᔪᐊᒥᑦ ᓂᕿᓕᕆᕕᔅᓴᒥᑦ ᐱᓇᓱᓪᓗᑎᑦ ᐊᔭᐅᖅᑐᕈᑕᐅᔪᓐᓇᖅᑐᓂᒃ ᑕᒪᑐᒧᖓ ᑐᕌᖓᓗᒋᑦ.

ᓂᕿᓂᒃ ᐊᐅᓪᓚᖅᑎᑦᑎᖃᑦᑕᕐᓂᖅ/ᑐᔫᑕᐅᖃᑦᑕᕐᓂᖏᑦ: ᓄᑦᑕᖅᑕᐅᓂᖏᑦ ᓂᖀᑦ ᓂᐅᕐᕈᑕᐅᓂᐊᖅᑎᓪᓗᒋᑦ ᐅᕝᕙᓘᓐᓃᑦ ᐃᓄᓐᓄᑦ ᓂᕿᔅᓴᐅᓂᐊᖅᑎᓪᓗᒋᑦ; ᐃᓕᓐᓂᐊᑲᓐᓂᕐᓂᖏᑦ ᐅᕝᕙᓘᓐᓃᑦ ᐃᓪᓗᐊᓗᒻᒨᖓᔪᓂᒃ ᓂᕿᓂᑦ ᑐᓂᐅᖅᑲᐃᕕᓐᓂᒃ/ᐅᓯᑲᑦᑕᖅᑕᐃᓂᖏᑦ ᐊᑐᕐᓂᐊᖅᑎᓪᓗᒋᑦ ᐊᔭᐅᖅᑐᕈᑎᔅᓴᓄᑦ ᑐᕌᖓᓗᒋᑦ.

ᐊᔾᔨᐅᖏᑦᑐᑦ: ᐊᔾᔨᐅᖏᑦᑐᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᒍᓐᓇᕐᖓᑕ ᓄᑖᕐᓂᑦ ᑭᓱᑐᐃᓐᓇᓂᑦ ᐃᓕᖅᑯᓯᐅᔪᓂᓪᓘᓐᓃᑦ, ᑭᓯᐊᓂᓕ ᑎᒍᓯᕙᓪᓕᐊᓗᑎᑦ ᐱᑕᖃᕇᖅᑐᓂᒃ ᐃᓕᖅᑯᓯᐅᔪᓂᓪᓘᓐᓃᑦ (ᐱᖃᓯᐅᑎᓪᓗᒋᑦ ᐃᓄᓕᕆᓂᕐᒧᑦ ᐊᔾᔨᐅᓐᖏᑦᑐᑦ ᐅᕝᕙᓘᓐᓃᑦ ᐱᔨᑦᑎᕋᐅᑏᑦ) ᐅᑭᐅᖅᑕᖅᑐᒥ ᐱᓕᕆᐊᖑᔪᓐᓇᖅᑕᓂᒃ ᐅᖓᓯᑦᑐᒥᓪᓘᓐᓃᑦ.

2.3 ᐱᓕᕆᐊᓄᑦ ᐃᓱᒪᒋᔭᐅᔭᕆᐊᓖᑦ

ᐱᔪᓐᓇᕐᓗᑎᑦ ᐱᓕᕆᐊᖑᔪᖅ ᓈᒻᒪᒃᑲᓗᐊᖅᑲᑦ ᐅᑭᐅᖅᑕᖅᑐᒧ ᓂᕿᔅᓴᓄᑦ ᐊᔭᐅᖅᑐᕈᑎᒧᑦ ᐱᓕᕆᐊᒧᑦ, ᐅᑯᐊ ᐃᓱᒪᒋᓂᐊᖅᑲᑎᑦ:

• ᐱᓕᕆᐊᖑᔪᖅ ᐋᖅᑭᔅᓯᒪᕙ ᐅᕝᕙᓘᓐᓃᑦ ᓄᑖᕐᓂᑦ ᓴᖅᑮᕙ ᐅᕝᕙᓘᓐᓃᑦ ᑲᒪᒋᔭᐅᕙᑦ (ᓲᕐᓗ ᐃᓄᓕᕆᓂᕐᒨᖓᔪᓂᒃ ᐊᔾᔨᐅᖏᑦᑐᓂᒃ ᐅᕝᕙᓘᓐᓃᑦ ᓄᑖᕐᓂᑦ ᐱᔨᑦᑎᕈᑎᑕᖃᕐᓂᐊᖅᑲᑦ)?
• ᐱᓕᕆᐊᖑᔪᖅ ᐊᖏᓪᓕᕚᓪᓕᑎᑦᑎᕙ ᐅᕝᕙᓘᓐᓃᑦ ᐱᐅᓯᕚᓪᓕᑎᑦᑎᕙ ᐱᑕᖃᕇᖅᑐᓂᒃ ᐅᕝᕙᓘᓐᓃᑦ ᐊᖏᓪᓕᕚᓪᓕᑎᑦᑎᕙᑦ ᐱᔪᓐᓇᕐᓗᑎᑦ ᐅᑭᐅᖅᑕᖅᑐᒥᐅᑦ ᓴᖅᑮᓇᓱᐊᕐᓂᖏᓐᓂ, ᐊᓯᕙᕈᓐᓇᕐᓂᖏᓐᓂ, ᑐᓂᐅᖅᑲᐃᒍᓇᕐᓂᖏᓐᓂ, ᐋᑦᑎᒍᓐᓇᕐᓂᖏᓐᓂ, ᑐᖅᑯᐃᔪᓐᓇᕐᓂᖏᓐᓂᓪᓘᓐᓃᑦ ᓂᕿᓂᑦ ᐃᓄᓕᑕᕐᓂᑦ?

ᐊᐱᖅᑯᑎᒧᑦ ᑭᐅᓐᓂᕈᕕᑦ "ᐋᒡᒐ", ᐱᓕᕆᐊᖑᔪᖅ ᐊᓯᐊᓄᖔᖅ ᐱᓕᕆᐊᔅᓴᒧᑦ ᑐᕌᖓᖔᖅᐸᓪᓚᐃᔪᑦ ᑳᓄᐊᒃᑯᓐᓄᑦ (CanNor).

3.1 ᓂᕈᐊᖅᓯᖃᑦᑕᕐᓂᖏᑦᑕ ᐃᓕᖅᑯᓯᖏᑦ

ᓂᕈᐊᖅᓯᖃᑦᑕᕐᓂᖏᓐᓂ ᐃᓕᖅᑯᓯᖏᑦ ᓇᓗᓇᐃᖅᑕᐅᓯᒪᔪᑦ ᑕᒫᓂᖃᐃ ᑎᓴᒪᐅᔪᖅᑐᓂᒃ ᐱᓕᕆᐊᓂᒃ ᑮᓇᐅᔭᖃᖅᑎᑦᑎᒐᔭᖅᑐᑦ ᓯᕗᓪᓕᖅᐹᖅᓯᐅᑎᖓᓐᓂ ᑳᓄᐊᒃᑯᑦ (CanNor) ᐅᑭᐅᖅᑕᖅᑐᒥ ᓂᕿᔅᓴᓄᑦ ᐊᔾᔨᐅᖏᑦᑐᓄᑦ ᐊᔭᐅᖅᑐᕈᑎᐅᔪᒥᑦ.

ᑐᔅᓯᕋᖅᑐᓕᒫᑦ ᕿᒥᕐᕈᔭᐅᔅᓴᐃᓐᓇᕆᐊᓖᑦ ᐱᓕᕆᐊᓪᓗ ᐱᔪᓐᓇᕐᓂᖏᓐᓂ ᒪᓕᒐᕐᓂᑦ ᒪᓕᒋᐊᖃᖅᑐᑦ.

ᑐᔅᓯᕋᖅᑐᑦ ᒪᓕᒋᐊᓖᑦ ᒪᓕᒐᕐᓂᑦ ᐱᔪᓐᓇᕐᓂᖏᓐᓄᑦ ᕿᒥᕐᕈᔭᐅᓗᑎᒃ ᐱᔭᕇᖅᓯᒪᓂᖏᑦ ᒪᓕᓪᓗᒋᑦ ᐱᓕᕆᐊᖏᓐᓂ ᓇᓗᓇᐃᖅᓯᒪᔭᖏᓐᓂ ᐃᑲᔫᑎᖃᓪᓚᕆᓐᓂᐊᖅᑲᑕ ᐊᒻᒪᓗ ᓇᓗᓇᐃᖅᑕᐅᔪᓐᓇᕐᓗᑎᑦ ᓴᖅᑭᖅᑕᐅᓗᑎᓪᓗ ᐊᐃᑉᐸᖓᓐᓅᕈᓇᕐᓂᖏᓐᓄᑦ ᐊᔅᓱᕉᑎᔅᓴᓅᖓᔪᓂᒃ.

ᑐᔅᓯᕋᖅᑐᓕᒫᑦ ᖃᐅᔨᒃᑲᖅᑕᐅᒐᔭᖅᑐᑦ ᐅᖃᐅᔾᔭᐅᓗᑎᓪᓗ ᖃᓄᖅ ᐃᓱᒪᓕᐅᕐᒪᖔᑕ, ᖃᖓᒃᑯᓪᓗ ᐃᓱᒪᓕᐅᕋᔭᕐᒪᖔᑕ ᓇᓗᓇᐃᖅᓯᕕᐅᓗᑎᒃ.

3.2 ᓯᕗᓪᓕᖅᐹᖅᓯᐅᑎ ᐊᔭᐅᖅᑐᕈᑎᓄᑦ ᓂᕈᐊᖃᑦᑕᕐᓂᖏᓐᓄᑦ ᒪᓕᒐᐃᑦ

ᐅᑭᐅᖅᑕᖅᑐᒥ ᓂᕿᔅᓴᓄᑦ ᐊᔭᐅᖅᑐᕈᑎᐅᔪᖅ: ᓯᕗᓪᓕᖅᐹᖅᓯᐅᑎ ᕿᒥᕐᕈᔭᐅᒐᔭᖅᑐᑦ ᐃᒪᐃᑦᑐᓂᑦ ᒪᓕᒐᕐᓂᑦ ᒪᓕᓪᓗᑎᑦ.

3.3 ᑐᔅᓯᕋᕐᓂᖏᑦ ᐊᓯᒃᑲᓐᓂᖏᓐᓂ ᑐᑭᓯᒋᐊᕈᑎᓂᒃ

ᐱᔭᐅᕙᓪᓕᐊᓕᖅᑎᓪᓗᒋᑦ ᕿᒥᕐᕈᔭᐅᕙᓪᓕᐊᓕᖅᑎᓪᓗᒋᓪᓗ, ᑳᓄᐊᒃᑯᑦ (CanNor) ᐊᓪᓚᕕᖓᓐᓂ ᐅᖄᓚᕕᐅᒐᔭᖅᑐᖅ ᑐᑭᓯᒋᐊᕈᑎᒃᑲᓂᕐᓂᑦ ᐱᔪᒪᓐᓂᖅᑲᑕ.

3.4 ᐅᑭᐅᖅᑕᖅᑐᒥ ᓂᕿᔅᓴᓄᑦ ᐊᔭᐅᖅᑐᕈᑏᑦ: ᓯᕗᓪᓕᖅᐹᖅᓯᐅᑎ – ᑐᔅᓯᕋᖅᑐᑦ ᐊᖏᖅᑕᐅᔪᑦ

ᑐᔅᓯᕋᖅᑐᑦ ᐱᔭᕇᖅᓯᑦᑎᐊᖅᑐᒥᓃᑦ ᐅᑭᐅᖅᑕᖅᑐᒥ ᓂᕿᔅᓴᓄᑦ ᐊᔭᐅᖅᑐᕈᑎᓄᑦ: ᓯᕗᓪᓕᖅᐹᖅᓯᐅᑎᖓᓐᓂ ᑐᓂᓯᖁᔭᐅᒐᔭᖅᑐᑦ ᓈᒪᔪᓂᒃ ᑐᔅᓯᕋᐅᑎᒥᑦ ᐅᑭᐅᖅᑕᖅᑐᒧ ᓂᕿᔅᓴᓄᑦ ᐊᔭᐅᖅᑐᕈᑎᒧᑦ: ᐊᐃᑉᐸᖓᓐᓂ 2023−ᒥᑦ. ᑮᓇᐅᔭᖃᖅᑎᑕᐅᒍᓐᓇᕋᕙᖅᑐᑎᑦ ᐃᓱᖃᖅᑐᒥᑦ ᐊᐃᑉᐸᖓᓃᓕᖅᑎᓪᓗᒋᑦ $1−ᒥᓕᐊᓂᒃ ᐱᓕᕆᐊᔅᓴᓄᑦ ᐊᑐᓂ.

ᖃᐅᔨᒪᔭᐅᒋᐊᓕᒃ: ᓯᕗᓪᓕᖅᐹᖅᓯᐅᑎᒥᑦ ᑮᓇᐅᔭᖅᑖᕋᓱᐊᕐᓗᓂ ᐱᔅᓴᐃᓐᓇᕆᐊᖃᓐᖏᑦᑐᖅ ᐊᐃᑉᐸᖓᓐᓄᑦ ᑮᓇᐅᔭᓂᒃ.

ᑐᔅᓯᕋᖅᑐᑦ ᐊᒻᒪᓗ ᖃᐅᔨᒋᐊᕐᕕᐅᔪᓐᓇᖅᑐᑦ ᒥᔅᓵᓅᖓᔪᑦ

ᑐᔅᓯᕋᖅᑐᑦ ᐃᓕᓴᕆᔭᐅᓯᒪᔪᑦ ᐊᑎᖓ: ᒪᓕᒐᖅᑎᒍᑦ ᐃᓕᓴᕆᔭᐅᓯᒪᔪᖅ ᐊᑎᖓ ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᓇᒻᒥᓂᖃᖅᑎᐅᔫᑉ ᐊᑎᓕᐅᖅᓯᒪᓂᖓ ᑎᒥᐅᔪᕐᓘᓐᓃᑦ. ᐊᔾᔨᒋᓐᖏᑐᐃᓐᓇᕆᐊᖃᕐᒥᔭᖓ ᑲᑐᔾᔨᖃᑎᒌᑦ ᐊᐅᓚᔾᔪᑎᖓᑕ ᐊᑎᖓ (ᓲᕐᓗ ᒪᓕᒐᖅᓯᑎᒍᑦ 123456 Northern Ltd−ᖑᓪᓗᓂ), ᐊᐅᓚᑦᑎᔾᔪᑎᖓ ᑭᒃᑯᑐᐃᓐᓇᕐᓅᖓᔪᖅ ᐃᒪᐃᑦᑑᓪᓗᓂ ABC Moving Services).

ᐱᓕᕆᐊᔅᓴᐅᑉ ᐊᑎᖓ: ᓇᐃᑦᑐᒥᑦ ᓇᓗᓇᐃᖅᓯᓗᑎᑦ, ᓇᓗᓇᕋᓱᓐᖏᑦᑎᐊᕐᓗᒍ ᒪᓕᑦᑎᐊᕐᓗᓂᓗ ᐊᑎᖓᓐᓂ ᐱᓕᕆᐊᔅᓴᒥ ᐅᖃᖅᓯᒪᔪᒥ. ᖃᓄᐃᑦᑑᒻᒪᖔᕐᓗ ᐃᑲᔫᑎᔅᓴᐃᑦ ᐊᑎᖓ ᒪᓕᑦᑐᒍ (ᓲᕐᓗ ᓄᓇᓕᓐᓂ ᓂᕿᔅᓴᑭᖃᑦᑕᖅᑐᓄᑦ ᖃᐅᔨᓴᐅᑏᑦ, ᐱᐅᓯᕚᓪᓗᖁᓗᒋᑦ ᓂᕿᓂᑦ ᑲᑐᔾᔨᓂᕐᓄᑦ ᐃᑲᔫᑎᓂᒃ, ᐊᖏᓪᓕᒋᐊᕐᓗᒋᑦ ᓂᕿᓂᑦ ᑐᓂᐅᖅᑲᐃᖃᑦᑕᕐᓂᖏᓐᓄᑦ).

ᓯᕗᓪᓕᖅᐹᖅ ᖃᐅᔨᒋᐊᕐᕕᐅᔪᓐᓇᖅᑑᑉ ᐊᑎᖓ: ᑎᑎᕋᕐᓗᒍ ᓯᕗᓪᓕᖅᐹᖅ ᖃᐅᔨᒋᐊᖅᑕᐅᔪᓐᓇᖅᑐᖅ ᑭᒡᒐᖅᑐᐃᔨᐅᒐᔭᖅᑐᖅ ᓇᒻᒥᓂᕆᔭᐅᔪᒥᑦ ᑲᑐᔾᔨᖃᑎᒌᒻᒥᓪᓘᓐᓃᑦ. ᑖᓐᓇ ᑐᑭᓯᒋᐊᖅᑕᐅᖅᑳᖏᓐᓇᖃᑦᑕᕋᔭᖅᑐᖅ ᑐᔅᓯᕋᐅᑎᐅᑉ ᒥᔅᓵᓅᖓᔪᓂᑦ.

ᐅᖄᓚᐅᑎᖓᑕ ᓈᓴᐅᑎᖓ: ᑎᑎᕋᕐᓗᒍ ᓯᕗᓪᓕᖅᐹᖅ ᑐᑭᓯᒋᐊᕐᕕᐅᑉ ᐅᖄᓚᐅᑎᖓ, ᐱᖃᓯᐅᑎᓗᒋᓪᓗ ᓯᕗᓪᓕᖅᐹᑦ ᐱᖓᓱᑦ ᓈᓴᐅᑎᖏᑦ.

ᖃᕋᓴᐅᔭᒃᑯᑦ ᑐᕌᕈᑎᖓ: ᐱᖃᓯᐅᑎᓗᒋᑦ ᖃᕋᓴᐅᔭᒃᑯᑦ ᑐᕌᕈᑎᖓ ᑐᑭᓯᒋᐊᕐᕕᐅᖅᑳᕋᔭᖅᑐᖅ (ᑭᒃᑯᑐᐃᓐᓇᕐᓅᖓᓐᖏᑦᑐᒥᑦ).

ᑐᔅᓯᕋᖅᑑᑉ ᐃᖅᑲᓇᐃᔭᕐᕕᖓᑕ ᐅᖄᓚᐅᑎᖓ: ᐃᖅᑲᓇᐃᔭᕐᕕᐅᑉ ᓈᓴᐅᑎᖓ 9−ᓂᒃ ᓈᓴᐅᑎᓕᒃ ᑐᓂᔭᐅᓯᒪᔪᒥᑦ ᑲᓇᑕᒥ ᑕᒃᓰᔭᕈᑎᒃᑯᓐᓂ. ᐊᔪᕐᓇᖏᑉᐸᑦ ᑎᑎᕋᕐᓗᒍ.

ᖃᓄᐃᑦᑑᓂᖓ ᑐᔅᓯᕋᖓ:: ᑖᒃᑯᐊ ᐱᒻᒪᕆᐅᒻᒪᑕ ᑐᔅᓯᕋᐅᑎ ᐱᔪᓐᓇᕋᔭᕋᓗᐊᕐᒪᖔᖅ ᓇᓗᓇᐃᖅᓯᔾᔪᑕᐅᔪᑦ.

• ᓄᓇᖃᖅᑳᖅᑐᒥᓃᑦ ᒐᕙᒪᒃᑯᑦ
• Hᐊᒻᒪᓚᒃᑯᑦ
• ᓄᓇᓕᓐᓂᑦ ᓇᒻᒥᓂᖃᖅᑏᑦ ᑲᑐᔾᔨᖃᑎᒌᖏᑦ
• ᓯᓚᑦᑐᖅᓴᕐᕕᒃ
• ᐊᓪᓚᐃᑦ, ᐃᓄᐃᑦ ᐃᖅᑭᓖᓪᓘᓐᓃᑦ
• ᑮᓇᐅᔭᓕᐅᕋᓱᐊᖅᑎᐅᓐᖏᑦᑐᑦ
• ᑮᓇᐅᔭᓕᐅᕋᓱᐊᖅᑏᑦ
• ᐊᕐᓇᓄᑦ ᓇᒻᒥᓂᖅ/ᐊᐅᓚᑕᐅᔪᖅ
• ᐃᓅᓱᑦᑐᓄᑦ ᓇᒻᒥᓂᖅ/ᐊᐅᓚᑕᐅᔪᖅ
• ᐃᓄᓕᕆᓂᕐᒧᑦ ᑎᒥᐅᔪᖅ

ᓇᓗᓇᐃᕐᓗᒍ ᑲᑐᔾᔨᖃᑎᒌᑦ ᐱᓕᕆᐊᖏᓪᓗ: ᓇᐃᑦᑐᒥᑦ ᓇᓗᓇᐃᖅᓯᓗᑎᑦ ᑲᑐᔾᔨᖃᑎᒌᑦ ᐱᓕᕆᐊᔅᓴᖏᓐᓂ. ᑖᒃᑯᐊ ᐊᑐᖅᑕᐅᒐᔭᖅᑐᑦ ᖃᐅᔨᒐᓱᐊᕐᓗᑎᑦ ᑐᔅᓯᕋᐅᑎᖓᓐᓂ ᐱᔭᔅᓴᖏᓐᓄᑦ ᒪᓕᒃᑲᓗᐊᕐᒪᖔᑕ ᐱᓕᕆᐊᕆᔭᖏᓐᓄᑦ ᑮᓇᐅᔭᖃᖅᑎᑦᑎᔫᑉ.

ᐱᓕᕆᐊᔅᓴᐅᑉ ᒥᔅᓵᓅᖓᔪᖅ

ᐱᓕᕆᐊᔅᓴᖅ ᓇᒦᓐᓂᖓ (ᓄᓇᓕᒃ): ᓄᓇᓕᐅᑉ ᐊᑎᖓ ᑎᑎᕋᕐᓗᒍ ᓄᓇᓖᓪᓗᓐᓃᑦ ᐱᓕᕆᐊᔅᓴᖅ ᑲᒪᒋᔭᐅᓂᐊᕐᓂᖓᓐᓂ ᑕᐃᑲᓂ. ᐊᒥᓱᑲᓪᓚᓐᓂᒃ ᓄᓇᓕᓐᓃᓐᓂᐊᖅᑐᓂᒃ, ᓇᓗᓇᐃᕐᓗᒋᑦ ᐊᒥᓲᓂᖏᑦ ᓄᓇᓖᑦ (ᓲᕐᓗ 7−ᓂᒃ ᓄᓇᕗᒻᒥ ᓄᓇᓕᓐᓂᑦ). ᖃᐅᔨᒪᔭᐅᒋᐊᓕᒃ ᓯᕗᓪᓕᖅᐹᖅᓯᐅᑎᒥᑦ ᐱᓕᕆᐊᖑᔪᒥᑦ ᓄᓇᓕᐅᑉ ᓯᓚᑖᓃᓐᖔᑐᐃᓐᓇᕆᐊᓕᒃ ᐊᐃᑉᐸᖓᓐᓂ ᑲᒪᓕᖅᑎᓪᓗᒋᑦ. ᓇᓗᓇᐃᑦᑎᐊᕐᓗᒋᑦ ᓇᒥ ᑲᒪᒋᔭᐅᒐᔭᕐᒪᖔᑖ ᓯᕗᓪᓕᖅᐹᖅᓯᐅᑎᖏᓐᓂ ᐊᒻᒪᓗ ᓇᒥ ᐊᐃᑉᐸᖓᓐᓂ ᑲᒪᒋᔭᐅᓂᐊᕐᒪᖔᑖ.

ᐱᒋᐊᕐᕕᔅᓴᖓ ᐅᓪᓗᖓ ᐃᓱᓕᕝᕕᔅᓴᖓᓪᓗ: ᐱᒋᐊᕐᕕᒋᓂᐊᖅᑕᖓ ᐃᓱᓕᕝᕕᒋᓂᐊᖅᑕᖓᓪᓗ ᐅᓪᓗᐃᑦ ᐱᓕᕆᐊᖑᓂᐊᖅᑐᒥᑦ ᐊᑭᓐᓂ ᒥᔅᓴᐅᓴᓪᓗᒋᑦ ᐱᒋᐊᕐᕕᔅᓴᖓᓐᓂ ᐃᓱᓕᕝᕕᔅᓴᖓᓐᓄᑦ.

ᐊᔅᓱᕉᑕᐅᔪᑦ ᐱᓕᕆᐊᓄᑦ: ᓇᓗᓇᐃᔭᖅᑕᐃᓐᓇᕆᓗᒋᑦ ᐊᑑᑎᔪᓂᒃ ᐱᓕᕆᐊᓄᑦ. ᐱᓕᕆᐊᖅ ᑕᑯᓐᓇᓂᖅᓴᐅᒻᒪᑦ ᓂᕿᔅᓴᖃᕐᓂᕐᒧᑦ ᑎᑎᕋᖅᑕᐅᓯᒪᓐᖏᑦᑐᓂᒃ, ᓇᓗᓇᐃᔭᕐᓗᒋᑦ "ᐊᓯᐊ" ᐊᒻᒪᓗ ᓇᓗᓇᐃᑦᑕᓕᖅᑲᑦ ᖃᓄᖅ ᓂᕿᔅᓴᖃᑦᑎᐊᕐᓂᒨᖓᒐᔭᕐᒪᖔᑕ.

ᖃᓄᐃᑦᑑᒻᒪᑕ ᓂᕿᔅᓴᑭᖃᑦᑕᓂᕐᒧᑦ ᐊᔅᓱᕉᑕᐅᔪᑦ ᐋᖅᑭᒋᐊᕆᐊᓖᑦ? ᐅᓂᒃᑳᕆᑦᑎᐊᕐᓗᒋᑦ ᓂᕿᔅᓴᖃᕐᓂᕐᒨᖓᔪᑦ ᐊᔅᓱᕉᑕᐅᔪᑦ ᐋᖅᑭᒋᐊᖅᑕᐅᒐᔭᕐᓂᖏᓐᓂ ᐱᓕᕆᐊᔅᓴᓯᓐᓂ.

ᓇᓗᓇᐃᔭᕐᓗᒋᑦ ᖃᓄᖅ ᐱᓕᕆᐊᖑᔪᖅ ᐋᖅᑭᒋᐊᕆᒐᔭᕐᖓᑦ ᐊᑲᐅᓐᖏᓕᐅᕈᑎᒥᒃ: ᓇᓗᓇᐃᔭᕐᓗᒋᑦ ᖃᓄᖅ ᓯᕗᓪᓕᖅᐹᖅᓯᐅᑎ ᐱᓕᕆᐊᔅᓴᐅᔪᖅ ᐃᑲᔪᖅᑐᐃᒐᔭᕐᒪᖔᖅ ᖃᓄᖅᑑᕈᑎᓂᒃ ᐱᒋᐊᕈᑕᐅᓯᒪᔪᓂᓪᓗ ᐆᑦᑐᕋᖅᑕᐅᓯᒪᔪᓂᒃ ᐋᖅᑭᐅᒪᔾᔪᑎᔅᓴᐅᔪᓂᒃ. ᐆᑦᑑᑎᖃᕐᓗᑎᑦ ᐱᓕᕆᐊᔅᓴᕆᔭᕐᓂᑦ ᑮᓇᐅᔭᖃᖅᑎᑕᐅᑉᐸᑦ ᐱᖃᓯᐅᑎᓗᒋᑦ ᐃᒪᐃᑦᑐᑦ: ᑲᔪᓯᕙᓪᓕᐊᑎᑕᐅᓂᖏᑦ, ᑭᒃᑯᑦ ᖃᐅᔨᓴᖅᑕᐅᓂᐊᕐᒪᖔᑖ, ᓄᓇᓕᓐᓂ ᐊᑐᖅᑲᐅᓂᖏᑦ, ᓇᓗᓇᐃᖅᑕᐅᓂᖏᓪᓗ ᐱᔭᐅᓂᖏᓐᓄᑦ, ᖃᐅᔨᓴᐅᑎᓅᖓᔪᓄᓪᓗ ᐊᑐᕆᐊᓕᓐᓄᑦ, ᐆᑦᑐᕋᖅᑕᐅᓂᖏᓐᓂ ᐊᐅᓚᑦᑎᓂᐊᖅᑎᓪᓗᒋᑦ ᐊᕙᑎᑦᑎᓐᓂ.

ᖃᓄᖅ ᐃᑲᔫᑎᖃᕋᔭᖅᑲᑦ ᐃᓪᓗᖃᑎᒌᓐᓄᒃ, ᓄᓇᓕᓐᓂᑦ ᐅᑭᐅᖅᑕᖅᑐᒥᓗ ᐊᕕᑦᑐᖅᓯᒪᔪᓂᒃ? ᓱᒻᒪᑦ ᑳᓄᐊᒃᑯᑦ ᑕᒪᑐᒥᖓ ᐱᓕᕆᑎᑦᑎᒋᐊᖃᕋᔭᖅᑲᑦ? ᐅᓂᒃᑳᕐᓗᑎᑦ ᖃᓄᖅ ᐱᓕᕆᐊᖑᔪᖅ ᑲᔪᓯᓂᖓᓐᓂ ᐃᑲᔫᑎᖃᕐᓂᐊᕐᒪᖔᖅ ᐅᑭᐅᖅᑕᖅᑐᒥᐅᑕᕐᓄᑦ ᐃᓪᓗᖃᑎᒌᓐᓄᑦ, ᓄᓇᓕᓐᓄᑦ ᐊᓯᖏᓐᓄᓪᓗ, ᑲᓇᑕᐅᑉ ᐅᑭᐅᖅᑕᖅᑐᖓᓐᓂ. ᑐᔅᓯᕌᓂᔭᕐᓂᑦ ᑭᓱᖏᓐᓂ, ᐱᔨᑦᑎᕋᐅᑎᖏᓐᓂ ᐅᕝᕙᓘᓐᓃᑦ ᐊᐅᓚᑦᑎᓂᖏᓐᓂ ᐊᑐᐃᓐᓇᖅᑕᖃᕇᖅᑲᑦ ᐅᕝᕙᓘᓐᓃᑦ ᐊᓯᖏᓐᓄ ᑲᑐᔾᔨᖃᑎᒌᓐᓂᑦ ᐱᑕᖃᕇᖅᑲᑦ ᐅᕝᕙᓘᓐᓃᑦ ᓇᒻᒥᓂᖃᖅᑎᐅᔪᒥᑦ ᑲᒻᐸᓂᐅᔪᒥᑦ, ᓇᓗᓇᐃᔭᕐᒥᓗᒋᑦ ᖃᓄᖅ ᐱᓕᕆᐊᖑᔪᖅ ᐃᑲᔫᑎᖃᒃᑲᓐᓂᕋᔭᕐᒪᖔᖅ, ᐱᖃᓯᐅᑎᓗᒋᑦ ᓄᑖᑦ ᐅᕝᕙᓘᓐᓃᑦ ᐊᖏᓪᓕᒋᐊᖅᑕᐅᔪᓐᓇᕐᓂᖏᑦ.

ᖃᓄᖅ ᐊᔾᔨᐅᖏᑦᑐᓕᒍᓐᓇᕐᖓᑦ ᑕᒪᓐᓇ ᐱᓕᕆᐊᖅ: ᓇᓗᓇᐃᔭᑦᑎᐊᕐᓗᒋᑦ ᖃᓄᖅ ᓱᒻᒪᓪᓗ ᐱᓕᕆᐊᖑᓂᐊᖅᑐᖅ ᐊᔾᔨᐅᖏᑦᑑᓂᐊᕐᓂᖓᓐᓂ. ᐊᔾᔨᐅᖏᑦᑐᒥᑦ ᐊᑐᕐᓂᐊᖅᑲᑕ ᐊᓯᖏᓐᓂᓪᓕ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ ᐊᒻᒪᓗ ᐱᓕᕆᐊᖑᔪᖅ ᖃᓄᐃᑦᑑᓂᐊᕐᓂᖓᓐᓂ ᐅᑭᐅᖅᑕᖅᑐᒥ ᓯᓚᖓᓐᓂ ᒪᓕᓪᓗᑎᑦ ᐅᖓᓯᓐᓂᖏᓐᓄᑦ, ᓇᓗᓇᐃᕐᒥᓗᒋᑦ ᖃᓄᖅ ᒫᓐᓇ ᐊᑐᖅᑕᐅᔪᑦ ᓱᒻᒪᓪᓗ ᐊᔾᔨᐅᖏᑦᑑᒻᒪᖔᑕ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ.

ᓇᓗᓇᐃᔭᑲᐃᓐᓇᒐᓛᒍᒃ ᖃᐅᔨᓴᕐᓂᐅᒐᔭᖅᑐᖅ (ᓄᓇᓕᓐᓂᑦ ᓯᓚᑦᑐᖅᓴᕐᕕᒥᓪᓘᓐᓃᑦ) ᐃᑲᔪᖅᑐᐃᒐᔭᖅᑐᖅ ᐱᓕᕆᐊᒧᑦ: ᓇᓗᓇᐃᔭᕐᓗᒋᑦ ᖃᐅᔨᓴᕐᓂᐅᓂᐊᖅᑐᑦ, ᓄᓇᖃᖅᑳᖅᑐᒥᓂᕐᓂᑦ ᐊᒻᒪᓘᓐᓃᑦ ᓄᓇᓕᓐᓂ ᖃᐅᔨᒪᔭᑐᖃᕐᓂᑦ ᐊᑑᑎᖃᑕᐅᔪᓂᒃ ᐱᓕᕆᐊᒨᖓᔪᓂᒃ (ᓂᕿᓅᖓᔪᓂᒃ ᐊᔾᔨᐅᖏᑦᑐᓂᑦ ᐅᕝᕙᓘᓐᓃᑦ ᒪᑭᒪᔾᔪᑎᔅᓴᓂᒃ), ᖃᓄᐃᑦᑑᓂᖏᓐᓂ ᓴᓇᓯᒪᓂᖏᓐᓄᓂ ᐊᒻᒪᓘᓐᓃᑦ ᖃᓄᐃᓖᕐᓂᖏᓐᓂ.

ᓇᓗᓇᐃᔭᖅᓯᒪᔪᑦ: ᓯᕗᓪᓕᖅᐹᖅᓯᐅᑎ ᐱᓕᕆᐊᖑᔪᖅ ᖃᖓᒃᑰᒐᔭᕐᓂᖏᓐᓂᓪᓗ:

ᓇᓗᓇᐃᔭᑦᑎᐊᕐᓗᒋᑦ ᖃᖓᒃᑰᒐᔭᕐᓂᖏᓐᓂᓪᓗ ᐱᓕᕆᐊᔅᓴᒧᑦ ᐱᔭᕇᕐᕕᔅᓴᖓᓐᓂ ᓯᕗᓪᓕᖅᐹᖅᓯᐅᑎ. ᐊᑐᓂ ᑎᑎᕋᕐᕕᓐᓂ, ᓇᓗᓇᐃᖅᓯᓗᑎᑦ ᖃᓄᐃᓘᕐᓂᖏᓐᓂ, ᐱᕙᕇᕐᕕᔅᓴᖏᓐᓂ (ᑕᖅᑭᖓ/ᐊᕐᕌᒍᖓ) ᖃᓄᕐᓗ ᐱᔭᕇᖅᑐᓪᓗᒍ ᖃᓄᐃᑦᑑᓂᐊᕐᒪᖔᖅ.

ᓯᕗᓪᓕᖅᐹᖅᓯᐅᑎ ᑲᔪᓯᑦᑎᐊᕐᓂᖏᑦ, ᖃᓄᕐ ᓂᕆᐅᒋᔭᖃᖅᑭᓯ ᐱᔭᕇᕈᔅᓯᐅ ᐊᐃᑉᐸᖓ ᐱᓕᕆᔅᓴᖅ? ᓇᓗᓇᐃᔭᑦᑎᐊᕐᓗᒋᑦ ᖃᓄᖅ ᐱᔭᕇᖅᑲᑦ ᖃᓄᐃᑦᑑᒐᔭᕐᒪᖔᑕᓴ ᐱᓕᕆᐊᒧᑦ ᑲᔪᓯᓗᑎᑦ ᐊᐃᑉᐸᖓᓐᓄᑦ (ᐱᓕᕆᐊᔅᓴᖅ ᑲᔪᓯᑎᑕᐅᓂᖓᓐᓂ). ᐅᖃᕐᓗᑎᓪᓗ ᑭᓱᑦ ᑭᒃᑯᓪᓗ ᐊᓯᔾᔨᕋᔭᕐᒪᖔᑕ, ᖃᖓᒃᑯᓪᓗ ᐊᓯᔾᔨᕋᔭᕐᒪᖔᑕ (ᑕᕝᕙᑦᑕᐅᑎᒋ, ᕿᓚᒥᕈᓗᒃ ᐅᐊᑦᑎᐊᕈᒃᑲᓂᕐᓘᓐᓃᑦ). ᓇᓗᓇᐃᔭᑦᑎᐊᕋᓱᓪᓗᒋᑦ.

ᓲᕐᓗ ᓇᓗᓇᐃᕐᓗᒋᑦ ᐱᔭᕇᕐᓂᖏᑦ, ᑭᓯᐊᓂᓕ ᐃᓱᖃᓐᖏᑦᑐᑦ, ᐅᑯᓂᖓᐅᒐᓗᐊᖅᑎᓪᓗᒍ:

• ᐊᖏᓪᓕᒋᐊᖅᑲᑕ ᓂᖀᑦ ᑐᖅᑯᖅᑕᐅᓯᒪᕕᖏᑦ ᐃᓪᓗᒥᑦ ᓄᓇᓕᓐᓂᓪᓘᓐᓃᑦ;
• ᐊᒥᓲᓂᖏᑦ ᐱᖃᑕᐅᔪᑦ ᐃᓕᓐᓂᐊᖅᑎᑕᐅᓂᐊᖅᑐᑦ ᓂᕿᓕᕆᓂᕐᒥᑦ, ᓂᕿᔅᓴᖅᓯᐅᕐᓂᕐᒥᑦ ᐱᐅᖅᓱᐊᕐᓂᒥᓪᓘᓐᓃᑦ;
• ᓂᐅᕐᕈᑕᐅᔪᓐᓇᖅᑐᓂᒃ ᐊᖏᓪᓕᒋᐊᖅᑕᐅᓂᖏᑦ ᑐᓂᖅᑲᖅᑕᐅᖃᑦᑕᕐᓂᖏᓐᓄ ᓂᐅᕕᐊᔅᓴᖃᕐᓂᖏᓐᓄᓪᓗ;
• ᑎᒍᔭᕐᓂᓂᖅᓴᐅᓕᕐᓗᑎᑦ ᓂᖀᑦ ᐃᓪᓗᖃᑎᒌᓐᓄᑦ ᐃᒻᒥᒃᑰᖅᑐᓄᓪᓘᓐᓃᑦ; ᐊᒻᒪᓘᓐᓃᑦ
• ᖃᐅᔨᒪᓕᒃᑲᓂᕐᓗᑎᑦ ᐱᔪᓐᓇᕐᓂᖏᓐᓂ, ᐸᕐᓇᑕᐅᖃᑦᑕᕐᓂᖏᓐᓂ ᑐᖅᑯᖅᑕᐅᖃᑦᑕᕐᓂᖏᓐᓂᓪᓗ ᓂᖀᑦ.

ᓇᓗᓇᐃᔭᕐᓗᒋᑦ ᐱᓕᕆᐊᑦ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖓᓂ, ᓄᓇᓕᓐᓂᑦ, ᓄᓇᖃᖅᑳᖅᑐᒥᓂᕐᓂᑦ, ᓯᓚᑦᑐᖅᓴᕐᕕᓐᓂᑦ, ᓯᓚᑦᑐᖅᓴᕐᕕᔾᔪᐊᕐᓂᑦ ᐊᒻᒪᓘᓐᓃᑦ ᐃᖅᑲᓇᐃᔭᕐᕕᓐᓂᑦ ᐃᑲᔪᖅᑐᓱᐃᔪᓂᒃ: ᑎᑎᕋᕐᓗᒋᑦ ᐱᓕᕆᐊᖑᓂᐊᖅᑐᑦ ᓇᓗᓇᐃᖅᑕᐅᓯᒪᓂᖏᑦ ᓄᓇᓕᓐᓂᑦ, ᑲᓇᑕᐅᑉ ᐅᑭᐅᖅᑕᖅᑐᖏᓐᓂ ᐅᕝᕙᓘᓐᓃᑦ ᓇᒻᒥᓂᖃᖅᑎᐅᔪᑦ ᐃᑲᔪᖃᑦᑕᖅᑐᓂᒃ (ᑮᓇᐅᔭᖅᑎᒎᓐᖏᑦᑐᖅ). ᐊᑑᑎᖃᖅᑲᑦ, ᐅᓂᒃᑳᕐᓗᑎᓪᓗ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ ᐅᕝᕙᓘᓐᓃᑦ ᓄᓇᓕᓐᓂᑦ ᐱᓕᕆᖃᑕᐅᔪᓂᒃ ᐋᖅᑭᖅᑕᐅᒐᔪᓐᓂᖏᓐᓂ ᐱᓕᕆᐊᖅ ᐱᔾᔪᑎᒋᓪᓗᒍ.

ᒥᔅᓴᐅᓴᑦᑕᐅᓯᒪᔪᑦ ᐱᓕᕆᐊᓄᑦ ᐊᑭᖏᑦ ᑮᓇᐅᔭᖅᑖᕐᕕᖏᓪᓗ

ᑲᑎᑦᑐᒋᑦ ᐱᓕᕆᐊᓄᑦ ᐊᑭᖏᑦ: ᑎᑎᕋᕐᓗᒋᑦ ᑲᑎᑦᑐᒋᑦ ᐱᓕᕆᐊᔅᓴᓄᑦ ᐊᑭᖏᑦ (ᖃᓂᓐᓂᖅᐹᒧᑦ ᑮᓇᐅᔭᓄᑦ ᓈᓴᐅᑎᖏᓐᓅᖓᓗᒋᑦ).

ᑐᔅᓯᕌᖏᑦ ᑳᓄᐊᒃᑯᓂ (CanNor): ᑎᑎᕋᕐᓗᒋᑦ ᐊᒥᓲᓂᖏᑦ ᑮᓇᐅᔭᐃᑦ ᑐᔅᓯᕌᑦ ᑳᓄᐊᒥᑦ (CanNor) (ᖃᓂᓐᓂᖅᐹᒧᑦ ᑮᓇᐅᔭᓄᑦ ᓈᓴᐅᑎᖏᓐᓅᖓᓗᒋᑦ). ᕿᒥᕐᕈᓗᒋᑦ ᐊᒥᓲᓂᖅᐹᑦ ᐊᑭᓕᐅᑕᐅᔪᓐᓇᖅᑐᓂᒃ ᖃᐅᔨᒪᑦᑎᐊᕆᐊᕐᓗᑎᓪᓗ ᐅᖓᑖᓅᕈᓐᓇᖏᓐᓂᖏᓐᓂ ᐱᔭᐅᔪᓐᓇᖅᑐᓂᑦ ᐅᖓᑖᓅᖅᑎᑦᑕᐃᓕᒪᑎᓪᓗᒍ.

ᑮᓇᐅᔭᖅᑐᕈᑎᖏᑦ: ᐱᓕᕆᐊᑉ ᑮᓇᐅᔭᖅᑐᕈᑎᖏᑦ ᑎᑎᕋᕐᒥᓗᒋᑦ ᐃᓛᒃᑯᑦ ᑕᐃᓗᒋᑦ ᑮᓇᐅᔭᖅᑐᕈᑎᔅᓴᐃᑦ ᐃᓚᒍᑕᖏᑦ A ᑎᑎᕋᖅᓯᒪᓗᒋᑦ. ᒪᕐᕉᓐᓂᒃ ᑎᑎᕋᖅᓯᒪᔫᓐᓂᒃ ᐱᑕᕆᐊᖃᖅᑐᑎᑦ: ᓇᑭᓐᖔᕐᓂᖏᑦ ᑮᓇᐅᔭᐃᑦ ᐊᒻᒪᓗ ᐊᑐᖅᑕᐅᓂᐊᕐᓂᖏᑦ ᑮᓇᐅᔭᐃᑦ.

ᐱᓕᕆᐊᔅᓴᓄᑦ ᑮᓇᐅᔭᖅᑐᕈᑏᑦ ᐱᖃᓯᐅᔾᔨᒋᐊᓖᑦ ᐊᑭᓕᒫᕆᒐᔭᖅᑕᖏᓐᓄᑦ ᐱᓕᕆᐊᔅᓴᓄᑦ. ᐱᓕᕆᐊᔅᓴᓄᑦ ᑮᓇᐅᔭᖅᑐᕈᑏᑦ ᕿᒥᕐᕈᔭᐅᒐᔭᖅᑐᑦ ᓈᒻᒪᒃᑲᓗᐊᕐᒪᖔᑕ ᐊᔾᔨᐸᓗᖏᓐᓄ ᐱᓕᕆᐊᔅᓴᓅᖓᔪᓂᒃ, ᐊᒻᒪᓗ ᑕᐃᒪᐃᓪᓗᐊᑎᑦᑎᔾᔪᑎᓄᑦ ᐱᓕᕆᖃᑎᖏᓐᓄᓪᓗ ᐃᑲᔪᖅᑕᐅᓂᖏᓐᓄᑦ. ᓯᕗᓪᓕᖅᐹᖅᓯᐅᑎ ᑕᑭᓂᖃᕈᓐᓇᖅᑐᖅ ᐊᕐᕌᒎᓐᓄᒃ ᒪᕐᕉᓐᓄᒃ.

ᐊᖏᖅᑕᐅᓂᖅᑲᑦ ᐱᓕᕆᐊᔅᓴᖅ ᑮᓇᐅᔭᓄᑦ, ᐱᓕᕆᐊᔅᓴᓕᒫᓄᑦ ᐊᑭᖏᑦ ᑲᑎᖅᓱᕐᓗᒋᑦ ᐱᓕᕆᕝᕕᖓᓐᓂ ᐊᖏᕈᑎᒥ ᒪᓕᓪᓗᑎᑦ. ᐱᖃᐅᓯᔾᔨᒋᐊᖃᓐᖏᑦᑐᑦ "ᑐᓐᖓᓱᑦᑎᑦᑎᔾᔪᑎᓄᑦ" ᑐᓂᕐᕈᑏᑦ ᑮᓇᐅᔭᖅᑐᕈᑎᓂᒃ.